ប្រែសម្រួល : កញ្ញាដាលីស (ដេល្លីម៉េល) ៖ កម្មករនិយោជិតស្រីលង្កាបានបន្តធ្វើកូដកម្មកាលពីថ្ងៃពុធទី១មីនាដោយផ្គើននឹងការហាមឃាត់របស់រដ្ឋាភិបាលដើម្បីតវ៉ាចំពោះផែនការជួយសង្គ្រោះសេដ្ឋកិច្ចសម្រាប់ប្រទេសដែនកោះក្ស័យធនមួយនេះ ដោយបង្ខំឱ្យមានការបិទមន្ទីរពេទ្យ ធនាគារ និងកំពង់ផែ។
ប្រធានាធិបតី រ៉ានីល វីក្រេមេស៊ីង (Ranil Wickremesinghe) កំពុងប្រឈមមុខនឹងការរិះគន់ជាសាធារណៈជុំវិញការដំឡើងពន្ធយ៉ាងខ្ពស់ ការបន្ថយការចំណាយសាធារណៈហើតដំឡើងថ្លៃភ្លើងដែលដាក់ចេញដើម្បីធានាបាននូវថវិកាសង្គ្រោះពីអង្គការមូលនិធិរូបិយវត្ថុអន្តរជាតិIMF។
សហជីពប្រហែល៤០ រួមទាំងបុគ្គលិកមន្ទីរពេទ្យរដ្ឋាភិបាលនិងបុគ្គលិកធនាគារ បាននាំគ្នាឈប់ពីការងារ។
វេជ្ជបណ្ឌិតនៅមន្ទីរពេទ្យជាតិស្រីលង្កាក្នុងទីក្រុងកូឡុំបូបាននិយាយថាមានតែផ្នែកសង្គ្រោះបន្ទាន់ប៉ុណ្ណោះកំពុងដំណើរការព្យាបាលខណៈការណាត់ជួបត្រូវបានលុបចោលទាំងអស់នៅតាមគ្លីនិកឯកជននិងមន្ទីរពេទ្យនានា។
បុគ្គលិកអគ្គិសនីនិងបុគ្គលិកធនាគារក៏បានធ្វើកូដកម្មផងដែរ ខណៈកម្មករកំពង់ផែបានធ្វើការតវ៉ានៅម៉ោងអាហារថ្ងៃត្រង់នៅឯកំពង់ផែនៃរដ្ឋធានី។
លោកវីកក្រេមេស៊ីងបានប្រើអំណាចប្រតិបត្តិរបស់គាត់កាលពីថ្ងៃអង្គារទី២៨កុម្ភៈដើម្បីដាក់ឱ្យខុសច្បាប់ជាធរមានលើកូដកម្មនានាដោយបង្ខំឱ្យ “សេវាកម្មសំខាន់ៗ” នៅបន្តដំណើរការ ហើយបុគ្គលិករដ្ឋាភិបាលដែលប្រឆាំងនឹងបទបញ្ជានេះ នឹងប្រឈមបាត់បង់ការងារ។
ក្រុមមេដឹកនាំសហជីពបាននិយាយថា ពួកគេត្រូវបានប្រាប់ដោយលោកវីក្រេមេស៊ីងកាលពីថ្ងៃសៅរ៍ថា គាត់មិនអាចកាត់បន្ថយពន្ធលើប្រាក់ចំណូលបានទេ ព្រោះវាជាលក្ខខណ្ឌរបស់ IMF ក្នុងការបញ្ចេញកញ្ចប់ថវិកាសង្គ្រោះ។
លោកហារីថា អាលូតហ្គេ (Haritha Aluthge) មកពីសមាគមមន្ត្រីពេទ្យរដ្ឋាភិបាល បានប្រាប់អ្នកយកព័ត៌មាននៅទីក្រុងកូឡុំបូថា សហជីពរបស់គាត់គ្រោងនឹងបន្តកូដកម្មការងាររបស់ខ្លួន។
លោកបាននិយាយថា “ការតវ៉ាតែមួយថ្ងៃនឹងមិនរំខានដល់អាជ្ញាធរទេ។ យើងត្រូវតែចាត់វិធានការឱ្យខ្លាំងជាងនេះ”។
ប្រទេសស្រីលង្កាបានស្វែងរកជំនួយពីIMF បន្ទាប់ពីអស់លទ្ធភាពសងបំណុលរដ្ឋាភិបាលបរទេសចំនួន៤៦ ពាន់លានដុល្លារកាលពីខែមេសាឆ្នាំមុន ប៉ុន្តែកំពុងរង់ចាំការធានាផ្នែកហិរញ្ញវត្ថុពីប្រទេសចិន ដែលជាម្ចាស់បំណុលទ្វេភាគីដ៏ធំបំផុតរបស់ខ្លួនថា ខ្លួនសុខចិត្តបន្ថយអត្រាការប្រាក់កម្ចីដល់ប្រជាជាតិអាស៊ីខាងត្បូងមួយនេះ។
វិបត្តិសេដ្ឋកិច្ចមិនធ្លាប់មានពីមុនមករបស់ស្រីលង្កាចាប់តាំងពីចុងឆ្នាំ ២០២១ បានបណ្តាលឱ្យមានការខ្វះខាតស្បៀងអាហារ ប្រេងឥន្ធនៈ និងថ្នាំពេទ្យយ៉ាងធ្ងន់ធ្ងរ ហើយនាំឱ្យមានការតវ៉ាជាច្រើនខែដែលបានផ្តួលរំលំប្រធានាធិបតី ហ្គោតាបាយ៉ា រ៉ាចាប៉ាក់សា (Gotabaya Rajapaksa) ក្នុងខែកក្កដា។
លោកវីកក្រេមេស៊ីង ដែលត្រូវបានជ្រើសរើសដោយសភាដើម្បីជំនួសលោករ៉ាចាប៉ាក់សា និយាយថាសេដ្ឋកិច្ចបានធ្លាក់ចុះ១១ ភាគរយកាលពីឆ្នាំមុន ហើយកោះនេះនឹងនៅតែក្ស័យធនរហូតដល់យ៉ាងហោចណាស់ឆ្នាំ ២០២៦។
លោកក៏បានប្រកាសដែរថាប្រទេសនេះមិនមានថវិកាសម្រាប់ផ្តល់ហិរញ្ញប្បទានដល់ការបោះឆ្នោតរដ្ឋបាលមូលដ្ឋាន ដែលគ្រោងធ្វើនៅថ្ងៃទី ៩ ខែមីនា ដោយបង្កឱ្យមានការចោទប្រកាន់ថាលោកកំពុងប្រើប្រាស់វិបត្តិសេដ្ឋកិច្ចដើម្បីរារាំងលទ្ធិប្រជាធិបតេយ្យ៕
កម្មករនិយោជិតស្រីលង្កាបានបន្តធ្វើកូដកម្មដើម្បីតវ៉ាចំពោះផែនការជួយសង្គ្រោះសម្រាប់ប្រទេសកោះក្ស័យធនមួយនេះ។វេជ្ជបណ្ឌិតនៅមន្ទីរពេទ្យជាតិស្រីលង្កាក្នុងទីក្រុងកូឡុំបូបាននិយាយថាមានតែផ្នែកសង្គ្រោះបន្ទាន់ប៉ុណ្ណោះកំពុងដំណើរការព្យាបាលខណៈការណាត់ជួបត្រូវបានលុបចោលទាំងអស់នៅតាមគ្លីនិកឯកជននិងមន្ទីរពេទ្យនានា។