ប្រែសម្រួល : កញ្ញាដាលីស (ដេល្លីម៉េល) ៖ ពន្ធនាគារខ្នាតយក្សមួយនៅប្រទេសអែលសាល់វ៉ាឌ័របានបើកទ្វារទទួលអ្នកទោសចំនួន ២.០០០នាក់ឈុតដំបូងរបស់ខ្លួនដែលរួមមានជនជាប់សង្ស័យជាសមាជិកក្រុមជនអន្ធពាលជាច្រើននាក់។
ពន្ធនាគារនេះត្រូវបានរចនាឡើងសម្រាប់ផ្ទុកក្រុមអន្ធពាលចំនួន ៤០.០០០ នាក់ ហើយរដ្ឋមន្ត្រីសន្តិសុខរបស់ប្រទេសអាម៉េរិកកណ្តាលនេះបានព្រមានអ្នកទោសថា ពួកគេ”នឹងមិនអាចដើរចេញពីទីនេះបានទេ”។
ការផ្លាស់ទៅកាន់ពន្ធនាគារបច្ចេកវិជ្ជាខ្ពស់នេះធ្វើឡើងបន្ទាប់ពីលោកប្រធានាធិបតី ណាយីប ប៊ូកេឡេ (Nayib Bukele) បានប្រកាសធ្វើសង្គ្រាមលើឧក្រិដ្ឋកម្ម។
លោកប៊ូកេឡេបានសរសេរលើ Twitter ថា “នៅពេលព្រឹកព្រលឹម ក្នុងប្រតិបត្តិការតែមួយជើង យើងបានផ្ទេរសមាជិកជនអន្ធពាល ២.០០០នាក់ដំបូងទៅកាន់មជ្ឈមណ្ឌលឃុំឃាំងសម្រាប់បទល្មើសភេរវកម្ម (CECOT)” ដែលគាត់អះអាងថាជាពន្ធនាគារដ៏ធំបំផុតនៅទ្វីបអាម៉េរិក។
លោកប៊ូកាឡេបានបន្ថែមថា “នេះនឹងក្លាយជាផ្ទះថ្មីរបស់ពួកគេ ដែលពួកគេនឹងរស់នៅលាយឡំជាមួយគ្នាជាច្រើនទសវត្សរ៍ ដោយមិនអាចបង្កគ្រោះថ្នាក់បន្ថែមទៀតដល់ប្រជាជនបានឡើយ”។
ដោយចងច្រវ៉ាក់ជាប់ដៃនិងជើង ពួកគេត្រូវបានដឹកតាមឡានក្រុងដើម្បីបញ្ជូនទៅពន្ធនាគារថ្មីនៅក្នុងក្បួនមួយ ដែលរួមបញ្ចូលទាំងឧទ្ធម្ភាគចក្រផងដែរ។
ប្រធានាធិបតីបានបង្ហោះវីដេអូបង្ហាញក្រុមបុរសគ្មានអាវ ជើងទទេ សាក់ពេញខ្លួន ស្លៀកកន្សែងពណ៌ស អង្គុយចំកោងដាក់ដៃពីក្រោយក្បាលត្រងោលរបស់ពួកគេ។
ពួកគេត្រូវបានតម្រៀបនៅកៀកៗគ្នា ដោយម្នាក់ៗអង្គុយដាក់ជើងពីលើបុរសនៅខាងមុខពួកគេ ខណៈឆ្មាំប្រដាប់អាវុធឈរមើល។
នៅឯកន្លែងថ្មីនេះ បុរសទាំងនោះត្រូវបានដាក់ជាជួរដូចគ្នា មុនពេលនាំខ្លួនជាក្រុមធំៗចូលទៅក្នុងគុកបស់ពួកគេ កន្លែងដែលពួកគេត្រូវដាក់ឱ្យអង្គុយនៅលើឥដ្ឋ មុនពេលមើលឃើញគ្រែដែកគ្មានពូកនៅពីមុខ។
រដ្ឋមន្ត្រីក្រសួងយុត្តិធម៌និងសន្តិសុខ លោក ហ្គូស្តាវ៉ូ វីលឡាតូរ៉ូ (Gustavo Villatoro) បាននិយាយនៅលើ Twitter ថា “យើងកំពុងលុបបំបាត់មហារីកនេះចេញពីសង្គម”។
លោកបានបន្ថែមថា “ដឹងថាអ្នកនឹងមិនអាចដើរចេញពីពន្ធនាគារ CECOTបាន អ្នកនឹងបង់ថ្លៃលើអ្វីដែលអ្នកបានប្រព្រឹត្ត…ពួកភេរវករកំសាកញី”។
សាងសង់ឡើងតាមបញ្ជារបស់លោកប៊ូកេឡេបន្ទាប់ពីគាត់បានប្រកាស “សង្គ្រាម” លើក្រុមអន្ធពាលកាលពីខែមីនាកន្លងទៅ ពន្ធនាគារនៅទីក្រុងតេកូលូកា (Tecoluca) ស្ថិតនៅចម្ងាយ ៧៤ គីឡូម៉ែត្រពីភាគអាគ្នេយ៍នៃរដ្ឋធានីសាន់សាល់វ៉ាឌ័រ (San Salvador) មានអគារចំនួន ៨ ធ្វើពីបេតុង។
អគារនីមួយៗមានគុកចំនួន ៣២ ដែលមានទំហំប្រហែល ១០០ ម៉ែត្រការ៉េ ដែលរចនាឡើងដើម្បីផ្ទុកអ្នកទោសជាង ១០០ នាក់ នេះបើយោងតាមរដ្ឋមន្ត្រីក្រសួងសាធារណការលោក រ៉ូមេអូ រ៉ូឌ្រីហ្គេស (Romeo Rodriguez)។
គុកនីមួយៗមានអាងងូតទឹកចំនួនពីរនិងបង្គន់តែពីរប៉ុណ្ណោះ។
មានគ្រែដែកត្រឹមតែ ៨០ ប៉ុណ្ណោះសម្រាប់អ្នកទោស ១០០ នាក់ ហើយក្រុមសិទ្ធិមនុស្សនិងអ្នកសង្កេតការណ៍បានរិះគន់ការសាងសង់នេះថាជាការរំលោភលើស្តង់ដារពន្ធនាគារ៕
ពន្ធនាគារ CECOT ថ្មីនេះសាងសង់ឡើងសម្រាប់ទុកអ្នកទោស ៤០.០០០ នាក់។គុកថ្មីនេះបានទួលសមាជិកក្រុមយូកូង២.០០០នាក់ដំបូងដោយពួកគេគ្មានអាវ ជើងទទេ សាក់ពេញខ្លួន ស្លៀកកន្សែងពណ៌ស អង្គុយចំកោងដាក់ដៃពីក្រោយក្បាលត្រងោលរបស់ពួកគេ ខណៈឆ្មាំប្រដាប់អាវុធឈរមើល