ដោយៈ ដកស្រង់ពីវចនានុក្រមសម្តេចសង្ឃរាជ ជួន ណាត
កន្តារ
(កន់-តា ឬ កន់-តារៈ)
នាមសព្ទ
( បា. < កំ “ទឹក” + តារ “ឆ្លង ឬ ចម្លង” ) ផ្លូវលំបាក ឬ
ផ្លូវដែលច្រើនប្រកបដោយគ្រោះថ្នាក់
ចោរកន្តារ ផ្លូវលំបាកព្រោះចោរ, អមនុស្សកន្តារ ផ្លូវលំបាកព្រោះអមនុស្សមានយក្សជាដើម, វាឡកន្តារ ផ្លូវលំបាកព្រោះសត្វសាហាវ, និរុទកកន្តារផ្លូវលំបាកព្រោះគ្មានទឹក, ទុព្ភិក្ខកន្តារ ផ្លូវលំបាកព្រោះគ្មានបាយ ។ ល ។ កន្តារទ្ធា ( កន់-តា-រ័តធា ) ន. (បា. កន្តារ “លំបាក” ឬ គ្រោះថ្នាក់ + អទ្ធា “ផ្លូវ ឬ ផ្លូវឆ្ងាយ ” ) ផ្លូវលំបាក, ផ្លូវដែលមានគ្រោះថ្នាក់ ។
ខាទនីយាហារ
(ខាទៈនីយាហា)
នាមសព្ទ
(បា.) អាហារម្រាប់ទំពា (ពួកបង្អែម ឬ ចំណី)
ផ្លែឈើមានផ្លែស្វាយជាដើម ជាខាទនីយាហារ ។
គម្ភីរ
គុណសព្ទ
(សំ. បា.) ដែលមានជម្រៅ, ជ្រៅ ។ សម្រាប់ប្រើភ្ជាប់ពីខាងដើមសព្ទដទៃ
គម្ភីរបទ ( —រៈបត់ ) បទ ឬ ចំណែកនៃសេចក្ដីដ៏ជ្រាលជ្រៅ ។ គម្ភីរភាព (—រៈភាប) ភាពជ្រៅ, ជម្រៅ ។ គម្ភីរមតិ ( —រៈមៈតិ ) មតិជ្រៅ, គំនិតជ្រៅ ។ ល ។
រលាប្អៀរ
នាមសព្ទ
ឈ្មោះស្រុកមួយក្នុងខែត្រកំពង់ឆ្នាំង
អភិបាលស្រុករលាប្អៀរ ។
ឡូ
កិរិយាវិសេសន៍
អំពីសូរស្រែកខ្លាំងឮគ្រលួច ឬសូរនិយាយខ្លាំងពេញសំឡេង
ស្រែកឡូ, និយាយឡូៗ ។
នាមសព្ទ
(បារ.ឡូត៍ Lot) ចំណែកផ្សេងៗក្នុងការបែងចែកឬចំនួនផ្សេងៗដែលបែងចេញជាភាគ
ដីមួយឡូ, បែងចែកជាឡូត៍ ។
ខ្មែរច្រើនប្រើពាក្យនេះចំពោះតែចំនួនរបស់ ៦ គូ ឬ ចំនួន ១២ (ដូចយ៉ាងចាននិងដបជាដើម)
ចានមួយឡូ (ចាន១២), ថ្នាំដប់ពីរឡូ (ថ្នាំទឹក ២៤ ដប) ។
នាមសព្ទ
( យ. ហ្លូ៎ Lo “រន្ធ; ប្រហោង” )ឈ្មោះល្បែងស៊ីសងមួយប្រភេទ លេងដោយបោះកាសឬលុយឱ្យចូលក្នុងរន្ធដីតូច . . . ជាល្បែងក្មេង
ពួកក្មេងលេងឡូ ( សព្វថ្ងៃរាជរដ្ឋាភិបាលហាមមិនឱ្យលេង ព្រោះជាល្បែងស៊ីសងនាំឱ្យហិនហោចប្រយោជន៍គ្រប់យ៉ាង ) ។
នាមសព្ទ
( ម. ព. ចាប៉ឹក ) ។