ប្រែសម្រួល : កញ្ញាដាលីស (ដេល្លីម៉េល) ៖ ទាហានអ៊ីស្រាអែលកាលពីថ្ងៃអង្គារទី៧មីនាបានសម្លាប់ជនជាតិប៉ាឡេស្ទីនប្រាំមួយនាក់នៅក្នុងទីក្រុងជេនីន (Jenin) រួមទាំងជនសកម្មប្រយុទ្ធម្នាក់ដែលគេចោទថាបានសម្លាប់ជនជាតិអ៊ីស្រាអែលពីរនាក់ ដែលនេះជាការវាយឆ្មក់ចុងក្រោយបំផុតនៃអំពើហិង្សានៅក្នុងតំបន់កាន់កាប់ វេសប៊ែង។
ក្រសួងសុខាភិបាលប៉ាឡេស្ទីនបាននិយាយថា បុរសប្រាំមួយនាក់ត្រូវបានសម្លាប់ ម្នាក់មានអាយុ ៤៩ ឆ្នាំ និងអ្នកដទៃទៀតមានអាយុខ្ទង់ ២០ ឆ្នាំ នៅក្នុងការប៉ះទង្គិច ដែលកងទ័ពនិយាយថា រួមមានទាហានបាញ់គ្រាប់បេចំពេលមានការបាញ់កាំភ្លើងយ៉ាងសាហាវ។
លោក ណាប៊ីល អាប៊ូ រូដេណេ (Nabil Abu Rudeineh) អ្នកនាំពាក្យរបស់ប្រធានាធិបតីប៉ាឡេស្ទីន ម៉ាមូត អាប់បាស (Mahmud Abbas) បានហៅការប្រើប្រាស់គ្រាប់បេនៅក្នុងជំរំជនភៀសខ្លួននៃក្រុងជេនីន ដែលជាឈុតឆាកនៃការប៉ះទង្គិចគ្នាជាញឹកញាប់នៅភាគខាងជើងតំបន់វេសប៊ែង ថាជាសកម្មភាពនៃ “សង្គ្រាមពេញទំហឹង” នេះបើយោងតាមទីភ្នាក់ងារសារព័ត៌មានប៉ាឡេស្ទីន Wafa រាយការណ៍។
សាក្សីបាននិយាយថា ទាហានអ៊ីស្រាអែលបានចូលទៅក្នុងជំរំ ហើយឡោមព័ទ្ធផ្ទះមួយ ខណៈក្រុមសកម្មប្រយុទ្ធបានវាយបកវិញ ដោយកងទ័ពរាយការណ៍ថា “ឧបករណ៍បំផ្ទុះនិងប្លុកអគារ” បានប៉ើងមកលើទាហានរបស់ពួកគេ។
អ្នកថតរូបរបស់ទីភ្នាក់ងារសារព័ត៌មាន AFP ម្នាក់បានឃើញផ្សែងហុយចេញពីអគារ។
កងពលតូចជេនីន ដែលជាក្រុមសកម្មប្រយុទ្ធនៅក្នុងជំរំ បាននិយាយនៅលើបណ្តាញ Telegram មួយរបស់ពួកគេថា ខ្មាន់កាំភ្លើងរបស់ពួកគេបានប្រយុទ្ធក្នុង “ការប៉ះទង្គិចដ៏ហិង្សា” ជាមួយកងកម្លាំងអ៊ីស្រាអែល។
ក្នុងចំណោមអ្នកស្លាប់ទាំងនោះមានលោក អាប់ឌែល ហ្វាតា ហ៊ូសសេន គ្រូសា (Abdel Fatah Hussein Khroushah) អាយុ៤៩ឆ្នាំ ដែលកងទ័ពអ៊ីស្រាអែលហៅថាជា “ប្រតិបត្តិករភេរវករ” ពីចលនាអ៊ីស្លាមហាម៉ាស និងបានចោទប្រកាន់ថាបានសម្លាប់អ្នកតាំងលំនៅអ៊ីស្រាអែលពីរនាក់នៅក្នុងក្រុងហ៊ូវ៉ារ៉ា (Huwara) របស់ប៉ាឡេស្ទីន កាលពីថ្ងៃទី២៦ ខែកុម្ភៈ។
ក្រសួងសុខាភិបាលប៉ាឡេស្ទីនបាននិយាយថា ជនជាតិប៉ាឡេស្ទីនចំនួន ២៦ នាក់បានរងរបួសក្នុងអំឡុងការវាយឆ្មក់កាលពីថ្ងៃអង្គារ ដែលក្នុងនោះមានបីនាក់បានរងរបួសធ្ងន់ធ្ងរ។ កងទ័ពបាននិយាយថា ទាហានពីរនាក់បានរងរបួសស្រាល៕
យានជំនិះរបស់កងទ័ពអ៊ីស្រាអែលធ្វើដំណើរតាមដងផ្លូវអំឡុងពេលការវាយឆ្មក់នៅក្នុងជំរំនៃក្រុងជេនីនសម្រាប់ជនភៀសខ្លួនប៉ាឡេស្ទីន នៅតំបន់កាន់កាប់វេសប៊ែង