ប្រែសម្រួល : កញ្ញាដាលីស (ដេល្លីម៉េល) ៖ ពលរដ្ឋអាម៉េរិកពីរនាក់ ដែលត្រូវបានចាប់ពង្រត់ដោយជនសង្ស័យជួញដូរគ្រឿងញៀនម៉ិកស៊ិក ត្រូវគេរកឃើញថាបានស្លាប់កាលពីថ្ងៃអង្គារទី៧មីនា ខណៈពីរនាក់ទៀតនៅរស់រានមានជីវិត នៅក្នុងអ្វីដែលក្រុមមន្ត្រីនិយាយថា ហាក់បីដូចជាសោកនាដកម្មនៃការច្រឡំអត្តសញ្ញាណ។
រដ្ឋាភិបាលក្រុងវ៉ាស៊ីនតោនបានប្តេជ្ញាធ្វើអ្វីគ្រប់យ៉ាងនៅក្នុងអំណាចរបស់ខ្លួនដើម្បីធានាបាននូវយុត្តិធម៌សម្រាប់ជនរងគ្រោះដែលបានឆ្លងព្រំដែនចូលទៅក្នុងទីក្រុងញាំញីដោយឧក្រិដ្ឋកម្ម ម៉ាតាម៉ូរ៉ូស (Matamoros) ក្នុងរដ្ឋថាមូលីប៉ាស (Tamaulipas) កាលពីថ្ងៃសុក្រសម្រាប់ហេតុផលវេជ្ជសាស្ត្រ។
អគ្គរដ្ឋអាជ្ញារដ្ឋថាមូលីប៉ាស លោក អៀវីង បារៀស (Irving Barrios) បានប្រាប់អ្នកយកព័ត៌មានថា ការចង្អុលបង្ហាញបឋមគឺថាការចាប់ពង្រត់គឺជាលទ្ធផលនៃ “ការយល់ច្រឡំ” ជាជាងការវាយប្រហារដែលបានកំណត់គោលដៅទុកជាមុន។
ក្រុមមន្ត្រីបាននិយាយថា អ្នកនៅរស់ទាំងពីរនាក់ត្រូវបានបញ្ជូនត្រឡប់ទៅសហរដ្ឋអាម៉េរិកវិញតាមច្រកព្រំដែនគោក។
ប្រព័ន្ធផ្សព្វផ្សាយអាម៉េរិកបានបញ្ចេញឈ្មោះជងរងគ្រោះទាំងពីរគឺ ឡាតាវៀ វ៉ាស៊ីនតោន ម៉ាហ្គី (Latavia Washington McGee) និង អេរិក ជេមស៍ វីលលៀម (Eric James Williams)។
យោងតាមអភិបាលរដ្ឋថាមូលីប៉ាស លោក អាមេរីកូ វីលយ៉ារៀល (Americo Villarreal) បានឱ្យដឹងថា អ្នកនៅរស់ម្នាក់បានរងរបួសត្រូវគ្រាប់កាំភ្លើងចំជើង និងម្នាក់ទៀតមិនមានរបួសទេ។
លោកបាននិយាយថា ជនរងគ្រោះបានទៅលេងម៉ិកស៊ិក ដោយសារតែពួកគេម្នាក់ក្នុងចំណោមនោះមានគម្រោងធ្វើការវះកាត់កែសម្ផស្ស។
គេមិនច្បាស់ភ្លាមៗទេថាតើការស្លាប់ទាំងពីរនោះបានកើតឡើងមុនឬអំឡុងពេលប្រតិបត្តិការជួយសង្គ្រោះនោះទេ ប៉ុន្តែលោកវីយ៉ារៀលនិយាយថា ការស៊ើបអង្កេតបឋមបានបង្ហាញថា អ្នកទាំងបួននៅមានជីវិតរហូតដល់យ៉ាងហោចណាស់ថ្ងៃចន្ទ។
លោកបានបន្តថា “ក្នុងរយៈពេលបីថ្ងៃបន្ទាប់ពីអំពើឧក្រិដ្ឋកម្ម មនុស្សទាំងបួននាក់ ដែលត្រូវបានដកហូតសិទ្ធិសេរីភាព ត្រូវបានផ្ទេរទៅកន្លែងផ្សេងៗរួមទាំងគ្លីនិកមួយផងដែរក្នុងគោលបំណងបង្កើតភាពច្របូកច្របល់និងបញ្ចៀសការប្រឹងប្រែងជួយរំដោះ”។
លោកវីយ៉ារៀលបានបន្ថែមថា សាកសពរបស់ពលរដ្ឋអាម៉េរិកពីរនាក់រំពឹងធ្វើមាតុភូមិនិវត្តន៍ក្នុងរយៈពេលប៉ុន្មានម៉ោង បន្ទាប់ពីការសិក្សាផ្នែកកោសល្យវិច្ច័យត្រូវបានបញ្ចប់ក្នុងប្រទេសម៉ិកស៊ិក៕
កងកម្លាំងសន្តិសុខម៉ិកស៊ិកចូលរួមនៅក្នុងប្រតិបត្តិការមួយដើម្បីបញ្ជូនអ្នករស់រានមានជីវិតពីការចាប់ជំរិតជនជាតិអាម៉េរិកពីរនាក់ត្រឡប់ទៅទីក្រុង Brownsville រដ្ឋតិចសាស់វិញ