ប្រែសម្រួល : កញ្ញាដាលីស (ដេល្លីម៉េល) ៖ មិនថាវាជាពេលដែលអ្នកកំពុងធ្វើការពីផ្ទះឬពិនិត្យមើលអ៊ីមែលរបស់អ្នកនៅលើរថភ្លើងនោះទេវាតែងតែមានពេលខ្លះយើងចង់ឱ្យអេក្រង់កុំព្យូទ័រយួរដៃរបស់យើងមានផ្ទៃធំជាងមុន។
ប៉ុន្តែថ្ងៃនៃការអស់សង្ឃឹមជុំវិញការខ្វះអេក្រង់ទីពីរអាចនឹងក្លាយជារឿងអតីតកាលឆាប់ៗនេះ ដោយសារតែការបង្កើតថ្មីបំផុតរបស់ក្រុមហ៊ុន Lenovo។
ក្រុមហ៊ុនបច្ចេកវិជ្ជាយក្សមួយនេះបានបង្ហាញកុំព្យូទ័រយួរដៃដែលមានអេក្រង់អាចពង្រីកបាននៅក្នុងព្រឹត្តិការណ៍ពិព័រណ៍ទូរស័ព្ទពិភពលោក (MWC) ឆ្នាំ២០២៣។
ជាមួយនឹងការចុចប៊ូតុងតែមួយ អេក្រង់ ១២,៧ អ៊ីញនឹងចំណាយពេលត្រឹមតែ ១០ វិនាទីដើម្បីក្លាយជាអេក្រង់ទំហំ ១៥,៣ អ៊ីញ។
ខណៈឧបករណ៍អនាគតនេះកំពុងដាក់តាំងបង្ហាញនៅ MWC ក្នុងទីក្រុងបាសេឡូណា វាគ្រាន់តែជាគំរូដំបូងបំផុតប៉ុណ្ណោះ ហើយទំនងជាមិនទាន់ដាក់លក់ជាសាធារណៈក្នុងពេលឆាប់ៗនោះឡើយ។
MWC ដែលជាពិព័រណ៍ពាណិជ្ជកម្មដ៏ធំបំផុតរបស់ពិភពលោកសម្រាប់ឧស្សាហកម្មទូរគមនាគមន៍ បានត្រឡប់មកទីក្រុងបាសេឡូណាក្នុងសប្តាហ៍នេះ ដើម្បីបង្ហាញនូវបច្ចេកវិជ្ជាចុងក្រោយបំផុតនៅក្នុងស្មាតហ្វូន។
អ្នកចូលរួមរាប់ម៉ឺននាក់បានមកដល់ថ្ងៃដំបូងដើម្បីមើលថាតើម៉ាកយីហោធំៗមានអ្វីមកបង្ហាញសម្រាប់ពេលអនាគត រាប់ចាប់ពីប្រព័ន្ធ 6G រហូតដល់ Metaverse៕
កុំព្យូទ័រយួរដៃគំរូរបស់ Lenovo អាចពន្លូតអេក្រង់ពី ១២,៧ អ៊ីញទៅ ១៥,៣ អ៊ីញដោយប្រើពេលត្រឹម ១០ វិនាទី
