ប្រែសម្រួល:កញ្ញាដាលីស(ស្ត្រេតថែមស៍)៖ការភ័យខ្លាចឆ្លងកូវីដខ្លាំងពេកបានបណ្តាលឱ្យស្ត្រីម្នាក់នៅប្រទេសឥណ្ឌាសម្រេចចិត្តចាក់សោឃុំខ្លួនឯងនិងកូនប្រុសតូចរបស់នាងនៅក្នុងផ្ទះអស់រយៈពេលបីឆ្នាំ។
រឿងនេះទើបតែបែកធ្លាយកាលពីថ្ងៃទី១៧ កុម្ភៈ ពេលប្តីទៅប្តឹងសមត្ថកិច្ចឱ្យជួយ។
ប៉ូលិសនិងមន្ត្រីមកពីមន្ទីរសុខាភិបាលនិងសុខុមាលភាពកុមារបានទៅផ្ទះក្នុងទីក្រុងគូរូហ្គ្រាម (Gurugram) ភាគនិរតីនៃទីក្រុងញូវដេល្លី ហើយបានទម្លុះទ្វារខាងមុខដើម្បីជួយសង្គ្រោះម្តាយឈ្មោះ ម៉ាន់ម៉ាន់ ម៉ាជី (Munmun Majhi) និងកូនប្រុសអាយុ ១១ ឆ្នាំរបស់នាង។
ប៉ូលិសបាននិយាយថា នាងម៉ាជីអាយុ ៣៣ ឆ្នាំបានចាក់សោឃុំខ្លួនឯងនិងកូនប្រុសនៅតែក្នុងផ្ទះល្វែងដែលមានបន្ទប់គេងពីររបស់ពួកគេ ដោយសារតែភ័យខ្លាចថា កូនប្រុសនឹងស្លាប់”ភ្លាមៗនៅពេលដែលរូបគេចេញពីផ្ទះ”។
រូបភាពពីប្រព័ន្ធផ្សព្វផ្សាយឥណ្ឌានិងបណ្តាញសង្គមបានបង្ហាញគំនរសម្លៀកបំពាក់ សំរាម និងគ្រឿងទេសពាសពេញផ្ទះ។
ជំនួយការអធិការរង លោក ប្រាវីន កុមារ (Praveen Kumar)បាននិយាយថា “ផ្ទះដែលស្ត្រីនោះរស់នៅមានសំរាមនិងកខ្វក់ខ្លាំងណាស់ ហើយប្រសិនបើទុកតែអ៊ីចឹងតែប៉ុន្មានថ្ងៃទៀតនោះរឿងអាក្រក់អាចនឹងកើតឡើង”។
ស្ថានភាពនេះបានចាប់ផ្តើមនៅពេលដែលប្តីរបស់នាងម៉ាជី គឺលោក ស៊ូចាន ម៉ាជី (Sujan Majhi) បានទៅធ្វើការ បន្ទាប់ពីការដកការរឹតបន្តឹងការបិទខ្ទប់ក្នុងឆ្នាំ ២០២០។ នៅពេលគាត់ត្រឡប់មកផ្ទះវិញ គាត់មានការភ្ញាក់ផ្អើលដែលដឹងថាគាត់ត្រូវបានចាក់សោមិនអាចចូលផ្ទះរបស់គាត់បាន។
ដោយគិតថាស្ថានភាពបែបនេះគ្រាន់តែមានលក្ខណៈបណ្តោះអាសន្ន លោកម៉ាជី ដែលធ្វើការជាវិស្វករ បានទៅស្នាក់នៅជាមួយសាច់ញាតិនិងមិត្តភក្តិ មុនពេលជួលផ្ទះល្វែងមួយនៅជិតផ្ទះរបស់គាត់។
ពេញរយៈពេលបីឆ្នាំមកនេះ គាត់បានប្រាស្រ័យទាក់ទងជាមួយគ្រួសារគាត់តែតាមរយៈការហៅជាវីដេអូប៉ុណ្ណោះ។
គាត់បានបន្តបង់ថ្លៃជួលនិងបង់ថ្លៃទឹកភ្លើងក្នុងផ្ទះអាពាហ៍ពិពាហ៍របស់គាត់ និងទិញគ្រឿងទេសនិងបន្លែ ដែលគាត់ទុកនៅខាងក្រៅទ្វារ។
គាត់ថែមទាំងបន្តបង់ថ្លៃសាលារបស់កូនប្រុសគាត់ទៀតផង បើទោះបីជាកូនប្រុសនោះអវត្តមានយូរក៏ដោយ។
លោកម៉ាជីបានស្វែងរកជំនួយពីឪពុកម្តាយនិងសាច់ញាតិដើម្បីបញ្ចុះបញ្ចូលប្រពន្ធរបស់គាត់ឱ្យឈប់ខ្លាចកូវីដ ប៉ុន្តែមិនបានជោគជ័យ ដូច្នេះគាត់បានដាក់ពាក្យបណ្តឹងទៅប៉ូលិសឱ្យជួយតែម្តង នេះបើយោងតាមកាសែត The Indian Express៕
សមត្ថកិច្ចឥណ្ឌាយកក្មេងប្រុសនិងម្តាយចេញពីផ្ទះទៅកាន់មន្ទីរពេទ្យ