ប្រែសម្រួល : កញ្ញាដាលីស (ដេល្លីម៉េល) ៖ សហរដ្ឋអាម៉េរិកបានឆ្លើយតបកាលពីថ្ងៃសុក្រទី៣មីនាចំពោះការព្រមានរបស់រុស្ស៊ីប្រឆាំងនឹងការបំពាក់អាវុធដល់អ៊ុយក្រែនដោយផ្តល់ជំនួយផ្នែកសន្តិសុខចំនួន ៤០០ លានដុល្លារបន្ថែមទៀត ខណៈប្រធានាធិបតី ចូ បៃដិន ធ្វើជាម្ចាស់ផ្ទះទទួលអធិកាបតីអាល្លឺម៉ង់ លោក អូឡាហ្វ សូល ក្នុងការបង្ហាញការរួបរួមប្រឆាំងនឹងរដ្ឋាភិបាលក្រុងមូស្គូ។
ទន្ទឹមនឹងនោះ ប្រធានក្រុមហ៊ុនទាហានស៊ីឈ្នួល Wagnerរបស់រុស្ស៊ីបាននិយាយថា កងកម្លាំងរបស់ខ្លួនបាន “ឡោមព័ទ្ធ” ទីក្រុងបាឃ្មុត (Bakhmut) ភាគខាងកើតអ៊ុយក្រែនដែលបានឃើញការប្រយុទ្ធគ្នាយ៉ាងខ្លាំងក្លាបំផុតនៃការឈ្លានពានរបស់រដ្ឋាភិបាលក្រុងមូស្គូ។
ជំនួយយោធាលោកខាងលិចសម្រាប់អ៊ុយក្រែនគឺជាគន្លឹះនៃសមត្ថភាពរបស់រដ្ឋាភិបាលក្រុងគៀវក្នុងការទប់ទល់នឹងការវាយលុករបស់យោធារបស់រដ្ឋាភិបាលក្រុងមូស្គូនិងថែមទាំងអាចដណ្តើមបានទឹកដីខ្លះមកវិញទៀតផង ប៉ុន្តែវិមានក្រឹមឡាំងនិយាយថា ជំនួយបែបនេះនឹងបានត្រឹមតែ “អូសបន្លាយជម្លោះនិងនាំឱ្យមានផលវិបាកដ៏ក្រៀមក្រំសម្រាប់ប្រជាជនអ៊ុយក្រែនប៉ុណ្ណោះ”។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បាននិយាយថា ការជួយសព្វាវុធ “ដាក់បន្ទុកយ៉ាងសំខាន់លើសេដ្ឋកិច្ចនៃប្រទេសទាំងនេះនិងប៉ះពាល់អវិជ្ជមានដល់សុខុមាលភាពរបស់ពលរដ្ឋនៃប្រទេសទាំងនេះ រួមទាំងអាល្លឺម៉ង់”។
រដ្ឋាភិបាលក្រុងវ៉ាស៊ីនតោនមិនអើពើនឹងការព្រមាននោះទេ ដោយបានប្រកាសកញ្ចប់សន្តិសុខថ្មីសម្រាប់រដ្ឋាភិបាលក្រុងគៀវ ដែលមានគ្រាប់យុទ្ធភ័ណ្ឌ រួមទាំងសម្រាប់ប្រព័ន្ធរ៉ុក្កែត Himarsដែលកងកម្លាំងអ៊ុយក្រែនបានប្រើដើម្បីបំផ្លិចបំផ្លាញកងទ័ព និង ឃ្លាំងគ្រាប់របស់រុស្ស៊ី។
ក្នុងការបង្ហាញភាពជាដៃគូបន្ទាប់ពីការទាស់ទែងគ្នាអំពីការផ្គត់ផ្គង់រថក្រោះដល់អ៊ុយក្រែនលោកបៃដិនបានធ្វើជាម្ចាស់ផ្ទះទទួលលោកសូលនៅសេតវិមានសម្រាប់ទស្សនកិច្ចលើកដំបូងមកកាន់ទីក្រុងវ៉ាស៊ីនតោនចាប់តាំងពីការឈ្លានពានរបស់រុស្ស៊ី។
លោកបៃដិនបាននិយាយនៅក្នុងសុន្ទរកថាខ្លីទៅកាន់អ្នកសារព័ត៌មានថា នៅពេលពួកគាត់ទាំងពីរជួបគ្នាលើកចុងក្រោយ “រុស្ស៊ីកំពុងប្រមូលផ្តុំកងទ័ពរបស់ខ្លួន” នៅតាមព្រំដែន ដោយបន្ថែមថា លោកខាងលិចបានប្តេជ្ញាឆ្លើយតប ហើយ “យើងរួមគ្នាគោរពពាក្យសន្យានោះ”។
ជាការឆ្លើយតប លោកសូលបាននិយាយថា វាជាការសំខាន់ក្នុងការផ្ញើសារទៅកាន់អ៊ុយក្រែនថា “យើងនឹងបន្ត (គាំទ្រពួកគេ) ដរាបណាដែលមានតម្រូវការ និងដរាបណាដែលមានការចាំបាច់”។
អវត្ដមាននៃសន្និសីទសារព័ត៌មានរួមគ្នាបានចោទជាសំណួរអំពីការលំបាកនានាដែលនៅសេសសល់ ប៉ុន្តែមេដឹកនាំទាំងពីរបានព្យាយាមលុបបំបាត់ចំណាប់អារម្មណ៍នោះ ហើយលោកសូលបាននិយាយថា ទំនាក់ទំនងទ្វេភាគីគឺ “ស្ថិតក្នុងស្ថានភាពល្អណាស់”។
នៅក្នុងការបង្ហាញការគាំទ្រមួយផ្សេងទៀតសម្រាប់អ៊ុយក្រែន អគ្គរដ្ឋអាជ្ញាអាម៉េរិកលោក មឺរីក ហ្គាលែន (Merrick Garland) បានធ្វើទស្សនកិច្ចដ៏គួរឱ្យភ្ញាក់ផ្អើលទៅកាន់ប្រទេសអ៊ុយក្រែនកាលពីថ្ងៃសុក្រ ដើម្បីចូលរួមសន្និសីទស្តីពីយុត្តិធម៌និងឧក្រិដ្ឋកម្មសង្គ្រាម។
មន្ត្រីក្រសួងយុត្តិធម៌ម្នាក់និយាយថា “អគ្គរដ្ឋអាជ្ញាបានបើកកិច្ចប្រជុំជាច្រើននិងបញ្ជាក់ឡើងវិញនូវការប្តេជ្ញាចិត្តរបស់យើងក្នុងការចាប់រុស្ស៊ីឱ្យទទួលខុសត្រូវចំពោះឧក្រិដ្ឋកម្មដែលបានប្រព្រឹត្តនៅក្នុងការឈ្លានពានដោយអយុត្តិធម៌និងគ្មានការញុះញង់ប្រឆាំងនឹងអ្នកជិតខាងដែលមានអធិបតេយ្យភាពរបស់ខ្លួន”៕
លោកបៃដិនទទួលលោកសូលនៅសេតវិមានកាលពីថ្ងៃសុក្រ ដោយមិនអើពើនឹងការព្រមានរបស់រុស្ស៊ីអំពីការផ្គត់ផ្គង់អាវុធដល់អ៊ុយក្រែន