ប្រែសម្រួល : កញ្ញាដាលីស (បាល់ទាត់) ៖ បើកឆាកក្បាលព្រលប់ថ្ងៃសៅរ៍នេះ Man City ត្រូវការឈ្នះដាច់ខាតលើ Newcastle ដើម្បីប្រដេញពិន្ទុជាមួយក្រុមកំពូលតារាងព្រីមញឺលីក Arsenal ដែលរំពឹងឈ្នះងាយៗផងដែរលើ Bournemouth យប់នេះ ហើយទន្ទឹមនេះដែរ Chelsea ដែលកំពុងត្រដាបត្រដួស ត្រូវការឈ្នះដាច់ខាតលើ Leeds ដើម្បីសង្គ្រោះតំណែងរបស់លោក Potter។
ការព្យាករណ៍ ៖
– Manchester City vs Newcastle
* មានគ្រាប់បាល់ធ្លាយទៅវិញទៅមករហូតក្នុង ៦ ប្រកួតនៃការប្រកួត ៨ លើកចុងក្រោយរបស់ Man City។
* ការជួបគ្នា ៥ លើកនៃ ៦ លើកចុងក្រោយរវាងគូនេះមានគ្រាប់បាល់លើស ៣,៥ ។
* Man City ឈ្នះក្នុងផ្ទះទាំង ១៣ លើកចុងក្រោយទល់នឹង Newcastle ក្នុងលីក។
ក្រុមមេឃខៀវ Manchester City មើលទៅហាក់ដណ្តើមលេខ១ពី Arsenal ជាមួយជ័យជម្នះ ៣-១ លើគូប្រជែងកាលពីខែមុន ប៉ុន្តែមេឃខៀវបានជ្រុះពិន្ទុភ្លាមៗជាមួយលទ្ធផល ១-១ ជាមួយ Nottingham ចឹងមានន័យថា ក្រុមកាំភ្លើងធំនៅតែនាំមុខ ២ ពិន្ទុលើកំពូលតារាង និងសល់១ប្រកួតក្នុងដៃ។
ក្រុមរបស់លោក Pep Guardiola បានងើបឡើងវិញជាមួយជ័យជម្នះ ៤-១ លើ Bournemouth កាលពីប្រកួតមុន ហើយជាក្រុមស៊ុតចូលច្រើនជាងគេក្នុងលីក គឺ ៦៤ គ្រាប់ ក្នុងការប្រកួត Premier League ចំនួន ២៥ លើកមកនេះ។ ទោះយ៉ាងណា ពួកគេការពារមិនសូវល្អទេ ដោយរបូតគ្រាប់បាល់នៅ ៦ ប្រកួតនៃការប្រកួតលីក ៨ លើកចុងក្រោយ។
ក្រុមមេឃខៀវនៅតែមានសង្ឃឹមឈ្នះខ្ពស់នៅថ្ងៃនេះ ដោយហេតុថាពួកគេបានឈ្នះសារិកាព្រៃនៅក្នុងផ្ទះទាំង ១៣ លើកចុងក្រោយ។
Newcastle បានឈានដល់វគ្គផ្តាច់ព្រ័ត្រ League Cup លើកដំបូងក្នុងរយៈពេល ២៤ ឆ្នាំកាលពីថ្ងៃអាទិត្យ ប៉ុន្តែបានចាញ់ Manchester United ២-០ ហើយវាប្រហែលជាពិបាកក្នុងការស្តារស្មារតីក្រុមឱ្យល្អឡើងវិញសម្រាប់ជំនួបទល់នឹង Man City ថ្ងៃនេះ។
មួយវិញទៀត សារិកាព្រៃក៏កំពុងអស់ខ្យល់ក្នុងការប្រជែងតំណែងកំពូលទាំង៤ផងដែរ ក្រោយឈ្នះតែម្តងគត់ពី៧ប្រកួតចុងក្រោយ។
លទ្ធផលទស្សនទាយ Man City ឈ្នះ ៣-១។
– Arsenal vs AFC Bournemouth
* Bournemouth បានចាញ់ ៦ ដងក្នុងចំណោម ៨ ប្រកួតប៉ះក្រុមពាក់កណ្តាលតារាងខាងលើ ដោយស៊ុតចូលសូន្យគ្រាប់ក្នុងបរាជ័យទាំង៦នោះ។
* Bournemouth ចាញ់ទាំង ៨ លើកទល់នឹង Arsenal ដោយរបូតដល់ទៅ ២៧ គ្រាប់។
* Bournemouth មានទម្រង់លេងអន់បំផុតនិងការពារអន់បំផុតក្នុង EPL។
* Arsenal បានឈ្នះលើស ៤+ ចំនួន២ដងរួចមកហើយនៅក្នុងទឹកដីនៅរដូវកាលនេះ។
ស្មើគ្នា ២-២ ដោយនៅសល់តែប៉ុន្មាននាទីចប់ការប្រកួតនៅទឹកដី Villa Park ការប្រជែងពានរបស់ Arsenal មើលទៅហាក់ប្រឈមនឹងបញ្ហា។ ការស៊ុតចូលចុងម៉ោង២គ្រាប់ភ្លាមៗបានជួយឱ្យកាំភ្លើងធំឈ្នះវិញ ៤-២ ។ តាំងពីពេលនោះមក កូនក្រុមរបស់លោក Mikel Arteta ខំប្រឹងជាន់១០០ៗមិនឱ្យភ្លាត់ស្នៀតរបូតពិន្ទុទៀតឡើយ។
ក្រុមកាំភ្លើងធំ Arsenal ឥឡូវមាន ៥ ពិន្ទុដាច់នៅលើកំពូលជាថ្មីម្តងទៀត ក្រោយឈ្នះ២ប្រកួតជាប់ៗគ្នា គឺឈ្នះ Leicester និង Everton។
ការប៉ះគ្នានៅថ្ងៃសៅរ៍នេះជាមួយ Bournemouth មើលទៅហាក់ស៊ីផុយជាងពីរប្រកួតមុនទៅទៀត។ នេះជាក្រុមនាំមុខកំពូលតារាងលេងទល់នឹងក្រុមអន់ជាងគេបំផុតនៅក្នុង EPL។ លទ្ធផលថ្ងៃនេះអាចអាណោចអាធ័មសម្រាប់ Bournemouth។
Bournemouth ឈ្នះតែមួយប្រកួតគត់ក្នុងចំណោម ៩ ប្រកួតចុងក្រោយរបស់ពួកគេហើយរបូតគ្រាប់បាល់ខ្ពស់បំផុតនៅ Premier League ក្នុងរដូវនេះ គឺ ៤៨ គ្រាប់។
ខណៈលទ្ធផលកំពុងតែយ៉ាប់ កំណត់ត្រារបស់ពួកគេទល់នឹងក្រុមពាក់កណ្តាលតារាងឡើងទៅរឹតតែជាបញ្ហាធំ។ ពួកគេចាញ់ ៦ ដងក្នុងចំណោម៨ប្រកួតទល់នឹងក្រុមទាំងនោះរួមមានចាញ់ Man City ៤-០ ចាញ់ Man U ៣-០ និង ចាញ់ Liverpool ៩-០។
លទ្ធផលទស្សនទាយ Arsenal ឈ្នះយ៉ាងតិច ៥-០។
– Chelsea vs Leeds
* ៦ ប្រកួតចុងក្រោយរបស់ Chelsea ក្នុង EPL មានគ្រាប់បាល់ក្រោម ៣ ។
* Chelsea រក្សា Clean Sheet ៤ដងនៃការប្រកួតលីក ៦ លើកចុងក្រោយ។
* Leeds ឈ្នះតែ១គត់ក្នុងចំណោម ១២ លើកក្រៅដីក្នុងលីកនៅរដូវកាលនេះ។
* Leeds បានបញ្ចប់ភាពមិនដែលឈ្នះ ១០ ប្រកួតជាប់ៗគ្នាក្នុងលីកជាមួយនឹងការឈ្នះ ១-០ លើ Southampton កាលពីសប្តាហ៍មុន។
បរាជ័យ ២-០ នៅទឹកដី Tottenham កាលពីថ្ងៃអាទិត្យបាននាំឱ្យមានការរំពឹងទុកថា ពេលវេលារបស់លោក Graham Potter នៅកៅអីដ៏ក្តៅជិតឈានដល់ទីបញ្ចប់ ហើយនោះនឹងកាន់តែធ្វើឱ្យក្រុមប្រឹងយកឈ្នះ Leeds ឱ្យខាងតែបាននៅថ្ងៃសៅរ៍នេះ។
ក្រុមតោខៀវខកខានស៊ុតបញ្ចូលទីក្នុង៣ប្រកួតនៃការប្រកួត៤លើកចុងក្រោយក្នុងផ្ទះ ហើយការអត់ធ្មត់ជាមួយអ្នកចាត់ការទូទៅកំពុងជិតអស់ផងដែរ។ ទោះបីពួកគេបានឈ្នះ ៦ លើកនិងចាញ់៣លើកក្នុងផ្ទះនៅរដូវកាលនេះ ប៉ុន្តែការចាញ់២លើកនោះគឺទល់នឹង Arsenal និង Manchester City ហើយចាញ់ ១-០ ទាំងពីរ។
ការចាញ់ ១-០ ទល់នឹងក្រុមអន់ Southampton ក្នុងផ្ទះលើកចុងក្រោយរបស់ពួកគេគឺជាការវាយសំពងដ៏ធំមួយ ហើយពួកគេត្រូវមានភារកិច្ចទុកជើងលេងក្នុង UCL សប្តាហ៍ក្រោយទៀត ប៉ុន្តែលោក Potter សង្ឃឹមថាវានឹងមិនយូរទេទម្រាំក្រុមថ្មីរបស់គាត់លេងសង់តង់គ្នា។
Leeds ត្រូវការជ័យជម្នះនៅទឹកដី Brentford នៅថ្ងៃចុងក្រោយនៃរដូវកាលមុនដើម្បីបញ្ចៀសការធ្លាក់ពីក្របខ័ណ្ឌ Premier League ហើយអ្នកគាំទ្ររបស់ពួកគេសង្ឃឹមថា ពួកគេនឹងមិនជួបបទពិសោធន៍បែកញើសចឹងទៀតទេនៅរដូវកាលនេះ។
អតីតអ្នកចាត់ការទូទៅរបស់ Watford លោក Javi Grocia បានចូលមកដឹកនាំ Leeds ហើយសង្ឃឹមថានឹងកែលម្អក្រុមឡើងវិញ ក្រោយឈ្នះ១គត់ពី១២ប្រកួតនៅក្រៅទឹកដី។
ជ័យជម្នះ ១-០ លើក្រុមដុនដាប Southampton កាលពីសប្តាហ៍មុននឹងផ្តល់ក្តីសង្ឃឹមដល់ពួកគេ ខណៈពួកគេបានបញ្ចប់ភាពមិនដែលឈ្នះ ១០ ប្រកួតជាប់ៗគ្នា ហើយពួកគេនឹងមិនឈឺក្បាលវិលមុខដោយសារតែចាញ់ Fulham ក្នុង FA Cup នោះឡើយ ប៉ុន្តែពួកគេត្រូវតែដណ្តើមពិន្ទុ ប្រសិនបើពួកគេមិនចង់បែកញើសដូចចុងរដូវកាលមុន។
តែកុំរំពឹងខ្ពស់ពេកពីទឹកដីរបស់ Chelsea ដែលកំពុងត្រូវការពិន្ទុយ៉ាងខ្លាំងដើម្បីសង្គ្រោះតំណែងរបស់លោក Potter។
លទ្ធផលទស្សនទាយ Chelsea ឈ្នះ ១-០៕
Manchester City សង្ឃឹមឈ្នះលើទី១៤ ទល់នឹង Newcastle នៅក្បាលព្រលប់នេះ
