ដោយ៖ សុវណ្ណកុម្ភៈ/ភ្នំពេញ៖ កីឡាចំនួន១៦ប្រភេទ ក្នុងចំណោម៣៧ប្រភេទកីឡា ដែលដាក់ឱ្យប្រកួតក្នុងស៊ីហ្គេមឆ្នាំ២០២៣នេះ នឹងត្រូវផលិតដោយអ្នកជំនាញការផលិតឯកទេសអន្តរជាតិ ដើម្បីពង្រឹងដល់ការផ្សព្វផ្សាយក្នុងព្រឹត្តិការណ៍ជាប្រវត្តិសាស្ត្រ លើកដំបូង នៅកម្ពុជានេះ។នេះជាការឲ្យដឹងពីលោក វ៉ាត់ ចំរើន ជាអគ្គលេខាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ (CAMSOC) និងជាអគ្គលេខាធិការគណៈកម្មការជាតិអូឡាំពិកកម្ពុជា (NOCC) ក្នុងពេលដែលលោក និងលោក ផុស សុវណ្ណ ប្រតិភូរាជរដ្ឋាភិបាល ទទួលបន្ទុក អគ្គនាយកព័ត៌មាន និងសោតទស្សន៍នៃក្រសួងព័ត៌មាន និងជាប្រធានគណៈកម្មការព័ត៌មាន និងផ្សព្វផ្សាយ និងគណៈកម្មការហ្គេមព័ត៌មានវិទ្យា នៃ CAMSOC នាកិច្ចប្រជុំ ថ្ងៃទី១ ខែមីនា នៅពហុកីឡដ្ឋានជាតិ មរតកតេជោ រាជធានីភ្នំពេញ។
លោកបន្តថា បន្ទាប់ពីបែងចែក១៦ប្រភេទកីឡាទៅឱ្យអ្នកឯកទេសអន្តរជាតិ ដូច្នេះនៅសល់២១ប្រភេទកីឡាទៀត គឺលោក ផុស សុវណ្ណ នឹងដឹកនាំក្នុងការបែងចែកទៅកាន់ស្ថានីយ៍ទូរទស្សន៍ផ្សេងៗឱ្យចូលរួមជួយផលិត។ បន្ទាប់ពីធ្វើការបែងចែក និងស្វែងរកចំណុចខ្វះខាតកម្ពុជាក៏សម្រេចបាននូវលទ្ធផលល្អមួយគឺការស្រុះស្រួលគ្នាក្នុងការជួយជ្រោមជ្រែងពីសំណាក់អ្នកពាក់ព័ន្ធដើម្បីបំផ្ទុះព្រឹត្តិការណ៍ដ៏អស្ចារ្យជាប្រវត្តិសាស្ត្រគឺ ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះលើកដំបូងនេះ។
លោកអគ្គលេខាធិការ CAMSOC បន្ថែមទៀតថាមជ្ឈមណ្ឌលផ្សាយផ្ទាល់ IBC នឹងចាប់ផ្ដើមទទួលការងាររៀបចំ និងការងារផ្សព្វផ្សាយនេះ ចាប់ពីថ្ងៃទី១៥ ខែមេសា ឆ្នាំ២០២៣ តទៅ ហើយការផ្សាយផ្ទាល់ដំបូងគេ នឹងធ្វើឡើង នៅពហុកីឡដ្ឋានជាតិ នាថ្ងៃទី២៩ ខែមេសា គឺការប្រកាសបើកការប្រកួតកីឡាបាល់ទាត់ដំបូងគេ៕/R
