ប្រែសម្រួលៈបំណង(ស្ត្រេតថែមស៍)៖ អតីតនាយករដ្ឋមន្ត្រីម៉ាឡេស៊ីលោក មូយីតឌីន យ៉ាសស៊ីន(Muhyiddin Yassin)នឹងត្រូវចោទប្រកាន់ពីបទប្រព្រឹត្តអំពើពុករលួយនៅថ្ងៃសុក្រទី១០មីនា បន្ទាប់ពីត្រូវអង្គភាពប្រឆាំងអំពើពុករលួយជាតិកោះហៅអោយចូលបំភ្លឺអំពីគំរោងមួយចំនួននៅក្រោមកម្មវិធីជំរុញសេដ្ឋកិច្ចរបស់រដ្ឋាភិបាលលោក។
ប្រធានគណៈកម្មាធិការប្រឆាំងអំពើពុករលួយម៉ាឡេស៊ី(MACC)លោក អាហ្សាំ បាគី(Azam Baki)បាននិយាយថាលោក មូយីតឌីន ដែលជាប្រធានគណនបក្ស ប៉ាទី ព្រីប៊ូមី ប៊ឺសាទុ ម៉ាឡេស៊ី(Bersatu) នឹងត្រូវចោទប្រកាន់នៅតុលាការនៅថ្ងៃសុក្រ។
លោកមូយីតឌីន អាយុ៧៥ឆ្នាំ បានទៅដល់ទីស្នាក់ការMACCកាលពីព្រឹកថ្ងៃព្រហស្បតិ៍ដើម្បីអោយគេសាកសួរចម្លើយ
ថ្លែងទៅកាន់អ្នកយកព័ត៌មាននៅក្រៅស្នាក់ការMACC អ្នកនាំពាក្យBersatuបាននិយាយថា«យើងគិតថាជាការបំបាក់មុខមួយ ដោយសារតែគណបក្សមានការបោះឆ្នោតនៅថ្ងៃស្អែកហើយសភាក៏ត្រូវបើកសម័យប្រជុំផងដែរ»។
អង្គភាពប្រឆាំងអំពើពុករលួយMACCកំពុងស៊ើបអង្កេតការចោទប្រកាន់ថា ពួកម៉ៅការដែលជ្រើសរើសសំរាប់កម្មវិធីជំរុញសេដ្ឋកិច្ចដែលគេស្គាល់ថា Jana Wibawa តំរូវអោយដាក់តម្កល់ប្រាក់ប្រមាណ៣០០លានរីងហ្គីត(៦៦,៣៣លានដុល្លារ)ចូលគណនីរបស់គណបក្សBersatuដើម្បីទទួលបានគំរោង។
ដោយហៅវាជាការមួលបង្កាច់ផ្នែកនយោបាយ លោកមូយីតឌីន បានបដិសេធការចោទប្រកាន់។
សូមបញ្ជាក់ថា កម្មវិធីJana Wibawaត្រូវបានបង្កើតឡើងសំរាប់ជួយប្រជាជនម៉ាឡេស៊ីក្នុងអំឡុងពេលផ្ទុះជំងឺកូវីដ១៩។
កាលពីថ្ងៃព្រហស្បតិ៍សមាជិកសភាជាច្រើនក្នុងសម្ពន្ធភាព ពែរីកាតាន់ ណាស្យូណាល់(Perikatan Nasional-PN)មិនបានចូលរួមប្រជុំសភាទេដើម្បីបង្ហាញសាមគ្គីភាពជាមួយលោកមូយីតឌីន ដែលជាប្រធានក្រុមចំរុះPN។
ឆ្លើយតបទៅអ្នករិះគន់ដែលថា ការស៊ើបអង្កេតនេះមានហេតុផលនយោបាយ លោកនាយករដ្ឋមន្ត្រី អាន់វ៉ា អ៊ីប្រាហ៊ីម បាននិយាយកាលពីថ្ងៃ៩មីនាថា ការស៊ើបអង្កេតប្រឆាំងលោកមូយីតឌីន ធ្វើឡើងដោយឯករាជ្យ ដោយភ្នាក់ងារប្រឆាំងអំពើពុករលួយ។
លោកមូយីតឌីន ក៏ត្រូវហាមមិនអោយចាកចេញពីប្រទេសម៉ាឡេស៊ី តែលោកនឹងប្តឹងទៅតុលាការកំពូលប្រឆាំងនឹងបំរាមនេះ។លោកបានបដិសេធការចោទប្រកាន់ និងចាត់ទុកវាជាការសងសឹកនយោបាយ៕