ប្រែសម្រួល : កញ្ញាដាលីស (ដេល្លីម៉េល) ៖ កាលពីថ្ងៃអង្គារទី៧មីនា ក្រុមហ៊ុន Apple បានណែនាំកំណែពណ៌លឿងនៃ iPhone 14 និង iPhone 14 Plus របស់ខ្លួន ដើម្បីជំរុញការលក់ ដែលបានធ្លាក់ចុះខ្លាំងបំផុតចាប់តាំងពីឆ្នាំ ២០១៩។
អ្នកប្រើប្រាស់នៅទូទាំងជាង ៦០ ប្រទេស រួមទាំងសហរដ្ឋអាម៉េរិកនិងចក្រភពអង់គ្លេស អាចបញ្ជាទិញស្មាតហ្វូនស៊េរីថ្មីនេះចាប់ពីថ្ងៃទី ១០ ខែមីនា។
ទូរស័ព្ទទាំងពីរនឹងបំពាក់នូវបច្ចេកវិជ្ជានិងតម្លៃដូចគ្នាទៅនឹងស៊េរីដើម ដែលបានចេញកាលពីខែកញ្ញា ឆ្នាំ ២០២២ គឺចាប់ផ្តើមពី ៧៩៩ ដុល្លារ និង ៨៩៩ ដុល្លារ។
Apple ធ្លាប់បានប្រើពណ៌លឿងស្រដៀងគ្នានៅក្នុងម៉ូដែលមុនៗ គឺ iPhone 5c និង iPhone 11 ប៉ុន្តែនេះជាលើកដំបូងដែលឃើញពណ៌នេះនៅលើឧបករណ៍ទំនើប។
ទោះយ៉ាងណា ចំណាត់ការនេះគឺជាអាវុធសម្ងាត់របស់ក្រុមហ៊ុនបច្ចេកវិជ្ជាយក្សនេះក្នុងការជំរុញការលក់ iPhone ដែលបានធ្លាក់ចុះ ៨ ភាគរយកាលពីឆ្នាំមុន។
លោក បប់ បូឆឺ (Bob Borchers) ជាអនុប្រធានផ្នែកទីផ្សារផលិតផលទូទាំងពិភពលោករបស់ក្រុមហ៊ុន Apple បាននិយាយនៅក្នុងសេចក្តីថ្លែងការណ៍មួយថា “មនុស្សស្រឡាញ់ iPhone របស់ពួកគេ ហើយពឹងផ្អែកលើវាជារៀងរាល់ថ្ងៃសម្រាប់អ្វីៗគ្រប់យ៉ាងដែលពួកគេធ្វើ ហើយឥឡូវនេះមានការបន្ថែមដ៏គួរឱ្យរំភើបចំពោះត្រកូល iPhone 14 និង iPhone 14 Plus ពណ៌លឿងថ្មី”។
“អាយុកាលថ្មដ៏អស្ចារ្យ ការរចនាទម្ងន់ស្រាល មុខងារកាមេរ៉ាកម្រិតខ្ពស់និងវីដេអូ សមត្ថភាពសុវត្ថិភាពដ៏ពេញនិយមដូចជា Emergency SOS តាមរយៈផ្កាយរណប និងប្រព័ន្ធប្រតិបត្តិការ iOS 16 ទាំងអស់នេះត្រូវផ្តល់ជូនដើម្បីធ្វើឱ្យ iPhone 14 ជាជម្រើសដ៏ល្អសម្រាប់អ្នកដែលស្វែងរក iPhone ថ្មីក្នុងទីផ្សារ”។
ការលក់របស់ Apple បានធ្លាក់ចុះយ៉ាងខ្លាំងនៅចុងឆ្នាំ ២០២២ ខណៈតម្លៃនៃការរស់នៅកើនឡើងបានបង្ខំឱ្យអ្នកប្រើប្រាស់ជ្រើសរើសរវាងការបង់ទឹកភ្លើង ឬ ទិញ iPhone ជំនាន់ចុងក្រោយ៕
iPhone 14 និង iPhone 14 Plus ពណ៌លឿងថ្មី លក់ក្នុងតម្លៃចាប់ផ្តើមពី ៧៩៩ ដុល្លារ និង ៨៩៩ ដុល្លារ