ប្រែសម្រួល : កញ្ញាដាលីស (ដេល្លីម៉េល) ៖ ប៉ូលិសនិយាយថា ខ្មាន់កាំភ្លើងបានគំរាមតារាបាល់ទាត់អាហ្សង់ទីន លីអូនែល ម៉េសស៊ី នៅក្នុងសារជាលាយលក្ខណ៍អក្សរមួយកាលពីថ្ងៃព្រហស្បតិ៍ទី២មីនា នៅពេលដែលពួកគេបើកការបាញ់ប្រហារទៅលើផ្សារទំនើបមួយ ដែលគ្រប់គ្រងដោយសាច់ថ្លៃរបស់គាត់នៅប្រទេសអាហ្សង់ទីន។
គ្មាននរណាម្នាក់រងរបួសក្នុងការវាយប្រហារទាំងព្រឹកនោះទេ ហើយគេមិនទាន់ដឹងច្បាស់ទេថាតើហេតុអ្វីបានជាជនវាយប្រហារដាក់គោលដៅលើផ្សារទំនើប Unico ក្នុងទីក្រុងរ៉ូសារីយ៉ូ (Rosario) ជាក្រុងធំជាងគេទីបីរបស់ប្រទេសនេះ ដែលគ្រប់គ្រងដោយក្រុមគ្រួសាររបស់ភរិយាគាត់ ឈ្មោះ អានតូនែលឡា រ៉ុកគូសហ្សូ (Antonella Roccuzzo)។
អភិបាលក្រុងលោក ប៉ាប្លូ ចាវគីន (Pablo Javkin)បានចុះទៅផ្សារទំនើបនេះហើយបានពន្លះអាជ្ញាធរសហព័ន្ធជុំវិញអ្វីដែលលោកហៅថាបរាជ័យរបស់ពួកគេក្នុងការទប់ស្កាត់ការកើនឡើងអំពើហិង្សាទាក់ទងនឹងគ្រឿងញៀននៅទីក្រុងរ៉ូសារីយ៉ូ ដែលមានចម្ងាយប្រមាណ ៣០០ គីឡូម៉ែត្រពីភាគពាយព្យនៃរដ្ឋធានីប៊ុយណូស៊ែរ។
ប៉ូលិសបាននិយាយថា បុរសពីរនាក់បានជិះម៉ូតូបាញ់រះជាង១០គ្រាប់នៅឯសាខាផ្សារទំនើប Unico ទាំងព្រលឹមអុរ ដោយបន្សល់ទុកសារមួយសរសេរលើផ្ទាំងបដាថា “ម៉េសស៊ី ពួកយើងកំពុងរង់ចាំឯង។ ចាវគីនក៏ជាអ្នកជួញដូរគ្រឿងញៀនដែរ ដូច្នេះគាត់នឹងមិនមើលថែឯងទេ”។
ម៉េសស៊ីមិនបានធ្វើអត្ថាធិប្បាយទេ។ ត្រូវបានចាត់ទុកជាកីឡាករបាល់ទាត់ដ៏អស្ចារ្យបំផុតគ្រប់ពេលវេលា ម៉េសស៊ីត្រូវបានគោរពដូចព្រះនៅក្នុងប្រទេសអាហ្សង់ទីនជាពិសេសចាប់តាំងពីគាត់បានដឹកនាំក្រុមជម្រើសជាតិឈ្នះវើលខាប់លើកដំបូងក្នុងរយៈពេល៣៦ឆ្នាំនៅប្រទេសកាតាកាលពីខែធ្នូ៕
ផ្សារទំនើប Unico របស់សាច់ថ្លៃម៉េសស៊ីក្នុងទីក្រុងរ៉ូសារីយ៉ូត្រូវបានបាញ់ប្រហារកាលពីថ្ងៃព្រហស្បតិ៍