ប្រែសម្រួល : កញ្ញាដាលីស (ស្ត្រេតថែមស៍) ៖ ទីភ្នាក់ងារអវកាសរបស់ជប៉ុនមានចេតនាបំផ្លាញចោលរ៉ុក្កែតH3 ថ្មីគឺភ្លាមៗក្នុងពេលបាញ់បង្ហោះកាលពីថ្ងៃអង្គារទី៧មីនា បន្ទាប់ពីការបញ្ឆេះសម្រាប់ដំណាក់កាលទីពីរនៃស៊េរីរ៉ុក្កែតថ្មីដំបូងរបស់ប្រទេសក្នុងរយៈពេលជាងពីរទសវត្សរ៍បានបរាជ័យ។
ធ្វើឡើងនៅបីសប្តាហ៍បន្ទាប់ពីការលុបចោលការបាញ់បង្ហោះដោយសារតែភាពមិនប្រក្រតីដាច់ដោយឡែកមួយ បរាជ័យរបស់រ៉ុក្កែតH3 គឺជាឧបសក្គមួយសម្រាប់កម្មវិធីអវកាសរបស់ជប៉ុន ហើយជាពិសេសគឺសម្រាប់កម្មវិធីចាប់មីស៊ីលរបស់ខ្លួន និងជាការខកចិត្តសម្រាប់អ្នកគាំទ្រអវកាសដែលគាំទ្រសម្រាប់ការសាកល្បងបាញ់បង្ហោះឡើងវិញនៅថ្ងៃអង្គារនេះ។
រ៉ុក្កែតនេះកំពុងដឹកផ្កាយរណបអង្កេតដីកម្រិតខ្ពស់(ALOS) ដែលមានភារកិច្ចជាចម្បងលើការសង្កេតផែនដី និងការប្រមូលទិន្នន័យសម្រាប់ការឆ្លើយតបគ្រោះមហន្តរាយ និងការបង្កើតផែនទី ព្រមទាំងឧបករណ៍ចាប់សញ្ញាអ៊ីនហ្វ្រារ៉េដពិសោធន៍ដែលត្រូវបានបង្កើតឡើងដោយក្រសួងការពារជាតិ ដែលអាចតាមដានសកម្មភាពយោធា រួមទាំងការបាញ់មីស៊ីលផងដែរ។
រ៉ុក្កែត H3 ដែលមានក្បាលពណ៌ស បានបាញ់បង្ហោះឡើង ហើយហោះឡើងលើមេឃពណ៌ខៀវពីមជ្ឈមណ្ឌលអវកាសថាណេហ្គាស៊ីម៉ា(Tanegashima) នៅភាគខាងត្បូងប្រទេសជប៉ុន ខណៈអ្នកគាំទ្រនិងអ្នកស្រុកបានអបអរសាទរ។ ទីភ្នាក់ងាររុករកអវកាសជប៉ុន (JAXA) បាននិយាយថា វាបានហោះតាមគន្លងដែលបានគ្រោងទុក ហើយដំណាក់កាលទីពីរបានបំបែកចេញពីគ្នាតាមការគ្រោងទុក ប៉ុន្តែការបញ្ឆេះសម្រាប់វាបានបរាជ័យ។
JAXA បាននិយាយថា ខ្លួនបានបញ្ជូនបទបញ្ជាឱ្យកម្ទេចរ៉ុក្កែតនេះចោល ព្រោះគ្មានសង្ឃឹមសម្រាប់វាក្នុងការបំពេញបេសកកម្មរបស់ខ្លួនបានទេ។
ក្រុមមន្ត្រីកំពុងស៊ើបអង្កេតមូលហេតុនៃបរាជ័យនេះ ហើយរំពឹងថានឹងផ្តល់លទ្ធផលរកឃើញបឋមនៅក្នុងសន្និសីទសារព័ត៌មានមួយនៅល្ងាចថ្ងៃអង្គារនេះ។
បរាជ័យនេះគឺជាបរាជ័យលើកទីពីរក្នុងរយៈពេលប្រាំមួយខែចាប់តាំងពីរ៉ុក្កែតឥន្ធនៈរឹង Epsilon-series តូចជាងនេះ ដែលរចនាឡើងដើម្បីបាញ់បង្ហោះផ្កាយរណបវិទ្យាសាស្ត្រ បានបរាជ័យក្នុងខែតុលា៕
រ៉ុក្កែតH3 ដែលមានក្បាលពណ៌ស បានបាញ់បង្ហោះឡើង ហើយហោះឡើងលើមេឃពណ៌ខៀវពីមជ្ឈមណ្ឌលអវកាសថាណេហ្គាស៊ីម៉ា នៅភាគខាងត្បូងប្រទេសជប៉ុន ខណៈអ្នកគាំទ្រនិងអ្នកស្រុកបានអបអរសាទរ តែវាត្រូវបានបំផ្លាញចោលដោយចេតនានៅព្រឹកថ្ងៃអង្គារនេះដោយសារមិនអាចបញ្ឆេះម៉ាស៊ីននៅដំណាក់កាលទីពីរ