ប្រែសម្រួល : កញ្ញាដាលីស (gizchina) ៖ ដូចបានរំពឹងទុកក្រុមហ៊ុនចិនHonor បានចូលមកពិព័រណ៍ MWC 2023 នៅទីក្រុងបាសេឡូណា ដើម្បីបង្ហាញពីការច្នៃប្រឌិតថ្មីថ្មោងជាច្រើនរបស់ខ្លួន។ យីហោនេះបានណែនាំស៊េរីទូរស័ព្ទ Honor Magic5 ដោយស្មាតហ្វូន Honor Magic5 Pro ដណ្តើមការចាប់អារម្មណ៍ខ្លាំងជាងគេ។ ទោះជាយ៉ាងណាក៏ដោយ ព្រឹត្តិការណ៍នេះក៏ជាដំណាក់កាលសម្រាប់ស្មាហត្វូន Honor Magic Vs ដើម្បីឈានចូលឆាកអន្តរជាតិផងដែរ។
Honor Magic Vs គឺជាស្មាតហ្វូនដែលអាចបត់បានដំបូងបង្អស់របស់ម៉ាកយីហោនេះ ដើម្បីទៅដល់ដៃអតិថិជនទូទាំងពិភពលោក ហើយនឹងបង្កការគំរាមកំហែងសម្រាប់ស៊េរី Samsung Galaxy Z Fold ។ រហូតមកទល់ពេលនេះ Samsung មិនទាន់ប្រឈមមុខនឹងការប្រកួតប្រជែងច្រើនទេនៅក្នុងប្រភេទទូរស័ព្ទអាចបត់បាន។ ឥឡូវនេះ Honor Magic Vs មានភារកិច្ចយកឈ្នះចិត្តអ្នកប្រើប្រាស់ជាមួយនឹងរូបរាងរចនាដ៏ស្រស់ស្អាត លក្ខណៈពិសេសថ្មីៗ និងបទពិសោធន៍ប្រើល្អប្រសើរជាង ដែលគេមិនអាចប្រកែកបាន។
ទូរស័ព្ទ Honor Magic Vs ភ្ជាប់មកជាមួយលក្ខណៈពិសេសទំនើបៗនិងការរចនាដ៏ប្រណីត។ តាមពិតទៅ ទូរស័ព្ទនេះមានក្រវិលគន្លឹះ ដែលមើលទៅអស្ចារ្យជាងអ្វីដែល Samsung មានជាមួយ Galaxy Z Fold4 របស់ខ្លួនទៅទៀត។ នៅពេលស្ថិតក្នុងស្ថានភាពបត់ ឧបករណ៍នេះមិនមានស្នាមផ្នត់ទេ។ យីហោនេះបានបញ្ជាក់ថា Honor Magic Vs គឺជាឧបករណ៍ដ៏ល្អឥតខ្ចោះសម្រាប់សហគ្រិន ក៏ដូចជាអ្នកដែលដាក់ការកម្សាន្តលើទូរស័ព្ទលើសពីអ្វីៗទាំងអស់។ ឧបករណ៍នេះភ្ជាប់មកជាមួយសំណុំនៃមុខងារកម្មវិធីជាច្រើនដើម្បីបង្កើនផលិតភាព និងធ្វើឱ្យបទពិសោធន៍ការងារចម្រុះលើអេក្រង់កាន់តែប្រសើរឡើង។
Honor Magic Vs មានរូបរាងស្តើងសម្រាប់ទូរស័ព្ទបត់បានបែបនេះ ជាមួយនឹងកម្រាស់ត្រឹមតែ ១២,៩ មិល្លីម៉ែត្រពេលបត់ និង មានទម្ងន់ ២៧៦ ក្រាម។ ត្បិតមានរូបរាងតូចក៏ពិតមែន ប៉ុន្តែឧបករណ៍នេះមានថាមពលថ្ម ៥.០០០ mAh ដែលជាសមត្ថភាពធំបំផុតក្នុងចំណោមទូរស័ព្ទដែលអាចបត់បាន។ និយាយម្តងទៀតអំពីក្រវិលគន្លឹះ ការរចនាបែបនេះគឺជាការអភិវឌ្ឍដ៏អស្ចារ្យសម្រាប់ត្រកូលទូរស័ព្ទមួយនេះ។ ក្រវិលគន្លឹះអាចទប់ទល់នឹងការបត់ចុះឡើងបានរហូតដល់ ៤០០.០០០ ដង ដូចដែលបានសាកល្បងដោយវេបសាយ TUV Rheinland ដែលស្មើនឹងការប្រើប្រាស់បានជាង១០ឆ្នាំ ដោយផ្អែកលើការបត់ចុះឡើង ១០០ ដងក្នុងមួយថ្ងៃ។ យើងមិនគិតថាអ្នកប្រើភាគច្រើននឹងរក្សាឧបករណ៍បែបនេះរហូតដល់១០ឆ្នាំទេ។ ឧបករណ៍នេះបត់ចូលគ្នាដោយគ្មានគម្លាត ហើយមានអេក្រង់រាបស្មើស្ទើរតែពេញលេញនៅពេលលាត។ នោះគឺជាការកែលម្អយ៉ាងពិសេសបំផុតចំពោះឧបករណ៍ដែលអាចបត់បាន។
ចំណុចត្រួសៗរបស់ Honor Magic Vs ៖
– វិមាត្រ ៖ ១៦០,៣ x ៧២,៦ x ១២,៩ មិល្លីម៉ែត្រពេលបត់ និង ១៦០,៣ x ១៤១,៥ x ៦,១ ពេលពន្លា។
– អេក្រង់ ៖ OLED ៧,៩ អ៊ីញ កម្រិត Resolution ២.២៧២ x ១.៩៨៤។
– Refresh Rate ៖ ៩០Hz, HDR10+ និងពន្លឺ ៨០០ នីត (nit)។
– ប្រព័ន្ធដំណើរការ ៖ Snapdragon 8+ Gen 1, រេម ១២GB, អង្គចងចាំក្នុងតួ ៥១២GB និង Adreno 730 GPU ជាមួយនឹង GPU Turbo X ដែលរត់ដោយប្រព័ន្ធប្រតិបត្តិការ MagicOS 7.1។
– កាមេរ៉ា ៖ កាមេរ៉ាមេ Sony IMX800 ៥០ មេហ្គាភិចសែល, កាមេរ៉ាប្លង់ទូលាយ ៥០ មេហ្គាភិចសែល និង កាមេរ៉ាហ្ស៊ូម ៨ មេហ្គាភិចសែល ព្រមទាំងកាមេរ៉ាមុខ ១៦ មេហ្គាភិចសែល៕