រដ្ឋមន្រ្តីកសិកម្មជួបជាមួយតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន

ដោយៈ ជា សីហៈ /ភ្នំពេញ : លោក ឌិត ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ០៧ ខែ មីនា ឆ្នាំ ២០២៣ បានទទួលជួបពិភាក្សាការងារជាមួយលោកស្រី កាមី ហារូកូ ( KAMEI Haruko) ប្រធានតំណាងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) ប្រចាំនៅកម្ពុជា មុននឹងការបញ្ចប់អាណត្តិ។

ក្នុងកិច្ចប្រជុំនេះ លោក រដ្ឋមន្ត្រី បានសម្ដែងការស្វាគមន៍ចំពោះកិច្ចសហប្រតិបត្តិការរវាងអង្គការ JICA និងក្រសួង នាពេលកន្លងមក ក្នុងអនុវិស័យកសិកម្ម រុក្ខាប្រមាញ់ និងនេសាទ។

ចំពោះកិច្ចសហប្រតិបត្តិការនាពេលអនាគត លោក រដ្ឋមន្ដ្រី សង្ឃឹមថា អង្គការ JICA នឹងអាចជួយសម្របសម្រួលធ្វើយ៉ាងណាឱ្យសហគ្រិននិងកសិករខ្មែរ ទទួលបានកម្ចីដែលមានអត្រាការប្រាក់ទាប សម្រាប់ជំរុញដំណើរការផលិតកសិផលដែលមានលក្ខណៈស្តង់ដាសម្រាប់ការនាំចេញទៅប្រទេសជប៉ុន៕ P / N