ប្រែសម្រួលៈបំណង(ដេល្លីម៉េល)៖ មនុស្សតិចណាស់បួននាក់បានស្លាប់និងជិត៤១.០០០នាក់ត្រូវបានជម្លៀសខ្លួននៅម៉ាឡេស៊ីបន្ទាប់ពីការជន់លិចបង្កឡើងដោយការធ្លាក់ភ្លៀងខ្លាំង«មិនធម្មតា»អស់ពេលជាច្រើនថ្ងៃនៅរដ្ឋជាច្រើន នេះបើតាមការប្រកាសរបស់ពួកមន្ត្រីកាលពីថ្ងៃសៅរ៍។
របាយការណ៍ក្នុងមូលដ្ឋាននិងសារព័ត៌មានក្នុងស្រុកបានបង្ហាញរូបភាពផ្លូវ រថយន្តនិងផ្ទះត្រូវជន់លិច ហើយហាងជាជួរបិទទ្វារនៅតំបន់រងការលិចលង់ ភាគច្រើននៅក្នុងរដ្ឋចូហ័រ(Johor)ក្បែរប្រទេសសិង្ហបុរី។
ភ្លៀងធ្លាក់មិនឈប់ឈរក៏រារាំងដល់ការងារជួយសង្គ្រោះ។
ប៉ូលីសបាននិយាយថាយ៉ាងហោចណាស់មនុស្សបួននាក់បានស្លាប់ចាប់តាំងពីថ្ងៃពុធ រួមទាំងបុរសម្នាក់ដែលរថយន្តរបស់គាត់ត្រូវទឹកហូរនាំយកទៅនិងប្តីប្រពន្ធវ័យចំណាស់មួយគូដែលស្លាប់ដោយលង់ទឹក។ជនរងគ្រោះចុងក្រោយគឺ ស្ត្រីវ័យ៦៨ឆ្នាំម្នាក់ ដែលបានលង់ទឹកនៅក្បែរផ្ទះដែលជន់លិចរបស់គាត់នៅចូហ័រ។
មនុស្សជិត៤១.០០០នាក់នៅក្នុងរដ្ឋចំនួនប្រាំមួយភាគច្រើននៅរដ្ឋចូហ័រ ត្រូវបានជម្លៀសទៅកាន់សាលារៀននិងមជ្ឈមណ្ឌលសហគមន៍ កន្លែងដែលទឹក ស្បៀង និងសម្លៀកបំពាក់ត្រូវបានចែកអោយ។
មន្ត្រីម៉ាឡេស៊ីម្នាក់បាននិយាយថា វាជាការជន់លិចដ៏អាក្រក់បំផុតនៅចូហ័រ គិតតាំងពីឆ្នាំ១៩៦៩។
ម៉ាឡេស៊ីកំពុងជួបការធ្លាក់ភ្លៀងខ្លាំងមិនធម្មតាចាប់ពីដើមរដូវវស្សាដែលបានចាប់ផ្តើមនៅខែវិច្ឆិកា។ជំនន់អាក្រក់បំផុតពីមុននៅក្នុងប្រទេសអាស៊ីអាគ្នេយ៍នេះបានកើតឡើងនៅឆ្នាំ២០១៤ ដោយបានបង្ខំអោយមនុស្សប្រមាណ១១៨.០០០នាក់ភៀសខ្លួនចេញពីផ្ទះរបស់គេ៕
ទឹកជំនន់ពន្លិតផ្លូវនិងហូរចូលផ្ទះនៅរដ្ឋចូហ័រ