ប្រែសម្រួល : កញ្ញាដាលីស (VNExpress) ៖ នាយកប្រតិបត្តិក្រុងហុងកុងលោក ចន លី (John Lee) បាននិយាយកាលពីថ្ងៃអង្គារទី២៨កុម្ភៈថា ទីក្រុងហុងកុងនឹងទម្លាក់ចោលការពាក់ម៉ាស់ការពារកូវីដ១៩ជាចាំបាច់របស់ខ្លួន នៅក្នុងចំណាត់ការមួយដើម្បីទាក់ទាញភ្ញៀវទេសចរនិងអាជីវកម្មនិងស្ដារឡើងវិញនូវជីវិតធម្មតា ពោលជាងបីឆ្នាំបន្ទាប់ពីច្បាប់តឹងរ៉ឹងត្រូវបានដាក់ជាលើកដំបូងនៅក្នុងមជ្ឈមណ្ឌលហិរញ្ញវត្ថុនេះ។
លោកលីបានប្រាប់សន្និសីទសារព័ត៌មានមួយថា វិធានការនេះនឹងចូលជាធរមានចាប់ពីថ្ងៃពុធទី១មីនា។ តំបន់រដ្ឋបាលពិសេសហុងកុងគឺជាកន្លែងចុងក្រោយបំផុតមួយនៅទូទាំងពិភពលោកដែលនៅតែដាក់ចេញការពាក់ម៉ាស់ជាចាំបាច់។
ហុងកុងនិងម៉ាកាវបានអនុវត្តតាមគោលនយោបាយកូវីដសូន្យរបស់ចិនបីឆ្នាំកន្លងមកនេះ។ ហុងកុងបានចាប់ផ្តើមបន្ធូរបន្ថយច្បាប់កូវីដដ៏តឹងរ៉ឹងរបស់ខ្លួនកាលពីឆ្នាំមុន ប៉ុន្តែការពាក់ម៉ាស់នៅតែមានជាប់លាប់ចាប់តាំងពីឆ្នាំ ២០២០។
តំបន់រដ្ឋបាលពិសេសនៅជិតខាងម៉ាកាវ បាននិយាយកាលពីថ្ងៃទី២៦ ខែកុម្ភៈថា ខ្លួននឹងទម្លាក់ចោលការតម្រូវឱ្យពាក់ម៉ាស់ចាំបាច់ទាក់ទងនឹងកូវីដ១៩ សម្រាប់ទីតាំងភាគច្រើនលើកលែងតែមធ្យោបាយដឹកជញ្ជូនសាធារណៈ មន្ទីរពេទ្យ និងតំបន់មួយចំនួនផ្សេងទៀត។
នៅចិនដីគោក ប្រជាជនមិនតម្រូវឱ្យពាក់ម៉ាស់នៅខាងក្រៅទេ ប៉ុន្តែអាជ្ញាធរលើកទឹកចិត្តពួកគេឱ្យធ្វើបែបនេះនៅតាមទីសាធារណៈខ្ទប់ជិត ដូចជាអាកាសយានដ្ឋាននិងស្ថានីយរថភ្លើង៕
ហុងកុងនឹងលែងតម្រូវឱ្យពាក់ម៉ាស់នៅថ្ងៃទី១មីនា