ប្រែសម្រួលៈបំណង(ស្ត្រេតថែមស៍)៖ ចិនបានចោទប្រកាន់អាម៉េរិកថាធ្វើអោយគ្រោះថ្នាក់ដល់សន្តិភាពនិងស្ថិរភាពនៅច្រកសមុទ្រតៃវ៉ាន់បន្ទាប់ពីយន្តហោះឈ្លបយកការណ៍P-8A Poseidonរបស់អាម៉េរិកមួយហោះល្បាតលើដែនទឹកដ៏រសើបនេះកាលពីថ្ងៃចន្ទ។
សូមបញ្ជាក់ថា រដ្ឋាភិបាលទីក្រុងប៉េកាំងតែងប្រតិកម្មទាំងមិនសប្បាយចិត្តចំពោះបេសកកម្មយោធាអាម៉េរិកកាត់ច្រកសមុទ្រតូចចង្អៀតនេះ ដោយជារឿយៗបញ្ជូននាវាចម្បាំងបើកកាត់និងពេលខ្លះបញ្ជូនយន្តហោះអោយហោះពីលើ នៅពេលចិនអះអាងថាខ្លួនមានអធិបតេយ្យភាព សិទ្ធិអធិបតេយ្យនិងភាពស្របច្បាប់»លើផ្លូវទឹកដែលខណ្ឌចែកមហាចិនដីគោកនិងកោះតៃវ៉ាន់។
ទោះជាយ៉ាងណា អាជ្ញាធរតៃវ៉ាន់និងអាម៉េរិកជំទាស់ការអះអាងរបស់ចិន ដោយថាវាជាផ្លូវទឹកអន្តរជាតិមួយ។
បញ្ជាការយោធភូមិភាគខាងកើតនៃកងទ័ពរំដោះប្រជាជន បាននិយាយថា កងកម្លាំងរបស់ខ្លួនបានតាមដានយន្តហោះនោះដោយដិតដល់នៅពេលវាហោះកាត់ច្រកសមុទ្រ។វាបាននិយាយនៅក្នុងសេចក្តីថ្លែងការណ៍ខ្លីមួយថា« អំពើរបស់ភាគីតំបន់អាម៉េរិកមានបំណងជ្រៀតជ្រែកនិងរំខានសភាពការណ៍តំបន់ ហើយធ្វើអោយគ្រោះថ្នាក់សន្តិភាពនិងស្ថិរភាពនៅច្រកសមុទ្រតៃវ៉ាន់។យើងសូមប្រឆាំងវាយ៉ាងមុតមាំ»។
«កងកម្លាំងយោធភូមិភាគបានត្រៀមខ្លួនកំរិតខ្ពស់គ្រប់ពេល និងប្តេជ្ញាការពារអធិបតេយ្យជាតិនិងបូរណភាពទឹកដីជាដាច់ខាត»។
ពីមុនៗ អាម៉េរិកបាននិយាយថា បេសកកម្មដូច្នេះបង្ហាញការប្តេជ្ញាចិត្តរបស់អាម៉េរិកចំពោះតំបន់ឥណ្ឌូប៉ាស៊ីហ្វិកមួយ សេរីនិងបើកចំហ។
ក្រសួងយោធាតៃវ៉ាន់ក៏បាននិយាយថា យន្តហោះបានហោះទៅភាគខាងត្បូងកាត់ច្រកសមុទ្រ ហើយ«កងកម្លាំងតៃវ៉ាន់បានតាមដានយន្តហោះនៅពេលវាហោះកាត់ច្រកសមុទ្រ តែសភាពការណ៍ធម្មតា»៕
បញ្ជាការយោធភូមិភាគខាងកើតនៃកងទ័ពរំដោះប្រជាជន បាននិយាយថាកងកម្លាំងរបស់ខ្លួនបានតាមដានយន្តហោះអាម៉េរិកយ៉ាងដិតដល់នៅពេលវាហោះកាត់ច្រកសមុទ្រ