ប្រែសម្រួលៈបំណង(ដេល្លីម៉េល,ស្ពុតនិច)៖ ចិនបានបញ្ជូនយន្តហោះប្រយុទ្ធ២៥គ្រឿងនិងនាវាចម្បាំងបីគ្រឿងទៅកៀកកោះតៃវ៉ាន់កាលពីព្រឹកថ្ងៃពុធទី១មីនា នេះបើតាមសេចក្តីរាយការណ៍របស់ក្រសួងយោធាតៃវ៉ាន់ នៅពេលភាពតានតឹងបន្តកើនឡើងរវាងចិនប៉េកាំងនិងរដ្ឋាភិបាលទីក្រុងវ៉ាស៊ីនតោនដែលជាអ្នកផ្គត់ផ្គង់អាវុធដល់តៃវ៉ាន់។
ក្រសួងបាននិយាយថា ក្នុងចំណោមយន្តហោះជាម្ភៃគ្រឿង មាន១៩គ្រឿងបានហោះឆ្លងកាត់ចូលតំបន់កំណត់អត្តសញ្ញាណយោធារបស់តៃវ៉ាន់ នៅពេលនាវាបន្តធ្វើប្រតិបត្តិការនៅក្នុងច្រកសមុទ្រ។តៃវ៉ាន់បានបញ្ជូនចេញយន្តហោះប្ររដេញ នាវាចម្បាំង និងបញ្ជាទៅកងកាំជ្រួចការពារដែនអាកាសអោយប្រុងប្រៀបខ្លួននិងតាមដានដើម្បីត្រៀមឆ្លើយតប។
តាមពិតចិនបានធ្វើសកម្មភាពយោធាដូច្នេះជារឿយៗ ជាផ្នែកនៃកលយុទ្ធ«តំបន់ប្រផេះ»ក្នុងគោលបំណងបំភិតបំភ័យនិងធ្វើអោយថយចុះគ្រឿងបរិក្ខាយោធាតៃវ៉ាន់ តែវាក៏ច្រើនតែកើតឡើងបន្ទាប់ពីអាជ្ញាធរក្រុងតៃប៉ិសមគំនិតជាមួយកម្លាំងបរទេសក្នុងគោលបំណងពង្រឹងជំហរទាមទារឯករាជ្យភាពចេញពីចិនដីគោកដាច់ស្រឡះ។
ចិនប៉េកាំងចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួនដែលត្រូវតែបង្រួបបង្រួមជាមួយមហាចិនដីគោកឡើងវិញ និងអាចប្រើកម្លាំងយោធាក្នុងករណីចាំបាច់។
សូមបញ្ជាក់ថា ទំនាក់ទំនងរវាងចិននិងអាម៉េរិកក៏ធ្លាក់ដុនដាប មកពីអំពើរបស់ចិនចំពោះតៃវ៉ាន់ ពាណិជ្ជកម្ម បច្ចេកវិទ្យា សិទ្ធិមនុស្សនិងសមុទ្រចិនខាងត្បូង។
ព័ត៌មានស្តីពីចិនបង្ហោះយន្តហោះនិងបញ្ជូននាវាចម្បាំងចូលកៀកកោះតៃវ៉ាន់កើតឡើងក្រោយពីមេបញ្ជាការកងកម្លាំងជើងគោកអាម៉េរិកប្រចាំតំបន់ឥណ្ឌូប៉ាស៊ីហ្វិក ឧត្តមសេនីយ៍ឆាលស៍ ហ្វ្លីន(Charles Flynn)បានប្រាប់កិច្ចប្រជុំមួយនៅវិទ្យាស្ថានសហគ្រាសអាម៉េរិកថា ចិនបានដាក់ពង្រាយកងកម្លាំងយុទ្ធសាស្ត្រនិងកងរ៉ុក្កែតនៅក្បែរកោះតៃវ៉ាន់ និងពួកវា«ស្ថិតក្នុងទីតាំងគ្រោះថ្នាក់»។
លោកហ្វ្លីន បាននិយាយកាលពីថ្ងៃចន្ទថា« កងកម្លាំងរ៉ុក្កែតរបស់កងទ័ពរំដោះប្រជាជននិងកងកម្លាំងគាំទ្រយុទ្ធសាស្ត្រស្ថិតនៅទីតាំងគ្រោះថ្នាក់មួយ។ការដាក់ពង្រាយកងកម្លាំងទាំងពីរបង្ហាញឥរិយាបទមិនទទួលខុសត្រូវនិងគ្រោះថ្នាក់»។
បើតាមលោកហ្វ្លីន ចិនបានបង្កើតកន្លែងចុះឡើងយន្តហោះថ្មីចំនួន១២នៅតំបន់យោធាខាងលិចរបស់ខ្លួន និងបង្កើនកម្លាំងបណ្តើរៗនៅក្នុងតំបន់នោះ។
ចំណែកឧត្តមសេនីយ៍ ម៉ៃ មីនីហាន ( Mike Minihan)បញ្ជាកងកម្លាំងអាកាសចល័តនៃកងទ័ពអាកាសអាម៉េរិក បាននិយាយថាចិនកំពុងត្រៀមខ្លួនវាយចូលតៃវ៉ាន់ ហើយវានឹងអាចទាញអោយអាម៉េរិកចូលពាក់ព័ន្ធ។
លោកថា «ខ្ញុំទាញថា យើងនឹងមានសង្គ្រាមនៅឆ្នាំ២០២៥ តែសង្ឃឹមថាខ្ញុំគិតខុសទៅចុះ។ប្រធានាធិបតីចិន ស៊ី ជីនភីង ធានាបានការកាន់អំណាចនៅអាណត្តិទីបី និងបានបង្កើតក្រុមប្រឹក្សាសង្គ្រាមរបស់លោកកាលពីឆ្នាំ២០២២។ការបោះឆ្នោតតៃវ៉ាន់នឹងប្រព្រឹត្តទៅនៅឆ្នាំ២០២៤ ដែលនឹងផ្តល់ហេតុផលមួយដល់លោកស៊ី។អាម៉េរិកក៏បោះឆ្នោតនៅឆ្នាំ២០២៤ ដែលវាបន្ថយការចាប់អារម្មណ៍ពីរដ្ឋាភិបាលទីក្រុងវ៉ាស៊ីនតោន។ក្រុមរបស់លោកស៊ី សម្លឹងទៅឆ្នាំ២០២៥ …»៕
តៃវ៉ាន់បានបញ្ជូនចេញយន្តហោះប្ររដេញ នាវាចម្បាំង និងបញ្ជាទៅកងកាំជ្រួចការពារដែនអាកាសអោយប្រុងប្រៀបខ្លួននិងតាមដានដើម្បីត្រៀមឆ្លើយតប