ប្រែសម្រួលៈបំណង(ដេល្លីម៉េល)៖ រដ្ឋមន្ត្រីការបរទេសអាម៉េរិកលោក អាន់ថូនី ប្លីងកិន កាលពីថ្ងៃអង្គារបានប្តេជ្ញាផ្តល់ការគាំទ្ររបស់អាម៉េរិកចំពោះឯករាជ្យភាពរបស់កាហ្សាក់ស្ថាន ចំពេលលោកកំពុងធ្វើទស្សនកិច្ចប្រទេសនេះដើម្បីបង្កើនឥទ្ធិពលអាម៉េរិកនៅអាស៊ីកណ្តាល ដែលកំពុងបារម្ភអំពីសង្គ្រាមនៅអ៊ុយក្រែន។
នៅពេលជួបសមភាគីកាហ្សាក់ស្ថាន លោកប្លីងកិន បាននិយាយថា« ដូចអ្នកបានដឹងហើយ អាម៉េរិកគាំទ្រអធិបតេយ្យភាព បូរណភាពទឹកដីនិងឯករាជ្យភាពរបស់កាហ្សាក់ស្ថានយ៉ាងរឹងមាំ…។អាម៉េរិកប្តេជ្ញាចិត្តពង្រឹងទំនាក់ទំនងអោយកាន់តែរឹងមាំខ្លាំងឡើងជាមួយកាហ្សាក់ស្ថានដែលបានបង្កើតកិច្ចសហការជាមួយរដ្ឋាភិបាលក្រុងវ៉ាស៊ីនតោនចាប់តាំងពីការដួលរលំសហភាពសូវៀត ទោះជារដ្ឋាភិបាលទីក្រុងមូស្គូនៅមានឥទ្ធិពលលើក្តី»។
ប្រមុខការទូតអាម៉េរិកក្រោយមកបានជួបពិភាក្សាជាមួយប្រធានាធិបតី កាសស៊ីម-ចូម៉ាត តូកាយេវ( Kassym-Jomart Tokayev)នៅទីក្រុងអាស្តាណា(Astana)ហើយនឹងបន្តដំណើរទៅកាន់ប្រទេសក្បែរខាងអ៊ុយបេគីស្ថាន។
នៅទីក្រុង អាស្តាណា លោកប្លីងកិនក៏នឹងជួបរដ្ឋមន្ត្រីការបរទេសមកពីអតីតសាធារណរដ្ឋសូវៀតប្រាំប្រទេសនៅអាស៊ីកណ្តាល ដែលក៏រួមមាន គៀហ្គីស្ថាន ,តាជីគីស្ថាននិងទឺកមេននីស្ថាន។
វាជាដំណើរទស្សនកិច្ចរបស់មន្ត្រីជាន់ខ្ពស់បំផុតក្នុងរដ្ឋការលោកចូ បៃដិន នៅអាស៊ីកណ្តាល។
បណ្តាប្រទេសនៅអាស៊ីកណ្តាលមានទំនាក់ទំនងសេដ្ឋកិច្ចនិងសន្តិសុខជាមួយរុស្ស៊ីជាយូរមកហើយ តែមិនដូចអតីតសាធារណរដ្ឋសូវៀតបេឡារូសទេ ។ពួកគេមិនគាំទ្រសង្គ្រាមរបស់រដ្ឋាភិបាលទីក្រុងមូស្គូនៅអ៊ុយក្រែនទេ។ពួកគេខ្លះបានបោះអនុប្បវាទនិងខ្លះមិនបោះឆ្នោតកាលពីសប្តាហ៍មុនលើសេចក្តីសំរេចចិត្តមួយរបស់មហាសន្និបាតអង្គការសហប្រជាជាតិ ដែលទាមទារអោយរុស្ស៊ីដកចេញពីអ៊ុយក្រែន។
បន្ទាប់ពីជំនួបនៅអាស៊ីកណ្តាល លោកប្លីងកិននឹងបន្តដំណើរទៅឥណ្ឌាដើម្បីចូលរួមជំនួបរដ្ឋមន្ត្រីការបរទេសរបស់ក្រុមប្រទេសG20៕
រដ្ឋមន្ត្រីការបរទេសអាម៉េរិក ប្លីងកិន ជួបប្រធានាធិបតីកាហ្សាក់ស្ថាននៅក្រុងអាស្តាណា