ដោយៈ គង់ហេង / កំពង់ចាម៖ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការ សាខាកាកបាទក្រហមកម្ពុជាខេត្តនេះ បានដឹកនាំសហការី ចុះសំណេះ សំណាលសួរសុខទុក្ខ និងនាំយកអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់ប្រជាពលរដ្ឋងាយរងគ្រោះ ចំនួន ៧៥ គ្រួសារ នៅឃុំតាអុង ស្រុកចម្ការលើ នៅព្រឹកថ្ងៃទី ៥ មីនា នេះ។
លោក ទួច ឆៃ នាយកប្រតិបត្តិគណៈកម្មាធិការសាខាកាកបាទក្រហមកម្ពុជា ខេត្តកំពង់ចាមបានឱ្យដឹងថាៈ អំណោយដែលបានចែកជូនប្រជាពលរដ្ឋខាងលើ បានរៀបចំនៅក្នុងវត្តអម្ពនារាមតាអុង រួមមាន ចាស់ជរាគ្មានទីពឹង ១៥ គ្រួសារ, ជនមានពិការភាព ១៨គ្រួសារ, ស្ត្រីមេម៉ាយក្រីក្រ ២២ គ្រួសារ, មានជំងឺប្រចាំកាយ ៣ គ្រួសារ និង ទ័លលំបាក ១៧ គ្រួសារ។ ផ្តល់ជូនលោកតាលោកយាយ បងប្អូនជនងាយរងគ្រោះ ទាំង ៧៥ គ្រួសារ , ក្នុងមួយ គ្រួសារ ទទួលបានអង្ករ ២៥ គ.ក្រ , ទឹកត្រីមួយយួរ, មីជាតិ មួយកេស, ទឹកស៊ីអ៊ីវ មួយយួរ, ត្រីខ ១០ កំប៉ុង , សាប៊ូ លុច្ស បួនដុំ , ឃីត មួយកញ្ចប់, អាវយឺត បួន , ម៉ាស់ ១០បន្ទះ និង ថវិកា ៥០.០០០រៀល ។
លោកនាយកប្រត្តិ បានបន្តថាៈ ក្នុងឱកាសនោះ លោក អ៊ុន ចាន់ដា ក៏បានអញ្ជើញប្រគេន ទេយ្យទាន និងបច្ច័យមួយចំនួន ដល់ព្រះគ្រូអនុគណ និងព្រះគ្រូចៅអធិការវត្តអម្ពនារាម តាអុង នូវអង្ករ ១០០ គក្រ, មីបួនកេស, ត្រីខ បួនយួរ , ទឹកសុទ្ធ ពីរកេស និងបច្ច័យមួយចំនួន៕/V-PC
