ប្រែសម្រួល : កញ្ញាដាលីស (ស្ត្រេតថែមស៍) ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានផ្តល់មេដាយដ៏មានកិត្យានុភាពដល់តារាសម្តែងអាម៉េរិក លោក ស្តេវិន ស៊ីហ្គាល់ (Steven Seagal) សម្រាប់ការងាររបស់គាត់លើការពង្រឹង “កិច្ចសហប្រតិបត្តិការអន្តរជាតិ” នេះបើយោងតាមក្រឹត្យផ្លូវការមួយចេញផ្សាយកាលពីថ្ងៃចន្ទទី២៧កុម្ភៈ។
ក្នុងរយៈពេលជាច្រើនទសវត្សរ៍ចាប់តាំងពីភាពល្បីល្បាញដល់កំពូលរបស់គាត់នៅហូលីវូដ លោកស៊ីហ្គាល់គឺជាអ្នកគាំទ្រនិយាយមិនសំចៃមាត់របស់លោកពូទីន ដែលបានផ្តល់សញ្ជាតិដល់តារាភាពយន្តអាយុ ៧០ ឆ្នាំរូបនេះកាលពីប៉ុន្មានឆ្នាំមុន។
រដ្ឋាភិបាលក្រុងមូស្គូបាននិយាយថា លោកស៊ីហ្គាល់ត្រូវបានផ្តល់ជូននូវមេដាយ Order of Friendship សម្រាប់”ការរួមចំណែកដ៏សំខាន់របស់គាត់ចំពោះការអភិវឌ្ឍកិច្ចសហប្រតិបត្តិការវប្បធម៌និងមនុស្សធម៌អន្តរជាតិ”។
លោកស៊ីហ្គាល់ ដែលមកលេងរុស្ស៊ីញឹកញាប់ បានគាំទ្រការកាត់យកតំបន់គ្រីម៉េរបស់អ៊ុយក្រែនពីសំណាក់រុស្ស៊ីក្នុងឆ្នាំ ២០១៤ ដោយចាត់ទុកថា “សមហេតុផលណាស់” ហើយបានចូលរួមជាមួយគណបក្សមួយ ដែលគាំទ្រវិមានក្រឹមឡាំងក្នុងឆ្នាំ ២០២១។
កាលពីខែសីហាឆ្នាំមុន លោកស៊ីហ្គាល់បានចុះទៅមើលតំបន់ដូណិតសខ៍ភាគខាងកើតអ៊ុយក្រែន រួមទាំងមជ្ឈមណ្ឌលឃុំឃាំងដែលរងការបំផ្លាញ អូឡេនីវកា(Olenivka)ជាកន្លែងដែលឈ្លើយសឹកអ៊ុយក្រែនរាប់សិបនាក់បានស្លាប់។
អ៊ុយក្រែននិងរុស្ស៊ីបានធ្វើការស្តីបន្ទោសគ្នាទៅវិញទៅមកចំពោះការវាយប្រហារលើមណ្ឌលឃុំឃាំងនេះកាលពីខែកក្កដាឆ្នាំមុន៕
ពូទីនជូនលិខិតឆ្លងដែនដោយផ្ទាល់ដល់លោកស៊ីហ្គាល់ក្នុងឆ្នាំ២០១៦