ប្រែសម្រួលៈបំណង(ស្ត្រេតថែមស៍)៖ ក្មេងប្រុសស៊ីរីម្នាក់ដែលបានប្រាប់ពួកអ្នកជួយសង្គ្រោះក្រោយរញ្ជួយដីដ៏អន្តរាយកាលពីខែកុម្ភៈ ថាខ្លួនចង់ជួបតារាបាល់ទាត់ គ្រីស្ទៀណូ រ៉ូណាល់ដូនោះ កាលពីថ្ងៃសុក្រទី៣មីនា ត្រូវបាននាំទៅជួបអាយដលរបស់ខ្លួនដោយផ្ទាល់ ក្រោយពីរូបគេត្រូវបានអញ្ជើញអោយទៅទស្សនាការប្រកួតរបស់ក្លឹប Al Nassrនៅអារ៉ាប៊ីសាអូឌីត។
ណាប៊ីល សាអ៊ីដ(Nabil Saeed)បានធ្វើសំណើទៅកាន់ពួកបុគ្គលិកជួយសង្គ្រោះនៅក្នុងវីដេអូមួយដែលត្រូវបានចែករំលែកនៅក្នុងបណ្តាញសង្គមកាលពីខែមុន ក្រោយរញ្ជួយដីកំលាំង៧,៨រិច្ឆទ័រវាយប្រហារតួកគីនិងស៊ីរីកាលពីថ្ងៃ៦កុម្ភៈ។
មនុស្សជាង៥០.០០០នាក់បានស្លាប់ក្នុងរញ្ជួយដីនេះ ក្នុងនោះជាង៥.៩០០នាក់ស្លាប់នៅពេលខាងស៊ីរី។
ណាប៊ីល ជាមួយនឹងទឹកមុខញញឹម បានជួបខ្សែប្រយុទ្ធព័រទុយហ្កាល់រូបនេះមួយភ្លែតមុនការប្រកួត ជាមួយនឹងការស្វាគមន៍ដោយការទះដៃនិងឳបដោយក្តីស្រឡាញ់។ណាប៊ីល បាននិយាយថា«ពេលខ្ញុំជួបរ៉ូណាល់ដូ ខ្ញុំគិតថាវាជាសុបិន។ខ្ញុំស្ទើរមិនជឿខ្លួនឯង…»។
«ខ្ញុំមានបំណងអោយគ្រប់គ្នាបានជួបរ៉ូណាល់ដូ មនុស្សនេះល្អណាស់»។
ណាប៊ីលបានអបអរ រ៉ូណាល់ដូនិងក្លឹបAl Nassrនៅពេលក្លឹបរបស់គាត់យកឈ្នះ Al Batin ៣-១ក្នុងការប្រកួតនៅទីក្រុងរីយ៉ាត និងនៅនាំមុខគេពីរពិន្ទុះដាច់នៅក្បាលរាតាងលីកSaudi Pro League៕
ណាប៊ីល សាអ៊ីដ បានជួបរ៉ូណាល់ដូមួយភ្លែតមុនការប្រកួតកាលពីថ្ងៃ៣មីនា
ក្រោយសំរេចសុបិនជួបរ៉ូណាល់ដូ ក្មេងប្រុសស៊ីរីបានទៅទស្សនាការប្រកួតរវាងក្លឹបAl Nassrនិងក្លឹប Al Batinនៅទីក្រុងរីយ៉ាត