ប្រែសម្រួល : កញ្ញាដាលីស (ដេល្លីម៉េល) ៖ ឆ្កែពីរក្បាលបានរំខានដល់ការសូត្រធម៌នៅព្រះវិហារគ្រិស្តមួយនៅប្រទេសប្រេស៊ីលជាមួយនឹងភាពស្រើបស្រាលរបស់ពួកវា បន្ទាប់ពីឡើងលើឆាកហើយប្រឡែងគ្នា មុនពេលឆ្កែមួយឡើងពាក់ពីលើឆ្កែមួយទៀតនៅកណ្តាលម៉ោងសូត្រធម៌របស់អាចារ្យកាតូលិក។
គ្រាដ៏គួរឱ្យអស់សំណើចនេះត្រូវបានថតនៅលើវីដេអូ ហើយក្រោយមកត្រូវបានចែករំលែកដោយអាចារ្យ ដែលអស់សំណើចយ៉ាងខ្លាំងចំពោះឆ្កែទាំងពីរ រួមជាមួយនឹងក្រុមជំនុំរបស់គាត់។
លោកឪ ព័ររ៉េ ម៉ូរីស៊ីអូ (Pierre Maurício) កំពុងសូត្រធម៌នៅព្រះវិហារសាន់តារីតា (Santa Rita) ក្នុងទីក្រុងហ្សូអ៊ីសដេហ្វូរ៉ា (Juiz de Fora) រដ្ឋមីណាស់ជើរ៉ាអ៊ីស (Minas Gerais) កាលពីខែមុន នៅពេលសត្វឆ្កែវង្វេងផ្លូវបានចូលអុកឡុកនិងដណ្តើមការចាប់អារម្មណ៍ក្នុងពិធី។
នៅពេលដែលគាត់ព្យាយាមនិយាយអំពីតួនាទីរបស់ព្រះវិហារក្នុងរដូវបុណ្យខានីវ៉លឆ្នាំនេះ គេឃើញឆ្កែពីរក្បាលសម្រុកចូលមកតាមច្រកមុខព្រះវិហារ។
អ្នកចូលព្រះវិហារនិងក្រុមមន្ត្រីនាំគ្នានៅស្ងៀម ខណៈឆ្កែលោតចុះឡើងទៅកន្លែងដែលអាចារ្យកំពុងឈរនៅមុខឈើឆ្កាង ហើយចាប់ផ្ដើមប្រឡែងលេងជុំវិញជើងគាត់។
លោកឪព័ររ៉េបានព្យាយាមទប់ចិត្តមិនសើចពេលដែលសត្វឆ្កែកាន់តែវីវក់ មុនពេលឆ្កែមួយស្ទុះមកពាក់អាមួយទៀតនៅពីមុខលោកអាចារ្យ។
លោកឪបានយកដៃបាំងភ្នែកហួសចិត្តចំពោះទង្វើមិនសមរម្យរបស់ឆ្កែដ៏គួរឱ្យស្រលាញ់ទាំងពីរ។
ប៉ុន្តែគ្រូគង្វាលរូបនេះមិនអាចទប់សំណើចបានឡើយហើយនិយាយថា “ពួកឯងមិនទាន់បានទទួលពរមង្គលការនៅឡើយទេ ធ្វើចឹងមិនទាន់បានឡើយ”។
ខណៈអ្នកចូលព្រះវិហារផ្ទុះសំណើច គាត់បានបន្តថា “តើមានអ្វីកើតឡើង? អូព្រះអើយជួយផង។ ព្រះយេស៊ូជាទីគោរព។ ខ្ញុំទើបតែដឹងថា ពួកវាមិនទាន់រៀបការ”។
គាត់បានប្រាប់ឆ្កែទាំងពីរថា “កូនៗរបស់ឪ ឯងមិនអាចធ្វើដូច្នេះនៅទីនេះបានទេ។ សូមនាំគ្នាចូលព្រៃទៅ”។
ក្មេងស្រីតូចម្នាក់ ដែលអង្គុយក្បែរឈើឆ្កាង បានផ្ទុះសំណើច ហើយត្រូវខ្ទប់មាត់ពេលនាងសើចកក្អឹកចំពោះឆ្កែទាំងពីរ៕
ឆ្កែឆាឆៅនិងពាក់គ្នាពីមុខលោកឪព័ររ៉េ ម៉ូរីស៊ីអូ នៅប្រេស៊ីលកាលពីខែមុន