ប្រែសម្រួល : កញ្ញាដាលីស (ស៊ីនហួ) ៖ ប្រធានអង្គភាពរបស់អង្គការសហប្រជាជាតិ ដែលឧទ្ទិសដល់សមភាពយេនឌ័រ បាននិយាយកាលពីថ្ងៃអង្គារទី៧មីនាថា ឋានៈរបស់ស្ត្រីគឺ “ស្ថិតក្រោមការឡោមព័ទ្ធ” ពោលជាង២០ឆ្នាំបន្ទាប់ពីក្រុមប្រឹក្សាសន្តិសុខអ.ស.បបានអនុម័តសេចក្តីសម្រេចចិត្តដ៏សំខាន់មួយស្តីពីស្ត្រី សន្តិភាពនិងសន្តិសុខ។
ថ្លែងទៅកាន់វេទិកាជជែកដេញដោលកម្រិតខ្ពស់របស់ក្រុមប្រឹក្សាសន្តិសុខស្តីពីស្ត្រី សន្តិភាព និងសន្តិសុខ នាយកប្រតិបត្តិស្ត្រីនៃអ.ស.ប លោកស្រី ស៊ីម៉ា បាហោស (Sima Bahous) បានលើកឡើងនូវឧទាហរណ៍នៅក្នុងប្រទេសអាហ្វហ្គានីស្ថាននិងប្រទេសដែលរងផលប៉ះពាល់ដោយជម្លោះផ្សេងទៀត កន្លែងដែលឋានៈរបស់ស្ត្រីកំពុងត្រូវបានគំរាមកំហែង។
ការជជែកដេញដោលនេះគឺផ្តោតលើប្រធានបទ “ឆ្ពោះទៅរកខួបលើកទី ២៥ នៃសេចក្តីសម្រេចចិត្តលេខ ១៣២៥”។ សេចក្តីសម្រេចចិត្តនេះត្រូវបានអនុម័តដោយក្រុមប្រឹក្សាសន្តិសុខក្នុងខែតុលា ឆ្នាំ ២០០០ ដោយទទួលស្គាល់ថា ស្ត្រីមានសិទ្ធិចូលរួមពេញលេញ ស្មើភាព និងមានអត្ថន័យនៅក្នុងដំណើរការសន្តិភាព ការដោះស្រាយជម្លោះ និងការកសាងសន្តិភាព។
កំណត់ចំណាំគោលគំនិតស្តីពីការជជែកដេញដោលបើកចំហដែលរៀបចំដោយប្រទេសម៉ូសំប៊ិក ដែលឥឡូវនេះកាន់តំណែងជាប្រធានក្រុមប្រឹក្សាសន្តិសុខ បានចង្អុលបង្ហាញការពិតដែលថា “រហូតមកដល់សព្វថ្ងៃនេះស្ត្រីនៅតែបន្តជាផ្នែកនៃសង្គមដែលរងផលប៉ះពាល់ខ្លាំងបំផុតដោយជម្លោះប្រដាប់អាវុធនៅជុំវិញពិភពលោក”។
កំណត់ចំណាំនោះនិយាយថា សិទ្ធិស្ត្រីបន្តត្រូវបានរំលោភយ៉ាងធ្ងន់ធ្ងរ ហើយពួកគេបន្តបាត់បង់ឱកាសនិងមិនត្រូវបានរាប់បញ្ចូលក្នុងការសម្រេចចិត្តក្នុងបញ្ហាសន្តិភាព និងសន្តិសុខ។
លោកស្រីបាហោសបានប្រាប់កិច្ចពិភាក្សាដេញដោលរបស់ក្រុមប្រឹក្សាសន្តិសុខថា “វាច្បាស់ណាស់ថាយើងត្រូវការការផ្លាស់ប្តូរទិសដៅទាំងស្រុង”។
លោកស្រីបានអំពាវនាវឱ្យមានការចូលរួមជាចាំបាច់របស់ស្ត្រីនៅក្នុងរាល់ការប្រជុំនិងដំណើរការធ្វើសេចក្តីសម្រេចចិត្ត “ដែលយើងមានសិទ្ធិអំណាច”។
លោកស្រីបាហោសបានបន្ថែមថា “យើងត្រូវពង្រីកលទ្ធភាពរបស់យើងដើម្បីទទួលបានធនធានទៅដល់ដៃអ្នកដែលត្រូវការវាច្រើនបំផុតនិងមិនមានវា”៕
នាយកប្រតិបត្តិស្ត្រីនៃអ.ស.ប លោកស្រី ស៊ីម៉ា បាហោស