ប្រែសម្រួល : កញ្ញាដាលីស (ដេល្លីម៉េល) ៖ តួអង្គឧស្សាហកម្មនានាបាននិយាយថា ចិនគ្រោងនឹងជះលុយដើម្បីជួយវិស័យបន្ទះឈីបរបស់ខ្លួនយកឈ្នះលើការទប់ស្កាត់ការនាំចេញរបស់សហរដ្ឋអាម៉េរិក ប៉ុន្តែប្រាក់អាចធ្វើបានច្រើន លុះត្រាតែក្រុមហ៊ុនចិនអាចបំបែកចេញពីវដ្តដែលរារាំងការច្នៃប្រឌិត និងអន្ទាក់នៅចុងបញ្ចប់នៃខ្សែសង្វាក់តម្លៃទាប។
ទីភ្នាក់ងារសារព័ត៌មានរ៉យទ័របានរាយការណ៍កាលពីខែធ្នូថា រដ្ឋាភិបាលបានលៃលកថវិកាចំនួន ១៤០ ពាន់លានដុល្លារដែលអាចរាប់បញ្ចូលទាំងការឧបត្ថម្ភធនលើការទិញឧបករណ៍ផលិតបន្ទះឈីបផលិតក្នុងស្រុក ដែលទំនងជាផ្តល់អត្ថប្រយោជន៍ដល់ក្រុមហ៊ុនផលិតដូចជាក្រុមហ៊ុនឯកទេសផ្នែកឧបករណ៍អេឡិចត្រូនិកតែមួយគត់របស់ចិន គឺ ក្រុមហ៊ុន Shanghai Micro Electronics Equipment Group (SMEE) ជាដើម។
ការចំណាយនេះគឺដើម្បីឆ្លើយតបទៅនឹងសហរដ្ឋអាម៉េរិកដែលកាន់តែរឹតបន្តឹងការនាំចេញបច្ចេកវិជ្ជាផលិតបន្ទះឈីបដោយបារម្ភថាវាអាចត្រូវបានប្រើដើម្បីផលិតបន្ទះឈីបសម្រាប់កម្មវិធីដូចជាបញ្ញាសិប្បនិម្មិត (AI)ដែលអាចត្រូវបានប្រើប្រាស់ដោយយោធារបស់ចិន។
ប៉ុន្តែលុយតែមួយមុខមិនគ្រប់គ្រាន់ដើម្បីតាមទាន់គូប្រជែងលោកខាងលិច ដែលដើរមុនជាច្រើនជំនាន់នោះទេ។ និយោជិតខាងឧស្សាហកម្មនិងអ្នកឃ្លាំមើលទីផ្សារបាននិយាយថាសហគ្រាសធុនតូចនិងមធ្យមក្នុងស្រុក ភាគច្រើនលក់ទៅឱ្យរោងចក្រផលិតបន្ទះឈីបក្នុងស្រុក ហើយកង្វះនៃការជួបផ្ទាល់នឹងកន្លែងផលិតបន្ទះឈីបទំនើបៗដូចជាក្រុមហ៊ុន Taiwan Semiconductor Manufacturing Co Ltd (TSMC) និងក្រុមហ៊ុន Samsung Electronics Co Ltd របស់កូរ៉េខាងត្បូង បានធ្វើឱ្យពួកគេពិបាកដោះស្រាយបញ្ហាវិស្វកម្មដោយឯករាជ្យ និងបង្កើនតម្លៃខ្សែសង្វាក់។
លោក ម៉ាក លី (Mark Li) ដែលតាមដានវិស័យបន្ទះឈីបរបស់ចិននៅក្រុមហ៊ុន Bernstein Research បាននិយាយថា”នេះរារាំងរាល់ភាពជឿនលឿនដែលពួកគេបង្កើតនៅក្នុងការស្រាវជ្រាវនិងអភិវឌ្ឍន៍ (R&D) ពីការចូលទៅក្នុងផលិតកម្មទ្រង់ទ្រាយធំ ហើយថែមទាំងរឹតត្បិតពួកគេពីការរៀនពីល្បិចបន្ថែម នៃការធ្វើពាណិជ្ជកម្ម”។
ដូចនៅក្នុងឧស្សាហកម្មអាកាសចរណ៍ដែរ ក្រុមហ៊ុនផលិតឧបករណ៍ផលិតបន្ទះឈីបធ្វើការយ៉ាងជិតស្និទ្ធជាមួយអតិថិជន ដោយផ្តល់ជូននូវសេវាកម្មរយៈពេលវែងរួមទាំងការដំឡើង ការក្រិតតាមខ្នាត ការថែទាំ និងការជួសជុលម៉ាស៊ីន ដែលអាចចំណាយអស់ជាង ១០០ លានដុល្លារក្នុងមួយគ្រឿង។
កិច្ចសហការនេះអាចនាំឱ្យមានការចែករំលែកចំណេះដឹងយ៉ាងច្រើន ដែលជួយភាគីទាំងពីរឱ្យរីកចម្រើនខាងបច្ចេកវិជ្ជា៕