ប្រែសម្រួល : កញ្ញាដាលីស (ដេល្លីម៉េល) ៖ មន្ត្រីក្រសួងការពារជាតិអាម៉េរិកកំពូលមួយរូបបានព្រមានកាលពីថ្ងៃអង្គារទី២៨កុម្ភៈថាអ៊ីរ៉ង់អាចផលិតវត្ថុធាតុដើមគ្រប់គ្រាន់សម្រាប់គ្រាប់បែកនុយក្លេអ៊ែរមួយគ្រាប់ក្នុងរយៈពេលប្រហែល ១២ ថ្ងៃ ដែលជាថយចុះយ៉ាងខ្លាំងពីការប៉ាន់ប្រមាណរយៈពេលមួយឆ្នាំដែលប្រទេសនេះអាចផលិតបានមួយគ្រាប់ ខណៈកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ចូលជាធរមាន។
អនុរដ្ឋមន្ត្រីការពារជាតិទទួលបន្ទុកគោលនយោបាយលោក ខូលីន កាល់ (Colin Kahl) បានធ្វើអត្ថាធិប្បាយបែបនេះទៅកាន់សវនាការរបស់សភាតំណាងរាស្ត្រនៅពេលសួរថាហេតុអ្វីបានជារដ្ឋបាលរបស់ប្រធានាធិបតីអាម៉េរិក ចូ បៃដិន ព្យាយាមស្តារឡើងវិញនូវកិច្ចព្រមព្រៀងផែនការសកម្មភាពគ្រប់ជ្រុងជ្រោយរួម (JCPOA) ។
“ពីព្រោះការរីកចម្រើនខាងនុយក្លេអ៊ែររបស់អ៊ីរ៉ង់ចាប់តាំងពីយើងចាកចេញពី JCPOA គឺគួរឱ្យកត់សម្គាល់។ ត្រឡប់ទៅឆ្នាំ ២០១៨ នៅពេលរដ្ឋបាលមុនបានសម្រេចចិត្តចាកចេញពី JCPOA អ៊ីរ៉ង់នឹងចំណាយពេលប្រហែល ១២ ខែដើម្បីផលិតគ្រាប់បែកនុយក្លេអ៊ែរមួយគ្រាប់ពីវត្ថុធាតុដើមហ្វីសស៊ីល (Fissile)”។
សារធាតុ Fissile គឺជាវត្ថុធាតុដើមមួយមានសមត្ថភាពទ្រទ្រង់ប្រតិកម្មខ្សែសង្វាក់នុយក្លេអ៊ែរ ដូចសារធាតុអ៊ុយរ៉ាញ៉ូមមួយចំនួនដែរ។ លោកកាល់ជាមន្ត្រីជាន់ខ្ពស់ទីបីនៅក្នុងក្រសួងការពារជាតិអាម៉េរិកបានប្រាប់សមាជិកសភាថា “ឥឡូវនេះអ៊ីរ៉ង់នឹងចំណាយពេលប្រហែល ១២ ថ្ងៃគឺគ្រាប់គ្រាន់ដើម្បីផលិតគ្រាប់”។
លោកបានបន្ថែមថា “ដូច្នេះហើយ ខ្ញុំគិតថានៅតែមានទស្សនៈថា ប្រសិនបើអ្នកអាចដោះស្រាយបញ្ហានេះបានតាមរយៈការទូតនិងដាក់ចេញឧបសគ្គលើកម្មវិធីនុយក្លេអ៊ែររបស់ពួកគេវិញ វានឹងប្រសើរជាងជម្រើសផ្សេងទៀត។ ប៉ុន្តែឥឡូវនេះ JCPOA កំពុងបង្កកចោល”៕
អនុរដ្ឋមន្ត្រីការពារជាតិទទួលបន្ទុកគោលនយោបាយលោក ខូលីន កាល់