ប្រែសម្រួល : កញ្ញាដាលីស (ដេល្លីម៉េល) ៖ លោក អាមីតាប បាចចាន់ (Amitabh Bachchan) បាននិយាយថាគាត់បានរងរបួសពេលកំពុងថតភាពយន្តនៅភាគខាងត្បូងប្រទេសឥណ្ឌា ហើយកំពុងសម្រាកព្យាបាលនៅផ្ទះ។
តារាបូលីវូដវ័យ៨០ ឆ្នាំរូបនេះបានបង្ហោះនៅលើប្លុក (Blog) របស់គាត់កាលពីយប់ថ្ងៃអាទិត្យទី៥មីនាថាគាត់បានរងរបួសឆ្អឹងជំនីរ ខណៈគាត់កំពុងធ្វើការនៅទីក្រុងហាយដេរ៉ាបាដ (Hyderabad) នៅទីតាំងថតខ្សែភាពយន្តបែបវិទ្យាសាស្ត្រប្រឌិតProject K។ វាត្រូវបានផលិតជាភាសាឥណ្ឌានិងតេលូហ្គូ (Telugu) ហើយគ្រោងនឹងដាក់បញ្ចាំងក្នុងឆ្នាំ ២០២៤។
លោកបាចចាន់បានសរសេរថា គាត់បានបាក់ឆ្អឹងជំនីរ និងរហែកសាច់ដុំ។ គាត់បាននិយាយថា របួសគឺ “ឈឺចាប់ណាស់” ហើយគាត់បានទៅពិគ្រោះជាមួយវេជ្ជបណ្ឌិតមុនពេលគាត់ហោះទៅផ្ទះនៅទីក្រុងមុំបៃ ជាកន្លែងដែលគាត់ត្រូវបានណែនាំឱ្យសម្រាក។
តារាសម្តែងរូបនេះបាននិយាយទៅកាន់អ្នកគាំទ្រដែលតែងតែជួបជុំគ្នានៅខាងក្រៅផ្ទះរបស់គាត់ក្នុងទីក្រុងមុំបៃថា “ខ្ញុំនឹងមិនអាចជួបអ្នកជូនពរនៅល្ងាចនេះបានទេ…ដូច្នេះកុំមកអី”។ គាត់បានសរសេរថា “អ្វីៗផ្សេងទៀតគឺល្អធម្មតា”។
គាត់បាននិយាយថា ការងាររបស់គាត់លើខ្សែភាពយន្តនេះត្រូវបានផ្អាករហូតដល់គាត់ជាសះស្បើយ។
លោកបាចចាន់បានសម្តែងនៅក្នុងខ្សែភាពយន្តឥណ្ឌាជាង២០០រឿង។ ភាពជោគជ័យរបស់គាត់បានកើតឡើងនៅក្នុងខ្សែភាពយន្ត Zanjeer ឬ The Chain ឆ្នាំ ១៩៧៣ ហើយគាត់បានក្លាយទៅជាកំពូលតារាឆ្នើមដោយសារដើរតួជាតួអង្គក្លាហាន ជាហេតុបំផុសអ្នកគាំទ្រឱ្យចម្លងម៉ូតសក់ សម្លៀកបំពាក់ និង សំឡេងមោះមុតរបស់គាត់៕
លោកបាចចាន់មិនអាចឡើងសម្តែងបានទេរហូតដល់គាត់ជាពីរបួស