ដោយ៖ សុវណ្ណកុម្ភៈ/ភ្នំពេញ៖ ម្ចាស់មេដាយសំរិទ្ធ នៃព្រឹត្តិការណ៍ការប្រកួតកីឡាប៉េតង់ពិភពលោក ២០២២ “The World Championship Single, Doubles and Mixed Doubles 2022” នៅប្រទេសដាណឺម៉ាក ទទួលបានប្រាក់រង្វាន់ លើកទឹកចិត្តពីរដ្ឋាភិបាលចំនួន ៤៥ លានរៀលកាលពីថ្ងៃទី១ មីនាម្សិលមិញនេះ។
លោក អ៊ុក សិទ្ធិជាតិ អគ្គនាយក នៃអគ្គនាយកដ្ឋានកីឡា និង លោក ស៊ុម សុជាតិ អនុប្រធាន សហព័ន្ធកីឡាប៊ូល និងប៉េតង់កម្ពុជា នាំយកប្រាក់រង្វាន់ លើកទឹកចិត្ត ជូនដល់គ្រូបង្វឹក និងកីឡាករ ទទួលបានជ័យលាភី ។
ការចូលរួមប្រកួតជើងឯកពិភពលោក ឆ្នាំ២០២២ ដឹកនាំដោយលោកគ្រូ អ៊ុក យ៉ារី និងកីឡាករ ភាព វ៉ាឃីម និងកីឡាករ ពុធ យ៉ុនច័ន្ទដារ៉ា ទទួលប្រាក់រង្វាន់លើកទឹកចិត្តក្នុងមួយម្នាក់ចំនួន ១៥ លានរៀល ការប្រកួត The World Championship Single, Doubles and Mixed Doubles 2022 បានព្រឹត្តទៅនៅថ្ងៃទី១២ ដល់ថ្ងៃទី១៥ ខែឧសភា ឆ្នាំ២០២២ ដែលមាន ៤០ប្រទេសចូលរួម ស្មើនឹង៤១ក្រុម (ម្ចាស់ផ្ទះ ពីរក្រុម) ប្រកួតលើ ប្រាំវិញ្ញាសា ។ ព្រឹត្តិការណ៍នេះកម្ពុជាបានចាត់បញ្ជូនប្រតិភូមួយរូប គ្រូបង្វឹកពីររូប កីឡាការិនីពីររូប និងកីឡាករពីររូប សរុបប្រាំពីររូប។ ជាលទ្ធផលកម្ពុជាទទួលបានជ័យលាភីមេដាយសំរិទ្ធមួយគ្រឿង លើវិញ្ញាសាបុរស ពីរទល់ពីរ ដោយកីឡាករ ភាព វ៉ាឃីម និង កីឡាករ ពុធយ៉ុន ច័ន្ទដារ៉ា ៕/R