ប្រែសម្រួលៈបំណង(ស្ត្រេតថែមស៍)៖បណ្តាប្រទេសក្នុងសហភាពអឺរ៉ុបកាលពីថ្ងៃពុធបានព្រមព្រៀងគ្នាថានឹងពន្លឿនការផ្គត់ផ្គង់គ្រាប់កាំភ្លើងធំនិងរកទិញគ្រាប់ផ្លោងបន្ថែមសំរាប់ជួយអ៊ុយក្រែន តែនៅត្រូវធ្វើការជាច្រើនទៀតដើម្បីអោយគោលបំណងនេះក្លាយជាការពិត។
ក្រោមផែនការដែលគូសវាសដោយ ប្រធានគោលនយោបាយការបរទេសសហភាពអឺរ៉ុបលោក ចូសេប ប័ររ៉ែល ( Josep Borrell)បណ្តារដ្ឋក្នុងសហភាពអឺរ៉ុបនឹងប្រមូលហិរញ្ញវត្ថុអោយបាន១ពាន់លានអឺរ៉ូដើម្បីបញ្ជូនគ្រាប់កាំភ្លើងធំរបស់ប្រទេសផងគេទៅអោយអ៊ុយក្រែន នៅពេលប្រាក់១ពាន់លានអឺរ៉ូទៀតទុកទិញគ្រាប់កាំភ្លើងផ្លោងថ្មី។
ក្រោយជួបប្រជុំជាមួយរដ្ឋមន្ត្រីការពារជាតិសហភាពអឺរ៉ុបនៅទីក្រុងស្តុកខុល លោកប័ររ៉ែលបាននិយាយថា«មានការព្រមព្រៀងគ្នាជាទូទៅអំពីដំណើរការនេះតែនៅមានបញ្ហាខ្លះត្រូវដោះស្រាយ។គ្រប់យ៉ាងត្រូវបានពិភាក្សាគ្នាយ៉ាងលម្អិត»។លោកសង្ឃឹមថាផែនការនេះនឹងសំរេចឡើងនៅឯកិច្ចប្រជុំមួយនៃរដ្ឋមន្ត្រីការបរទេសនិងការពារជាតិរបស់សហភាពអឺរ៉ុបនៅថ្ងៃ២០មីនា។
បើតាមរដ្ឋមន្ត្រីការពារជាតិអ៊ុយក្រែនលោកអូឡេកស៊ីយ រ៉េហ្ស៍នីកូវ(Oleksiy Reznikov) ប្រទេសអេស្តូនីបានដាក់ចេញផែនការមួយសំរាប់សហភាពអឺរ៉ុបទិញគ្រាប់ផ្លោងមួយលានគ្រាប់នៅឆ្នាំនេះក្នុងតំលៃ១៤ពាន់លានអឺរ៉ូ ដើម្បីជួយអ៊ុយក្រែនទប់ទល់នឹងការឈ្លានបានរបស់រុស្ស៊ី។លោកអំពាវនាវអោយសហភាពអឺរ៉ុបគាំទ្រផែនការរបស់អេស្តូនីនេះ។
ផែនការរបស់លោកប័ររ៉េល មានទំហំតូចជាង តែអាចថាជាការបោះជំហានសំខាន់ជាប្រវត្តិសាស្ត្រមួយសំរាប់សហភាពអឺរ៉ុប ដោយសារកន្លងមកជំនួយគ្រាប់រំសេវដល់អ៊ុយក្រែនជាការងាររបស់រដ្ឋជាសមាជិកមួយៗ៕
កងកម្លាំងអ៊ុយក្រែនប្រើគ្រាប់ផ្លោងអស់លឿនជាងលទ្ធភាពអាចទទួលបានមកពីក្រៅ ជាហេតុនាំអោយមានការអំពាវនាវសុំអោយប្រគល់ជំនួយគ្រាប់រំសេវអោយបានលឿននិងបង្កើនការផលិតវា។បើតាមរដ្ឋមន្រ្តីការពារជាតិអ៊ុយក្រែន ប្រទេសលោកចង់បានគ្រាប់កាំភ្លើងធំ៩០.០០០ទៅ១០០.០០០ក្នុងមួយខែ