ដោយៈ ប.ជ័យ / បន្ទាយមានជ័យៈ ដោយសារយកហេុតផលខឹងនឹងការនិយាយ ត្រឡប់ត្រឡិន ដែលម្តងថា “ឲ្យដីភូមិមកខ្លួន ម្តងថាដកយកវិញ” កូនប្រសាប្រុស បានគុំកួន និងបានធ្វើឃាតម្តាយក្មេក រួចបំរុងឆ្លងដែនទៅថៃ ក៏ប៉ុន្តែត្រូវសមត្ថកិច្ច ចំរុះ ចុះឃាត់ខ្លួនបានភ្លាមៗ ។
សមត្ថកិច្ចអាវុធហត្ថ បានឱ្យដឹងកាលពីថ្ងៃទី៣ ខែមីនា ឆ្នាំ២០២៣ ថាៈ លោកឧត្តម សេនីយ៍ត្រី បោន ប៊ិន មេបញ្ជាការកងរាជអាវុធហត្ថ ខេត្តបន្ទាយមានជ័យ បានសហការ ជាមួយលោកឧត្តមសេនីយ៍ត្រី ឈួន គីមសាន មេបញ្ជាការកងរាជអាវុធហត្ថខេត្តព្រៃវែង ក្នុងនោះមានការសម្របសម្រួល ពីព្រះរាជអាជ្ញា អមសាលាដំបូងខេត្តទាំងពីរ បានឲ្យកម្លាំងជំនាញកងរាជអាវុធហត្ថខេត្ត រួមជាមួយកម្លាំងជំនាញស្នងការដ្ឋានខេត្ត ស្រាវជ្រាវឈានដល់ ការឃាត់ខ្លួនជនសង្ស័យឈ្មោះ សឿង ហ៊ាង ភេទប្រុស អាយុ៣០ឆ្នាំនៅចំណុចបេនឡាន ច្រកឡែម ស្ថិតនៅភូមិអូរដារ ឃុំអូរដា ស្រុកកំរៀង ខេត្តបាត់ដំបង នៅវេលាម៉ោង ៨ យប់ ថ្ងៃទី២ ខែមីនា ឆ្នាំ២០២៣ បន្ទាប់ពីប្រព្រឹត្តកាលពី យប់ ថ្ងៃទី១ ខែមីនា នៅកន្លែងកើតហេតុ មានលំនៅភូមិត្រោកតាប៉ាង ឃុំទឹកថ្លា ស្រុកស្វាយអន្ទរ ខេត្តព្រៃវែង ។
សមត្ថកិច្ចអាវុធហត្ថ បានដកហូតសម្ភារៈ រួមមាន ម៉ូតូម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០១៩ ស្លាកលេខ ព្រៃវែង 1O7180 ក្រវិលលោហធាតុពណ៌លឿង ចំនួន ១គូ ទម្ងន់១ជី ។
សមត្ថកិច្ច បានបន្តថាៈ ផ្អែកតាមការពិនិត្យសាកសព ពីក្រុមជំនាញ គ្រូពេទ្យ បានប្រាប់ ឲ្យដឹងថាៈ សព (ម្ដាយក្មេករបស់ជនសង្ស័យ) មានស្នាមរបួស នៅត្រង់ចំណុចកញ្ចឹងក និងឆ្អឹងខ្នងជាច្រើនកន្លែង ដែលកើតឡើងដោយសារការប្រើកម្លាំងប៉ះទង្គិចធ្វើឲ្យមាន ស្នាមជាំ ផ្នែកនៅនឹង ក យ៉ាងធ្ងន់ធ្ងរ ទើបបណ្ដាលឲ្យស្លាប់ ។ គ្រូពេទ្យជំនាញ បានសន្និដ្ឋានថា ជាករណីឃាតកម្ម បន្ទាប់ពីធ្វើការពិនិត្យចប់ ប្រគល់ សាកសព ជូនក្រុមគ្រួសា យកទៅធ្វើបុណ្យ តាមប្រពៃណី។
ក្រោយពីជំនាញបានចុះស្រាវជ្រាវ នៅកន្លែងកើតហេតុរួចហើយ សមត្ថកិច្ចក៏បានកំណត់មុខសញ្ញាបានថា ជនសង្ស័យ មានឈ្មោះ សឿង ហ៊ាង ភេទប្រុស អាយុ៣០ឆ្នាំ ត្រូវជាកូនប្រសា របស់ជនរងគ្រោះ បន្ទាប់មកសមត្ថកិច្ចជំនាញ កងរាជអាវុធហត្ថខេត្តព្រៃវែង បានសហការជាមួយជំនាញស្នងការស្រាវជ្រាវ និងបង្ក្រាបបទល្មើស កងរាជអាវុធហត្ថលើផ្ទៃប្រទេស ដើម្បីឆែកលេខទូរស័ព្ទរបស់ ជនសង្ស័យ បានឲ្យដឹងថា ជនសង្ស័យ បានគេចចេញពីខេត្តព្រៃវែង មកសម្ងំលាក់ខ្លួនស្នាក់នៅ ក្រុងប៉ោយប៉ែត ខេត្តបន្ទាយមានជ័យ ។
ជនសង្ស័យ ឈ្មោះ សឿង ហ៊ាង បានសារភាពប្រាប់សមត្ថកិច្ចថា ដោយសារខ្លួនខឹងនឹង ម្តាយក្មេក ឈ្មោះ ញ៉ សារ៉េត ថាឲ្យដីភូមិខ្លួន បែរជាមិនឲ្យវិញ ខ្លួនបានល្បួងម្តាយក្មេក ឲ្យជិះម៉ូតូខ្លួន ចេញពីមណ្ឌលសុខភាព បឹងព្រះ ឆ្ពោះមកផ្ទះ លុះបើកមកដល់ចំណុច វាលស្រែ រាងស្ងាត់ រូបគេ ក៏បានឈប់ម៉ូតូ ហើយចាប់ច្របាច់ ក ម្តាយក្មេក បោកទៅនឹងដី បណ្តាលឱ្យស្លាប់តែម្តង ។ ពេលធ្វើសកម្មភាពរួចហើយ ខ្លួនក៏គេចខ្លួនមកស្នាក់នៅក្នុង ក្រុងប៉ោយប៉ែត ខេត្តបន្ទាយមានជ័យ។ តមក ជនសង្ស័យ បានជិះម៉ូតូមកចំណុចបេន ឡានច្រកឡែម បំរុងឆ្លងដែនចេញទៅប្រទេសថៃ ។ ប៉ុន្តែដោយផលកម្មនៃពៀរ ឈាមស្រែកស្បែកហៅ ត្រូវសមត្ថកិច្ចឃាត់ខ្លួនបាន។
សមត្ថកិច្ចអាវុធហត្ថខេត្តបន្ទាយមានជ័យ កាលពីថ្ងៃទី៣ ខែមីនា បានប្រគល់ជនសង្ស័យ ទៅឲ្យសមត្ថកិច្ចអាវុធហត្ថខេត្តព្រៃវែង ដែលជាម្ចាស់ករណីវិញ ដើម្បីយកទៅចាត់ការ តាមច្បាប់៕/V/R
