ប្រែសម្រួល : កញ្ញាដាលីស (ដេល្លីម៉េល) ៖ កងកម្លាំងរុស្ស៊ីកំពុងព្យាយាមបិទផ្លូវក្រវាត់ជុំវិញទីក្រុងជីករករ៉ែ បាឃ្មុត (Bakhmut) កាលពីថ្ងៃចន្ទទី២៧កុម្ភៈខណៈភ្លៀងនិងអាកាសធាតុក្តៅនារដូវផ្ការីកឆាប់មកដល់ពេកបានប្រែក្លាយសមរភូមិភាគខាងកើតរបស់អ៊ុយក្រែនទៅជាវាលភក់ ដែលអាចរារាំងដល់ភាគីទាំងពីរ ខណៈពួកគេព្យាយាមចាប់ផ្តើមបើកការវាយលុក។
អាកាសធាតុក្តៅនារដូវផ្ការីកមានប្រវត្តិជាយូរមកហើយក្នុងការបំផ្លាញផែនការរបស់កងទ័ពដើម្បីវាយប្រហារលើដីអ៊ុយក្រែន និងភាគខាងលិចនៃប្រទេសរុស្ស៊ីព្រោះវាបានបង្វែរផ្លូវទៅជាទន្លេនិងវាលស្រែរហូតដល់ល្បាប់ភក់ដែលមិនអាចបើកកាត់បាន។
នៅតំបន់ដូណិតសក៍ក្បែរសមរភូមិជួរមុខ ទាហានអ៊ុយក្រែនបានចូលជ្រកក្នុងលេណដ្ឋានភក់ បន្ទាប់ពីអាកាសធាតុក្តៅខ្លាំងបានធ្វើឱ្យដីមានទឹកកករលាយអស់រលីង។
លោកមីកូឡា (Mykola)អាយុ ៥៩ ឆ្នាំ មេបញ្ជាការកងរ៉ុក្កែតជួរមុខរបស់អ៊ុយក្រែន ដែលកំពុងមើលអេក្រង់ថេប្លេតសម្រាប់កូអ័រដោណេដើម្បីបាញ់គ្រាប់ បាននិយាយថា”ភាគីទាំងពីរស្ថិតនៅក្នុងទីតាំងរបស់ពួកគេ ព្រោះដូចដែលអ្នកបានឃើញចឹង រដូវផ្ការីកមានន័យថាបែកភក់។ ដូច្នេះ វាមិនអាចទៅរួចទេក្នុងការរុលទៅមុខ”។
ទីភ្នាក់ងារសារព័ត៌មានរ៉យទ័របានឃើញយានជំនិះយោធាជាច្រើនគ្រឿងជាប់គាំងក្នុងភក់។ នៅក្នុងលេណដ្ឋានដែលជីកយ៉ាងជ្រៅចេញពីដីតាមលំនាំកាច់ចុះកាច់ឡើង លោកវ៉ូឡូឌីមៀ (Volodymyr) អាយុ ២៥ ឆ្នាំជាមេបញ្ជាការកងអនុសេនាតូច បាននិយាយថា កូនចៅរបស់គាត់បានត្រៀមខ្លួនដើម្បីធ្វើប្រតិបត្តិការក្នុងគ្រប់ប្រភេទអាកាសធាតុ។
លោកនិយាយថា “នៅពេលដែលគេផ្តល់គោលដៅឱ្យយើង វាមានន័យថាយើងត្រូវបំផ្លាញវា”។
រុស្ស៊ីកំពុងព្យាយាមឡោមព័ទ្ធទីក្រុងបាឃ្មុត ដោយបង្ខំឱ្យអ៊ុយក្រែនដកទ័ពរបស់ខ្លួនចេញ។ នោះនឹងផ្តល់ឱ្យរដ្ឋាភិបាលក្រុងមូស្គូនូវជ័យជម្នះលើកដំបូងរបស់ខ្លួនក្នុងរយៈពេលជាងកន្លះឆ្នាំ បន្ទាប់ពីដំណាក់កាលដ៏បង្ហូរឈាមបំផុតនៃសង្គ្រាមមកទល់ពេលនេះ ពោលជាការវាយលុកឥតស្រាកស្រាន្តរបស់រុស្ស៊ី ដែលបានចាប់ផ្តើមនៅលើដីដែលមានទឹកកក៕
ភ្លៀងនិងអាកាសធាតុក្តៅនារដូវផ្ការីកឆាប់មកដល់ពេកបានប្រែក្លាយសមរភូមិភាគខាងកើតរបស់អ៊ុយក្រែនទៅជាវាលភក់