ប្រែសម្រួលៈបំណង(ដេល្លីម៉េល)៖ ទាហានអាម៉េរិករាប់ពាន់នាក់កំពុងចូលរួមជាមួយទាហានថៃនិងកូរ៉េខាងត្បូងនៅលើឆ្នេរថៃមួយកាលពីថ្ងៃសុក្រទី៣មីនាសំរាប់ការធ្វើសមយុទ្ធយោធាប្រចាំឆ្នាំទ្រង់ទ្រាយធំបំផុតមួយនៅអាស៊ី។
ឥឡូវចូលដល់ឆ្នាំទី៤២ហើយ ដែលសមយុទ្ធ”ពស់វែកមាស»បាននាំកងកម្លាំងរាប់ពាន់នាក់មកពីអាម៉េរិក ថៃ និងប្រទេសដទៃទៀតមកធ្វើការហ្វឹកហាត់រួមគ្នានៅពេលរដ្ឋាភិបាលទីក្រុងវ៉ាស៊ីនតោនបានព្យាយាមពង្រឹងសម្ពន្ធភាពយោធានៅក្នុងតំបន់ក្នុងពេលប្រឈមមុខជាមួយចិន។
ទាហានអាម៉េរិក ថៃនិងកូរ៉េខាងត្បូងធ្វើប្រតិបត្តិការវាយឡើងគោករួមគ្នានៅក្បែរមូលដ្ឋានទ័ពមួយនៅខាងកើតប្រទេសថៃ ដោយយន្តហោះប្រយុទ្ធហោះពីលើនិងរថក្រោះបញ្ចេញសម្លេងរោទិ៍លើដី។ទាហានទៅពីសិង្ហបុរី ឥណ្ឌូនេស៊ី ម៉ាឡេស៊ី កូរ៉េខាងត្បូងនិងជប៉ុន ក៏ចូលរួមក្នុងលំហាត់យោធាដែលពង្រីកដល់សមយុទ្ធទ័ពអាកាស ជើងគោក និងសមុទ្រ ព្រមទាំងរបៀបរស់នៅក្នុងព្រៃ។
ទាហានអាម៉េរិកប្រមាណ៦.០០០នាក់ ស្មើនឹងចំនួនទាហានអាម៉េរិកចូលរួមក្នុងសមុទ្រពស់វែកមាសឆ្នាំ២០២២ពីរដង កំពុងចូលរួម។
កាលពីខែមុន សហរដ្ឋអាម៉េរិកនិងហ្វីលីពីន បានយល់ព្រមបន្តការល្បាតរួមគ្នាក្នុងសមុទ្រចិនខាងត្បូងនិងបានចុះកិច្ចព្រមព្រៀងមួយដើម្បីអនុញ្ញាតអោយទាហានអាម៉េរិកចូលប្រើមូលដ្ឋានយោធារបស់ខ្លួនចំនួនបួនទៀតនៅហ្វីលីពីន។
រដ្ឋាភិបាលទីក្រុងសេអ៊ូលនិងវ៉ាស៊ីនតោននៅសប្តាហ៍នេះក៏ប្រកាសបន្តការធ្វើសមយុទ្ធយោធាទ្រង់ទ្រាយធំរួមគ្នា ក្រោយកូរ៉េខាងជើងធ្វើការសាកល្បងកាំជ្រួចក្នុងចំនួនច្រើនបំផុតនៅពេលមួយឆ្នាំមកនេះនិងគំរាមប្រើប្រាស់សព្វាវុធនុយគ្លេអ៊េរលើកូរ៉េខាងត្បូងនិងអាម៉េរិក។
វរសេនីយ៍ឯកទ័ពម៉ារីនអាម៉េរិកលោក ចូណាថាន់ ខូរ៉ូណែល(Jonathan Coronel)បានប្រាប់អ្នកយកព័ត៌មានថា «នៅពេលយើងនិយាយភាសាផ្សេងគ្នា យើងមករួមគ្នាក្នុងផលប្រយោជន៍រួមគឺបន្តស្វែងរកនិងរក្សាតំបន់ឥណ្ឌូប៉ាស៊ីហ្វិកមួយ សេរីនិងបើកចំហ ជាអ្វីដែលសមុទ្ធពស់វែកមាសកំពុងផ្តោត»។
ឆឺងឆៃ ចុមឆឺងផាត(Cherngchai Chomcherngpat)បញ្ជាការកងទ័ពជើងទឹកថៃ បាននិយាយថា«ថៃ អាម៉េរិកនិងកូរ៉េខាងត្បូង ពួកយើងមានកិច្ចសហការល្អមួយនៅក្នុងតំបន់។វាសំខាន់ដែលធ្វើការហ្វឹកហាត់ជាមួយគ្នា…បើមានភាពតានតឹងនៅក្នុងតំបន់ យើងស្គាល់គ្នា»៕
ទាហានរាប់ពាន់នាក់កំពុងចូលរួមសមយុទ្ធពស់វែកមាស រួមមានទាហានអាម៉េរិកប្រមាណ៦.០០០នាក់
