ប្រែសម្រួលៈបំណង(ដេល្លីម៉េល)៖ អំពើហិង្សាបានកើតមាននៅទូទាំងបារាំងកាលពីថ្ងៃអង្គារនៅពេលមនុស្សរាប់ពាន់នាក់នាំគ្នាចេញមកតាមដងវិថីដើម្បីប្រឆាំងនឹងកំណែទំរង់សោធននិវត្តន៍របស់ប្រធានាធិបតីម៉ាក្រុង។
ប៉ូលីសបង្ក្រាបបាតុកម្មបានរត់ដេញនិងតតាំងជាមួយបាតុកររាប់ពាន់នាក់នៅទីក្រុងប៉ារីសក្នុងអ្វីដែលគេដាក់ឈ្មោះថាកូដកម្មការងារ«ថ្ងៃអង្គារពណ៌ខ្មៅ»នៅទូទាំងប្រទេស។
ហេតុការណ៍អាក្រក់បំផុតបានកើតឡើងនៅកៀកនឹងស្ថានីយរថភ្លើងក្រោមដីព័រ រ៉ូយ៉ាល់(Port Royal) កន្លែងដែលប៉ូលីសរាបរយនាក់ប្រដាប់ដោយកាំភ្លើងបាញ់គ្រាប់បែកផ្សែងនិងដំបងបានតតាំងជាមួយបាតុករ ដែលចោលរបស់របរនានាលើពួកគេ ដុតធុងសម្រាមនិងបំផ្លាញចំណតរថយន្តក្រុង។
ហ្វូងមនុស្សធំៗក៏ត្រូវគេឃើញនៅទីក្រុងម៉ាសី ទីក្រុងនីសនិងទីក្រុងដទៃទៀត ហើយបញ្ហាក៏ត្រូវបានគេរាយការណ៍ថាបានកើតឡើងនៅទីក្រុងធំៗដទៃទៀតរួមមានលីយ៉ុង ទីក្រុងណង់ស៍និងរ៉េន(Rennes)។
អ្នកនាំពាក្យប៉ូលីសក្រុងប៉ារីសម្នាក់បាននិយាយថា «ពួកជនប្រឆាំងជ្រុល»បានជ្រៀតចូលក្នុងហ្វូងមនុស្ស និងបានចោទប្រកាន់ពួកគេថាវាយប្រហារលើប៉ូលីស«តាមដែលអាចធ្វើបាន។ការតវ៉ាប្រឆាំងត្រូវបានគ្រប់គ្រងដោយប៉ូលីសយ៉ាងច្រើន ហើយគ្រប់យ៉ាងត្រូវបានធ្វើឡើងដើម្បីស្តារច្បាប់និងសណ្តាប់ធ្នាប់»។
សូមបញ្ជាក់ថា ប្រជាជនបារាំងរាប់លាននាក់ខឹងនឹងការប៉ុនប៉ងរបស់ប្រធានាធិបតីបារាំងលោក អេមម៉ានុយអែល ម៉ាក្រុង ដើម្បីបង្កើនអាយុចូលនិវត្តន៍ពី៦២ទៅ៦៤ឆ្នាំ ដើម្បីអោយបារាំងស្របតាមស្តង់ដាអាយុចូលនិវត្តន៍ដូចប្រទេសជាច្រើននៅសហភាពអឺរ៉ុប និងចក្រភពអង់គ្លេសកន្លែងដែលអាយុចូលនិវត្តន៍សំរាប់បុគ្គលិករដ្ឋត្រូវកំណត់៦៦ឆ្នាំ។
ជាលទ្ធផល លោកម៉ាក្រុងបាននិងកំពុងជួបការតវ៉ាប្រឆាំងធំបំផុតពីក្រុមសហជីពចាប់តាំងពីលោកចូលកាន់តំណែងនៅឆ្នាំ២០១៧។
ថ្ងៃអង្គារទី៧មីនា ជាថ្ងៃធ្វើកូដកម្មទូទាំងប្រទេសលើកទីប្រាំមួយចាប់តាំងពីពាក់កណ្តាលខែមករាមក និងអាចទាក់ទាញអ្នកចូលរួមច្រើនជាងពេលណាទាំងអស់ ក្រោយមនុស្សជាង១,២៧លាននាក់បានចូលរួមការជួបជុំតវ៉ាកាលពីថ្ងៃ៣១មករា។
រដ្ឋមន្ត្រីក្រសួងមហាផ្ទៃ បាននិយាយថា ប៉ូលីសប្រមាណ១១.០០០នាក់ត្រូវបានកេណ្ឌមកពីទូទាំងប្រទេស រួមមានប្រមាណ៥.០០០នាក់នៅក្រុងប៉ារីស។
ពួកសហជីពបានសន្យារៀបចំការតវ៉ាប្រឆាំងធំៗបំផុត ដោយសេវារថភ្លើងត្រូវបានបញ្ឈប់ ការដឹកជញ្ជូនប្រេងឥន្ធនៈត្រូវរំខាន និងសាលារៀនបិទទ្វារ ក្នុងការឆ្លើយតបនឹងផែនការរបស់រដ្ឋាភិបាលដើម្បីដំឡើងអាយុចូលនិវត្តន៍។កូដកម្មនាំអោយសេវាសាធារណៈនិងក្រុមហ៊ុនជាច្រើនជាច្រើនបិទទ្វារកាលពីថ្ងៃអង្គារ រួមមានការអាជីវកម្មចំរាញ់ប្រេង៕
