ប្រែសម្រួលៈបំណង(ដេល្លីម៉េល)៖ការិយាល័យស៊ើបអង្កេតសហព័ន្ធអាម៉េរិកហៅកាត់ថា FBIបានវាយតំលៃថា ការលិចធ្លាយមេរោគណាមួយចេញពីមន្ទីរពិសោធន៍នៅទីក្រុងអ៊ូហាននៅភាគកណ្តាលចិន ទំនងជាបានបង្កការឆ្លងរាលដាលជំងឺកូវីដ១៩ នេះបើតាមការបញ្ជាក់អះអាងពីនាយកFBIលោក គ្រីស្តូហ្វឺ ហ្វ្រេ(Christopher Wray)កាលពីថ្ងៃអង្គារ តែកាលពីថ្ងៃពុធចិនបាននិយាយថា«ទោះជាយ៉ាងម៉េចក៏ដោយ ការអះអាងនេះគ្មានភាពគួរអាចជឿបានសោះ»។
លោកហ្វ្រេបានប្រាប់សារព័ត៌មានFox Newsថា « FBIបានប្រើពេលមួយរយៈធំ ហើយឥឡូវវាយតំលៃថាប្រភពដើមនៃជំងឺឆ្លងនេះទំនងបំផុតចេញពីឧបទ្ទវហេតុក្នុងកន្លែងពិសោធន៍មួយនៅក្រុងអ៊ូហាន»។
ការអះអាងរបស់លោកកើតឡើងបន្ទាប់ពីរបាយការណ៍មួយក្នុងសារព័ត៌មានWall Street Journalកាលពីថ្ងៃអាទិត្យបាននិយាយថា ក្រសួងថាមពលអាម៉េរិកបានវាយតំលៃជាមួយនឹងជំនឿចិត្តទាបថា ជំងឺឆ្លងបណ្តាលកូវីដអាចមកពីការលិចធ្លាយមេរោគចេញពីកន្លែងពិសោធន៍មួយនៅចិន។
Journalបានបន្តថា ទោះជាយ៉ាងណាទីភ្នាក់ងារបួនទៀត រួមមានគណៈកម្មាធិការស៊ើបការណ៍ជាតិនៅតែវិនិច្ឆ័យថា ជំងឺឆ្លងនេះទំនងជាចេញមកពីការចម្លងតាមធម្មជាតិនិងទីភ្នាក់ងារពីរទៀតនៅមិនទាន់សំរេចចិត្តនៅឡើយទេ។
ចំណែកអ្នកនាំពាក្យសន្តិសុខជាតិសេតវិមានលោក ចន ឃឺប៊ី បាននិយាយកាលពីថ្ងៃចន្ទថា រដ្ឋាភិបាលអាម៉េរិកនៅមិនទាន់ឈានដល់ការសន្និដ្ឋានចុងក្រោយណាមួយឬក៏សំរេចបានការមូលមតិគ្នាណាមួយអំពីប្រភពនៃជំងឺកូវីដនេះនៅឡើយទេ។
កាលពីថ្ងៃពុធ ចិនបានថ្កោលទោសការអះអាងរបស់លោក ហ្វ្រេ និងប្រឆាំងដាច់ខាត«ល្បិចកលនយោបាយ»ក្នុងទំរង់ណាមួយពាក់ព័ន្ធនឹងប្រភពជំងឺនេះ។អ្នកនាំពាក្យក្រសួងការបរទេសចិនលោកស្រីម៉ៅ និញ បានប្រាប់អ្នកយកព័ត៌មាននៅក្រុងប៉េកាំងថា «ផ្អែកលើកំណត់ត្រាឆបោកដ៏អន់និងការបំភាន់របស់សហគមន៍ស៊ើបការណ៍អាម៉េរិក ការសន្និដ្ឋាននេះមិនទទួលបានការគួរអោយជឿទុកចិត្តទេ។…យើងទទូចសុំអោយភាគីអាម៉េរិកគោរពវិទ្យាសាស្ត្រនិងការពិត»ផង៕
នាយកFBIបាននិយាយថា រដ្ឋាភិបាលចិនបានខិតខំអស់ពីសមត្ថភាពខ្លួនដើម្បីរារាំងនិងបិទបាំងដល់ការងាររបស់អាម៉េរិកនិងអង្គការដទៃៗដើម្បីយល់ដឹងអំពីប្រភពជំងឺកូវីដ១៩