ប្រែសម្រួលៈបំណង(ស្ត្រេតថែមស៍)៖អគ្គិភ័យបានបំផ្លាញជម្រកខ្ទមប្រមាណ២.០០០នៅជំរំជនភៀសខ្លួនរ៉ូហ៊ីងយ៉ាងនៅបង់ក្លាដែសកាលពីថ្ងៃអាទិត្យដោយបណ្តាលអោយមនុស្សប្រមាណ១២.០០០បាត់បង់ជម្រក។
អគ្គិភ័យនៅជំរំជនភៀសខ្លួនរបស់ជនរ៉ូហ៊ីងយ៉ានៅក្រុងខុកស៊ីសបាហ្សាកាលពីថ្ងៃ៥មីនា
អគ្គិភ័យបានចាប់ផ្តើមនៅម៉ោង២និង៤៥នាទីជិតភ្លឺ នៅជំរំ Camp 11 ដែលជាភូមិជនភៀសខ្លួនធំបំផុតមួយក្នុងលោកនៅក្រុងខុកស៊ីសបាហ្សា(Cox’s Bazar) កន្លែងដែលជនភៀសខ្លួនរ៉ូហ៊ីងយ៉ាងជាមួយលាននាក់ទៅពីមីយ៉ាន់ម៉ាកំពុងរស់នៅ។
អណ្តាតភ្លើងបានឆាបឆេះរាលដាល់យ៉ាងឆាប់រហ័សដោយលេបត្របាក់ខ្ទមធ្វើពីឬស្សីនិងសំពត់ជ័រប្រមាណ២.០០០ ដោយបណ្តាលអោយមនុស្សប្រហែល១២.០០០នាក់បាត់បង់ទីជម្រក។
ស្នងការជនភៀសខ្លួនបង់ក្លាដែសលោក មីចានួរ រ៉ាម៉ាន(Mijanur Rahman)បានប្រាប់ទីភ្នាក់ងារសារព័ត៌មានបារាំងថា យ៉ាងហោចណាស់ព្រះវិហារអ៊ីស្លាមចំនួន៣៥និងមជ្ឈមណ្ឌលសិក្សាចំនួន២១សំរាប់ជនភៀសខ្លួនត្រូវបានអគ្គិភ័យបំផ្លាញ។
វាមិនច្បាស់ថាតើអគ្គិភ័យនេះបានចាប់ផ្តើមដោយរបៀបណា ហើយអាជ្ញាធរបានបញ្ជាអោយធ្វើការស៊ើបអង្កេត។
ភ្លើងឆេះជំរំជនភៀសខ្លួននៅបង់ក្លាដែសកើតមានជាធម្មតា ដោយកាលពីខែមុនក្រសួងការពារជាតិបង់ក្លាដែសបាននិយាយថា រវាងខែមករាឆ្នាំ២០២១និងខែធ្នូឆ្នាំ២០២២ មានអគ្គិភ័យ២២២លើកនៅតាមបណ្តាជំរំជនរ៉ូហ៊ីងយ៉ា រួមមានករណីលួចដុតចំនួន៦០លើកផង។កាលពីខែមីនាឆ្នាំ២០២១ ក្នុងអ្វីដែលអាចជាអគ្គិភ័យអាក្រក់បំផុតនៅជំរំជនភៀសខ្លួនរ៉ូហ៊ីងយ៉ា មនុស្ស១៥នាក់បានស្លាប់និងប្រមាណ៥០.០០០នាក់ត្រូវបានជម្លៀសដោយអគ្គិភ័យនៅជំរំមួយ៕
ជនភៀសខ្លួនរ៉ូហ៊ីងយ៉ា ស្វែងរករបស់របរក្រោយអគ្គិភ័យនៅជំរំកាលពីថ្ងៃ៥មីនា