ប្រែសម្រួល : កញ្ញាដាលីស (ដេល្លីម៉េល) ៖ ក្រុមមន្ត្រីបាននិយាយថា រុស្ស៊ីបានបញ្ចេញមីស៊ីលជាច្រើនគ្រាប់ដែលផ្តោតលើហេដ្ឋារចនាសម្ពន្ធថាមពលនៅទូទាំងប្រទេសអ៊ុយក្រែនកាលពីព្រឹកថ្ងៃព្រហស្បតិ៍ទី៩មីនា ដោយវាយប្រហារទៅលើអគារលំនៅដ្ឋាន និងសម្លាប់មនុស្សយ៉ាងហោចណាស់ប្រាំនាក់នៅក្នុងការវាយប្រហារទ្រង់ទ្រាយធំបំផុតបែបនេះក្នុងរយៈពេលបីសប្តាហ៍។
អភិបាលក្រុងល្វីវ (Lviv)លោក ម៉ាក់ស៊ីម កូហ្ស៊ីតស្គី (Maksym Kozytskyi)បាននិយាយថា មនុស្សបួននាក់បានស្លាប់នៅក្នុងតំបន់ទីក្រុងល្វីវបន្ទាប់ពីមីស៊ីលមួយហ្វូងបានវាយប្រហារតំបន់លំនៅដ្ឋានមួយ។ លោកបាននិយាយថា អគារចំនួនបីត្រូវបានបំផ្លាញដោយអគ្គិភ័យ បន្ទាប់ពីការធ្វើវាយប្រហារនេះ ហើយក្រុមអ្នកជួយសង្គ្រោះកំពុងរើគំនរបាក់បែកដើម្បីស្វែងរកជនរងគ្រោះ។
អភិបាលក្រុងឌីនីប្រូដ្រូវសក៍ (Dnipropetrovsk) លោក សឺហ៊ី លីសាក់ (Serhii Lysak) បាននិយាយថា មនុស្សទីប្រាំត្រូវបានសម្លាប់និងពីរនាក់ផ្សេងទៀតបានរងរបួសនៅក្នុងការវាយប្រហារជាច្រើនលើកនៅក្នុងតំបន់ទីក្រុងឌីនីប្រូដ្រូវសក៍ ដែលផ្តោតលើហេដ្ឋារចនាសម្ពន្ធថាមពល និងកន្លែងឧស្សាហកម្មរបស់ខ្លួន។
ស៊ីរ៉ែនព្រមានអំពីការវាយឆ្មក់តាមអាកាសបានបន្លឺឡើងពេញមួយយប់ទូទាំងប្រទេសអ៊ុយក្រែន រួមទាំងរដ្ឋធានីគៀវ កន្លែងដែលការផ្ទុះជាច្រើនបានកើតឡើងនៅតំបន់ពីរនៅភាគខាងលិចទីក្រុង។ ប្រព័ន្ធការពារអាកាសត្រូវបានធ្វើឱ្យសកម្មឡើងនៅជុំវិញប្រទេស ហើយគេមិនច្បាស់ថាមានមីស៊ីលប៉ុន្មានគ្រាប់បានវាយប្រហារគោលដៅ ឬត្រូវបានស្ទាក់ចាប់នោះទេ។
រដ្ឋបាលក្រុងគៀវនិយាយថា ទីក្រុងត្រូវបានវាយប្រហារដោយមីស៊ីលនិងដ្រូន ហើយមីស៊ីលជាច្រើនត្រូវបានស្ទាក់ចាប់ ប៉ុន្តែហេដ្ឋារចនាសម្ពន្ធថាមពលរបស់ក្រុងត្រូវបានវាយប្រហារ។
អភិបាលក្រុងគៀវលោក វីតាលី គ្លីតស្កូ (Vitali Klitschko)បាននិយាយថា ការផ្ទុះជាច្រើនត្រូវបានរាយការណ៍នៅក្នុងសង្កាត់ហូឡូស៊ីវស្គី (Holosiivskyi) នៃទីក្រុងហើយមនុស្សពីរនាក់បានរងរបួសនៅក្នុងសង្កាត់ស្វីយ៉ាតូស៊ីនស្គី (Sviatoshynskyi) ផងដែរនៅផ្នែកខាងលិចនៃទីក្រុង ហើយរថយន្តជាច្រើនបានឆាបឆេះនៅទីនោះ៕
មីស៊ីលរុស្ស៊ីបាញ់ស្រោចមកលើអ៊ុយក្រែននៅព្រឹកថ្ងៃព្រហស្បតិ៍នេះ
អ្នកភូមិពិនិត្យមើលគំនរបាក់បែកក្រោយការវាយប្រហារដោយកាំជ្រួចរុស្ស៊ីកាលពីយប់នៅតំបន់ល្វីវ