ប្រែសម្រួល : កញ្ញាដាលីស (ដេល្លីម៉េល) ៖ ម្ចាស់ជើងឯកវើលខាប់ លីអូនែល ម៉េសស៊ី បានផ្តួលកីឡាករ កាយលៀន អឹមបាផេ (Kylian Mbappé) ម្តងទៀតហើយលើកនេះគឺឈ្នះពានរង្វាន់កីឡាករឆ្នើមរបស់ FIFA កាលពីថ្ងៃចន្ទទី២៧កុម្ភៈ។
ពានរង្វាន់កីឡាការិនីឆ្នើមគឺបានទៅនាង អាឡិចហ្សា ពូថែលឡាស (Alexia Putellas) របស់អេស្ប៉ាញក្នុងរយៈពេលពីរឆ្នាំជាប់គ្នា។
បន្ទាប់ពីដឹកនាំអាហ្សង់ទីនឈ្នះវើលខាប់នៅវគ្គផ្តាច់ព្រ័ត្រដ៏អស្ចារ្យទល់នឹងបារាំងរបស់អឹមបាផេកាលពីឆ្នាំមុននៅប្រទេសកាតា ម៉េសស៊ីបានឈ្នះការបោះឆ្នោតជ្រើសកីឡាករឆ្នើមទល់នឹងអឹមបាផេ និង ការីម បិនហ្សេម៉ា (Karim Benzema) និងទទួលបានពានរង្វាន់ FIFA មួយនេះជាលើកទីប្រាំពីរក្នុងរយៈពេល ១៤ ឆ្នាំ។
គាត់បានឈ្នះវើលខាប់ជាមួយការប៉ុនប៉ងលើកទីប្រាំរបស់គាត់ ដែលនេះក៏ស្មើនឹងកំណត់ត្រាថ្មីមួយរបស់គាត់ដែរ។
ម៉េសស៊ីបាននិយាយថា “វាជាឆ្នាំដ៏វីវក់មួយសម្រាប់ខ្ញុំ។ ខ្ញុំអាចសម្រេចក្តីសុបិន (វើលខាប់) របស់ខ្ញុំបាន បន្ទាប់ពីតស៊ូដើម្បីវាយ៉ាងយូរ។ ហើយនៅទីបំផុតវាបានកើតឡើង ហើយវាជារឿងដ៏ស្រស់បំព្រងបំផុតក្នុងអាជីពរបស់ខ្ញុំ។ វាជាក្តីស្រមៃរបស់កីឡាករគ្រប់រូប ប៉ុន្តែមានកីឡាករតិចតួចណាស់ដែលអាចសម្រេចវាបាន។ ដូច្នេះ ខ្ញុំអរគុណព្រះដែលអាចធ្វើវាបាន”។
កីឡាករទាំងបីនាក់ខាងលើបានជាប់ក្នុងបញ្ជីសម្រាំងចុងក្រោយក្នុងការបោះឆ្នោតដោយក្រុមប្រឹក្សាសកលនៃប្រធានក្រុមនិងគ្រូបង្វឹកជម្រើសជាតិ អ្នកសារព័ត៌មានដែលបានសម្រាំងនៅក្នុងប្រទេសសមាជិកនីមួយៗរបស់ FIFA ទាំង ២១១ បូករួមទាំងអ្នកគាំទ្រតាមអនឡាញផងដែរ៕
ម៉េសស៊ីឈ្នះពានកីឡាករឆ្នើមរបស់ FIFA ជាលើកទី៧កាលពីថ្ងៃចន្ទ
នាង អាឡិចហ្សា ពូថែលឡាស និង លីអូនែល ម៉េសស៊ី