ប្រែសម្រួល : កញ្ញាដាលីស (ដេល្លីម៉េល) ៖ ប្រមុខមន្ទីរបញ្ចកោណលោក ឡយ អូស្ទីន បាននិយាយកាលពីថ្ងៃអង្គារទី៧មីនាថា លោកសង្ឃឹមថានឹង “ពង្រឹងនិងពង្រីក” ទំនាក់ទំនងជាមួយអ៊ីរ៉ាក់ក្នុងដំណើរទស្សនកិច្ចនៅទីក្រុងបាកដាដ នៅមុនខួបលើកទី២០នៃការឈ្លានពានដឹកនាំដោយសហរដ្ឋអាម៉េរិកដែលបានផ្តួលរំលំ សាដាម ហ៊ូសេន។
រដ្ឋមន្ត្រីការពារជាតិអូស្ទីនក៏បានប្រាប់នាយករដ្ឋមន្ត្រីអ៊ីរ៉ាក់ លោក ម៉ូហាម៉េត សៀ អាល់ស៊ូដានី (Mohammed Shia al-Sudani) ផងដែរថាទាហានអាម៉េរិកត្រៀមខ្លួនរួចជាស្រេចដើម្បីបន្តនៅក្នុងប្រទេសនេះតាមការអញ្ជើញរបស់រដ្ឋាភិបាលក្រុងបាកដាដ ។
ដំណើរទស្សនកិច្ចមិនបានប្រកាសជាសាធារណៈជាមុននេះបានកើតឡើងនៅមុនខួបថ្ងៃទី២០មីនានៃការលុកលុយតាមជើងគោក ដែលបានចាប់ផ្តើមការបង្ហូរឈាមរយៈពេលពីរទសវត្សរ៍ ដែលឥឡូវនេះអ៊ីរ៉ាក់ទើបតែចាប់ផ្តើមរកច្រកចេញ។
លោកអូស្ទីនបានប្រាប់អ្នកយកព័ត៌មាននៅទីក្រុងបាកដាដបន្ទាប់ពីកិច្ចប្រជុំជាមួយលោកស៊ូដានីនិងរដ្ឋមន្ត្រីការពារជាតិលោក ថាបេត អាល់អាប់បាស៊ី (Thabet al-Abbasi) ថា “ខ្ញុំមានសុទិដ្ឋិនិយមអំពីអនាគតនៃភាពជាដៃគូរបស់យើង”។
“សហរដ្ឋអាម៉េរិកនឹងបន្តពង្រឹងនិងពង្រីកភាពជាដៃគូក្នុងការគាំទ្រសន្តិសុខ ស្ថិរភាពនិងអធិបតេយ្យភាពអ៊ីរ៉ាក់”។
នាយករដ្ឋមន្ត្រីអ៊ីរ៉ាក់បានប្រាប់លោកអូស្ទីនថាគាត់ក៏ចង់ “ពង្រឹងនិងពង្រីកទំនាក់ទំនង” ជាមួយរដ្ឋាភិបាលក្រុងវ៉ាស៊ីនតោនដែរ ហើយបានគូសបញ្ជាក់ពីការប្តេជ្ញាចិត្តរបស់រដ្ឋាភិបាលក្រុងបាកដាដក្នុង “ការរក្សាទំនាក់ទំនងប្រកបដោយតុល្យភាពជាមួយមហាអំណាចក្នុងតំបន់និងអន្តរជាតិ”។
ចាប់តាំងពីកងទ័ពចម្រុះដឹកនាំដោយសហរដ្ឋអាម៉េរិកបានបណ្តេញរបបដែលគ្របដណ្តប់ដោយនិកាយស៊ុននីអារ៉ាប់របស់លោកសាដាមក្នុងឆ្នាំ ២០០៣ មក និកាយស៊ីអ៊ីតភាគច្រើនរបស់អ៊ីរ៉ាក់បានដឹកនាំប្រទេសអ៊ីរ៉ាក់ក្រោមប្រព័ន្ធចែករំលែកអំណាចតាមរយៈការបោះឆ្នោត៕
រដ្ឋមន្ត្រីការពារជាតិអាម៉េរិក ឡយ អូស្ទីន