ដោយៈ ភ្នំស្វាយ / បន្ទាយមានជ័យៈ មន្ទីរសាធារណការ និងដឹកជញ្ជូន ខេត្តបន្ទាយមានជ័យ កាលពីល្ងាចថ្ងៃទី៧ ខែមីនា ឆ្នាំ២០២៣ បានប្រកាសតែងតាំង និងចូលកាន់មុខតំណែង អនុប្រធាន និងមន្ត្រីជាស្ត្រី។
លោក សុក ចាន់ថា ប្រធានមន្ទីរសាធារណការ និងដឹកជញ្ជូន ខេត្តបន្ទាយមានជ័យ បានឱ្យដឹងថាៈ ជាពិសេស ថ្ងៃអបអរទិវាសិទ្ធិនារីនេះ មន្ទីរបានរៀបចំពិធីប្រកាសតែងតាំង ចូលកាន់តំណែង និងប្រគល់ភារកិច្ច ជូនមន្ត្រីរាជការ ចំនួន ២២ រូប ស្ត្រី ៥ រូប ក្នុងនោះ ថ្នាក់អនុប្រធានមន្ទីរ ១រូប ជាស្ត្រី គឺអ្នកស្រី បាន ច្រឹប ដែលឡើងពីប្រធានការិយាល័យ និងស្ត្រីថ្នាក់អនុប្រធានការិយាល័យ អង្គភាព និងសេវាដ្ឋាន និិងក៏តែងតាំងលោក ចាន់ ណារឹទ្ធិ ពីប្រធានការិយាល័យ ឡើងជាអនុប្រធានមន្ទីរ ខណៈអនុប្រធាន ២រូប នៃមន្ទីរ គឺលោក ប្រាក់ សារ៉ាក់ បានចូលនិវត្តន៍ និងលោក ជា សុវណ្ណធួន មានជំងឺ។
លោក សុក ចាន់ថា បានបន្តថាៈ មន្ទីរ មានក្របខ័ណ្ឌមន្ត្រីរាជការ សរុបចំនួន ៦២ រូប ស្រី ១៨ រូប ឬ ២៣ ភាគរយ ហើយមន្ទីរ នៅបានយកចិត្តទុកដាក់ ក្នុងការតម្លើង ឋានន្តរសក្តិ និងថ្នាក់ ដល់ស្ត្រី ក្នុងប្រភេទក្របខណ្ឌរបស់ខ្លួន មុនចូលនិវត្តន៍ ។ នេះជា ការអនុវត្តតាមសេចក្តីណែនាំ ក៏ដូចជាអនុសាសន៍របស់លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងថ្នាក់ដឹកនាំរដ្ឋបាលខេត្ត មន្ទីរបានខិតខំប្រឹងប្រែងអនុវត្តជំរុញលើកកម្ពស់ តម្លើងឋានន្តរស័ក្តិ តួនាទី និងបង្កើនការចូលរួមរបស់ស្ត្រី ក្នុងការអភិវឌ្ឍប្រទេសជាតិ ។
លោក អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ថាៈ មន្ទីរត្រូវបន្តរួមគ្នា បន្តលើកកម្ពស់ និងជំរុញការអនុវត្តគោលនយោបាយ ពង្រឹងសមភាពយេនឌ័ររបស់ រាជរដ្ឋាភិបាល ធានាបាននូវភាពនៃសុខសន្តិភាព និងពន្លឿនល្បឿន នៃកិច្ចអភិវឌ្ឍជាតិ ជាពិសេសក្នុងយុគសម័យឌីជីថល និងការកសាងមូលដ្ឋាន ឆ្ពោះទៅសម្រេចចក្ខុវិស័យ កម្ពុជា មានចំណូលខ្ពស់ នៅឆ្នាំ២០៣០ ។
លោក អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ថាៈ លោកមានសេចក្តី សោមនស្សរីករាយ ដែលបានចូលរួមក្នុងពិធី ចំនួនពីរ៖ ទី១ ពិធីអបអរសាទរខួបលើកទី ១១២ ទិវាអន្តរជាតិនារី ៨ មីនា ឆ្នាំ២០២៣ ,ទី២.ពិធីប្រកាសតែងតាំងប្រគល់ភារកិច្ច ជូនមន្ត្រីរាជការថ្នាក់អនុប្រធានមន្ទីរ ជាស្ត្រី និងថ្នាក់ការិយាល័យ-អង្គភាពនៃមន្ទីរ ដើម្បីធានានូវប្រសិទ្ធភាព ក្នុងការងារគ្រប់គ្រង និងដឹកនាំ ។
សូមបញ្ជាក់ថា ក្នុងការអបអរនូវការតែងតាំង ចូលកាន់តំណែង និងទិវាសិទ្ធិនារីនេះ ក៏មានការជូនកន្ត្រកបាច់ផ្កា វត្ថុអនុស្សាវរីយ៍ លៀងសាយភោជន៍ និងរីករាយរាំច្រៀង កម្សាន្ត ផងដែរ ៕/V
