ប្រែសម្រួលៈបំណង(ដេល្លីម៉េល)៖ ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើងលោក គីម ជុងអ៊ុនកាលពីថ្ងៃអង្គារទី៧មីនាបានព្រមានថា កូរ៉េខាងជើងត្រៀមខ្លួនចាត់វិធានការ«លឿន»ដ៏លើសលប់ប្រឆាំងអាម៉េរិកនិងកូរ៉េខាងត្បូង ចំពេលសម្ពន្ធមិត្តទាំងពីរធ្វើសមយុទ្ធរួមគ្នា។
សេចក្តីថ្លែងការណ៍របស់លោកស្រី គីម យ៉ូចុង(Kim Yo Jong)កើតឡើងតែមួយថ្ងៃក្រោយពីអាម៉េរិកបានបញ្ជូនយន្តហោះទម្លាក់គ្រាប់បែកធុនធ្ងន់អាចបំពាក់គ្រាប់នុយគ្លេអ៊ែរធុនធ្ងន់B-52មកកាន់ឧបទ្វីបកូរ៉េដើម្បីចូលរួមលំហាត់សមយុទ្ធយោធារួមជាមួយកងម្លាំងកូរ៉េខាងត្បូង។ យោធាអាម៉េរិកនិងកូរ៉េខាងត្បូងក៏កំពុងត្រៀមចាប់ផ្តើមសមយុទ្ធយោធាធំបំផុតរបស់គេឡើងវិញនៅក្នុងខែនេះ។
រូបឯកសារបង្ហាញលោកស្រី គីម យ៉ូចុង ថ្លែងសុន្ទរកថាក្នុងកិច្ចប្រជុំមួយកាលពីឆ្នាំ២០២២
គីម យ៉ូចុង បាននិយាយនៅក្នុងសេចក្តីថ្លែងការណ៍ផ្សាយតាមប្រព័ន្ធផ្សព្វផ្សាយរដ្ឋថា «យើងបន្តឃ្លាំមើលចំណាត់ការយោធាឥតស្រាកស្រាន្តរបស់កងកម្លាំងអាម៉េរិកនិងយោធាអាយ៉ងកូរ៉េខាងត្បូង ហើយយើងតែងតែត្រៀមខ្លួនចាត់ការដ៏លឿន លើសលប់និងសមហេតុផលនៅពេលណាមួយយោងតាមការវិនិច្ឆយរបស់យើង»។
លោកស្រីមិនបានបញ្ជាក់លម្អិតអំពីចំណាត់វិធានការរបស់កូរ៉េខាងជើងទេ តែរដ្ឋកុំម្មុយនីស្តមួយនេះតែងធ្វើការបាញ់សាកល្បងកាំជ្រួចក្នុងការឆ្លើយតបនឹងសមយុទ្ធយោធាអាម៉េរិក-កូរ៉េខាងត្បូង។លោកស្រីបាននិយាយថា«ចំណាត់វិធានការយោធានិងវោហាស័ព្ទគ្រប់ប្រភេទដោយអាម៉េរិកនិងកូរ៉េខាងត្បូងដែលឆ្កួតលីលាខ្លាំងនិងមិនអាចមើលរំលងបាន ផ្តល់អោយកូរ៉េខាងជើងនូវហេតុផលសំរាប់ធ្វើអ្វីមួយដើម្បីដោះស្រាយវា»។
ក្នុងសេចក្តីថ្លែងការណ៍កាលពីថ្ងៃអង្គារលោកស្រី បានបញ្ជាក់ថា កូរ៉េខាងជើងនឹងពិចារណាការប៉ុនប៉ងរបស់អាម៉េរិកណាមួយដើម្បីស្ទាក់បាញ់ទម្លាក់កាំជ្រួចផ្លោងរបស់កូរ៉េខាងជើងថាជាការប្រកាសសង្គ្រាមមួយ។លោកស្រីចង់និយាយសំដៅទៅកាន់របាយការណ៍ក្នុងសារព័ត៌មានកូរ៉េខាងត្បូងដែលថា យោធាអាម៉េរិកមានផែនការបាញ់ទម្លាក់កាំជ្រួចផ្លោងឆ្លងទ្វីបរបស់កូរ៉េខាងជើងណាមួយ បើសិនជាវាត្រូវបានបាញ់ឆ្ពោះទៅប៉ាស៊ីហ្វិក។
កាលពីខែមុន គីម យ៉ូចុង បានគំរាមប្រែក្លាយតំបន់ប៉ាស៊ីហ្វិកទៅជារង្វង់បាញ់កាំជ្រួចរបស់កូរ៉េខាងជើង។
ការហោះលើឧបទ្វីបកូរ៉េរបស់យន្តហោះ B-52 កាលពីថ្ងៃចន្ទជារូបភាពស្រដៀងៗគ្នាចុងក្រោយមួយនៃសមយុទ្ធយោធារួមគ្នារវាងអាម៉េរិកនិងកូរ៉េខាងត្បូង។អាម៉េរិកបានបញ្ជូនយន្តហោះទម្លាក់គ្រាប់ចម្ងាយឆ្ងាយB-1Bមកកាន់ឧបទ្វីបកូរ៉េជាច្រើនលើនៅឆ្នាំនេះ។
ក្នុងពេលជាមួយគ្នា កូរ៉េខាងត្បូងបាននិយាយថា សមយុទ្ធនេះបានបង្ហាញលទ្ធភាពរបស់សម្ពន្ធមិត្តដើម្បីធ្វើការឆ្លើយតបដាច់ខាតណាមួយចំពោះការឈ្លានពានពីកូរ៉េខាងជើង។
កាលពីថ្ងៃសុក្រមុន យោធាកូរ៉េខាងត្បូងនិងអាម៉េរិកបានប្រកាសថាពួកគេនឹងធ្វើសមយុទ្ធប៉ុស្តិ៍បញ្ជាការដោយហ្វឹកហាត់មេរៀនលើកុំព្យូទ័រចាប់ពីថ្ងៃ១៣ដល់២៣មីនា និងស្តារសមយុទ្ធលើទីវាលធំបំផុតរបស់ប្រទេសទាំងពីរឡើងវិញក្រោយផ្អាកនៅឆ្នាំ២០១៨។
សូមបញ្ជាក់ថា សម្ពន្ធមិត្តទាំងពីរបានកាត់បន្ថយទំហំឬផ្អាកសមយុទ្ធទៀងទាត់របស់គេចាប់តាំងពីឆ្នាំ២០១៨ដើម្បីគាំទ្រកិច្ចការទូតជាមួយកូរ៉េខាងជើងនិងការពារប្រឆាំងការរីករាលដាលជំងឺកូវីដ១៩។តែពួកគេបានស្តារវាឡើងវិញក្រោយពីកូរ៉េខាងជើងកាលពីឆ្នាំមុនធ្វើការបាញ់សាកល្បងកាំជ្រួចក្នុងចំនួនច្រើននិងញឹកញាប់បំផុតមិនដែលធ្លាប់មាន ព្រមទាំងគំរាមប្រើនុយគ្លេអ៊េរលើអាម៉េរិកនិងកូរ៉េខាងត្បូងទៀតផង។
ក្នុងសេចក្តីថ្លែងការណ៍ដាច់ដោយឡែក ក្រសួងការបរទេសកូរ៉េខាងជើងបានហៅវត្តមាន B-52 នៅឧបទ្វីបកូរ៉េថាជាការបង្ករឿងដែលរុញសភាពការណ៍នៅលើឧបទ្វីបកូរ៉េអោយ«ចូលក្នុងរណ្តៅកាន់តែជ្រៅ»។សេចក្តីថ្លែងការណ៍បាននិយាយថា« មិនមានការធានាទេថា នឹងមិនមានជម្លោះហិង្សារូបវន្ត»បើសិនជាការបង្ករឿងរបស់អាម៉េរិកនិងកូរ៉េខាងត្បូងនៅតែបន្ត៕
យន្តហោះ B-52H Stratofortressរបស់កងទ័ពអាកាសអាម៉េរិក ត្រូវបានហោះអមការពារដោយយន្តហោះកូរ៉េខាងត្បូង F-15KនិងKF-16កាលពីថ្ងៃ៦មីនា