ដោយ៖ ដេប៉ូ / ភ្នំពេញ៖ លោក សាយ សំអាល់ រដ្ឋមន្រ្តីក្រសួងបរិស្ថាន បានចូលរួម កម្មវិធីបិទកិច្ចប្រជុំកំពូល One Forest Summit នៅទីក្រុងលីប្រីវីល សាធារណរដ្ឋហ្គាបុង។
ក្នុងឱកាសបិទកិច្ចប្រជុំដែលប្រព្រឹត្តទៅ កាលពីថ្ងៃទី២ ខែមីនា ឆ្នាំ២០២៣ លោក Ali Bongo Ondimba ប្រធានាធិបតីហ្គាបុង បានថ្លែងសុន្ទរកថា ដោយលើកឡើង ថាៈ កិច្ចប្រជុំកំពូល One Forest Summit ជាឱកាសឱ្យយើងបានជួបជុំគ្នា និងពិភាក្សាគ្នា អំពីការរីកចម្រើន នៃសេដ្ឋកិច្ចសកល និងការយល់ដឹងបែបវិទ្យាសាស្រ្ត ទៅលើព្រៃឈើ ហើយធ្វើយ៉ាងណា ធានាឱ្យបាននូវអត្ថប្រយោជន៍របស់ព្រៃឈើ សម្រាប់មនុស្សជាតិ នាពេលបច្ចុប្បន្ន និងអនាគត។
លើសពីនេះទៅទៀត លោកប្រធានាធិបតី ក៏បានថ្លែងបន្តថាៈ កិច្ចប្រជុំកំពូលនេះ ធ្វើឱ្យយើងបានស្វែងយល់ អំពីការចូលរួមរបស់យើងទាំងអស់គ្នា ក្នុងការប្រយុទ្ធ ប្រឆាំងនឹងការប្រែប្រួលអាកាសធាតុ និងផលប្រយោជន៍ ផ្នែកបរិស្ថាន។
ជាចុងក្រោយ លោក Emmanuel Macron ប្រធានាធិបតីបារាំង បានថ្លែងសុន្ទរកថា ដោយលើកឡើង អំពីកិច្ចសហប្រតិបត្តិការ លើវិស័យបរិស្ថាន និងការអភិវឌ្ឍន៍សេដ្ឋកិច្ចសង្គម ជាពិសេសការកសាងបាន នូវភាពជាដៃគូ រវាងបារាំង និងបណ្តាប្រទេសសំបូរព្រៃឈើ នៅអាហ្រ្វិក ក៏ដូចជាប្រទេសផ្សេងៗទៀត ដោយស្មើភាព គ្នាផងដែរ៕/V-PC
