ប្រែសម្រួល : កញ្ញាដាលីស (ស្ត្រេតថែមស៍) ៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីមកាលពីថ្ងៃពុធទី១មីនាបានប្តេជ្ញានៅទីក្រុងម៉ានីលថានឹងបន្តកិច្ចខិតខំប្រឹងប្រែងដើម្បីជួយសម្រួលដល់ដំណើរការស្វែងសន្តិភាពនៅកោះមីនដាណាវ (Mindanao)របស់ហ្វីលីពីនដែលសំបូរជនមូស្លីមរស់នៅច្រើននិងមានការបះបោរប្រឆាំងរដ្ឋាភិបាលជាយូរមកហើយ។
មេដឹកនាំម៉ាឡេស៊ី ដែលបានទៅដល់ទីក្រុងម៉ានីលនៅព្រឹកថ្ងៃពុធ គឺជាប្រមុខរដ្ឋាភិបាលដំបូងគេដែលធ្វើទស្សនកិច្ចនៅប្រទេសហ្វីលីពីន ចាប់តាំងពីប្រធានាធិបតីហ្វែរឌីណង់ ម៉ាកូស ជូនៀ (Ferdinand Marcos Jr) បានឡើងកាន់អំណាចក្នុងខែមិថុនា ឆ្នាំ ២០២២។
លោកអាន់វ៉ាបាននិយាយថា លោកម៉ាកូសបាន “បោះជំហានដ៏អស្ចារ្យ” ក្នុងការជំរុញដំណើរការសន្តិភាពនៅកោះមីនដាណាវភាគខាងត្បូងប្រទេសហ្វីលីពីនជាតំបន់មួយដែលត្រូវបានញាំញីដោយភាពក្រីក្រនិងអំពើហិង្សាបំបែកខ្លួនជាយូរមកហើយ។
លោកបាននិយាយថា ជោគជ័យរបស់ហ្វីលីពីននឹងផ្តល់នូវ “សក្តានុពលដ៏សម្បើម” ដើម្បីផ្តល់ប្រយោជន៍ដល់ប្រជាជនហ្វីលីពីននិងម៉ាឡេស៊ីផងដែរ។
លោកអាន់វ៉ាបាននិយាយថា “ខ្ញុំគិតថាវាគ្រាន់តែជាកាតព្វកិច្ចរបស់យើងក្នុងនាមជាអ្នកជិតខាងល្អប៉ុណ្ណោះក្នុងការគាំទ្រនិងសម្រួលដល់ដំណើរការសន្តិភាពហើយខ្ញុំគាំទ្រគ្រប់កិច្ចការដែលត្រូវធ្វើនៅកម្រិតទ្វេភាគី ពហុភាគី ដើម្បីគាំទ្រដល់កិច្ចខិតខំប្រឹងប្រែងនេះ”។
ពីឆ្នាំ ២០០១ ដល់ឆ្នាំ ២០១២ ម៉ាឡេស៊ីបានបម្រើការជាអ្នកសម្រុះសម្រួលក្នុងការចរចារវាងរដ្ឋាភិបាលហ្វីលីពីននិងក្រុមឧទ្ទាមមូស្លីមនៃរណសិរ្សរំដោះអ៊ីស្លាមម៉ូរ៉ូ។កិច្ចពិភាក្សានេះទីបំផុតបាននាំទៅដល់ការបង្កើតតំបន់ស្វយ័តបាងសាម៉ូរ៉ូ (Bangsamoro) ក្នុងឆ្នាំ ២០១៩។
លោកអាន់វ៉ា ដែលបានក្លាយជានាយករដ្ឋមន្ត្រីក្នុងខែវិច្ឆិកា ឆ្នាំ ២០២២បាននិយាយថាម៉ាឡេស៊ីនឹងបន្តផ្តល់ជំនួយដល់ប្រជាជននៃតំបន់ស្វយ័តបាងសាម៉ូរ៉ូតាមរយៈគម្រោងការកសាងសមត្ថភាពផ្សេងៗ។ ទាំងនេះរួមបញ្ចូលកម្មវិធីសហប្រតិបត្តិការបច្ចេកទេសម៉ាឡេស៊ី ដែលអនុញ្ញាតឱ្យប្រទេសនេះចែករំលែកបទពិសោធន៍និងជំនាញអភិវឌ្ឍន៍របស់ខ្លួនជាមួយប្រទេសកំពុងអភិវឌ្ឍន៍ដូចជាហ្វីលីពីនជាដើម។
លោកម៉ាកូសបានថ្លែងអំណរគុណដល់ម៉ាឡេស៊ីសម្រាប់ “ការរួមចំណែកដ៏អស្ចារ្យ” របស់ខ្លួននៅក្នុងដំណើរការសន្តិភាពនៅភាគខាងត្បូងប្រទេសហ្វីលីពីន។
លោកបានបន្ថែមថា “យើងសង្ឃឹមថាការគាំទ្រ ដែលពួកគេបានបង្ហាញក្នុងរយៈពេលប៉ុន្មានឆ្នាំចុងក្រោយនេះ នឹងបន្តរួមចំណែកដល់ភាពជោគជ័យនៃដំណើរការសន្តិភាពនិងការបង្កើតតំបន់ស្វយ័តបាងសាម៉ូរ៉ូ”៕
នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម និងប្រធានាធិបតីហ្វីលីពីន ម៉ាកូសត្រួតពលកាលពីថ្ងៃទី ១ ខែមីនា ឆ្នាំ ២០២៣