ប្រែសម្រួល : កញ្ញាដាលីស (អេស៊ាវ័ន) ៖ អតីតមិត្តស្រីរបស់ ថៃហ្គើ វូដ (Tiger Woods) កំពុងប្ដឹងគាត់ទារប្រាក់ ៣០ លានដុល្លារអាម៉េរិក។
អតីតដៃគូរបស់កីឡាករវាយកូនហ្គោលអាយុ ៤៧ ឆ្នាំ នាង អេរីកា ហឺម៉ាន់ (Erica Herman) បានរស់នៅជាមួយគាត់ក្នុងរដ្ឋផ្លរីដាសម្រាប់រយៈពេលនៃទំនាក់ទំនងប្រាំមួយឆ្នាំរបស់គេ។
ក្នុងអំឡុងពេលនោះ អតីតអ្នកគ្រប់គ្រងភោជនីយដ្ឋានរូបនេះបានអះអាងថា នាងបានអនុវត្ត “សេវាកម្មដ៏មានតម្លៃ” (ផ្លូវភេទ) សម្រាប់កីឡាករដ៏ល្បីនេះជំនួសឱ្យការបង់ថ្លៃជួលផ្ទះ ទោះមានតែ “កិច្ចព្រមព្រៀងជួលផ្ទាល់មាត់” រវាងអ្នកទាំងពីរ ដែលនាងអះអាងថានៅសល់ពេលជួលប្រាំឆ្នាំបន្ថែមទៀត បន្ទាប់ពីពួកគេបានបែកគ្នានៅរដូវស្លឹកឈើជ្រុះឆ្នាំមុន។
ទោះយ៉ាងណា យោងតាមឯកសារដែលទទួលបានដោយវេបសាយ TMZ នាងអេរីកាបានអះអាងថា បុគ្គលិករបស់ថៃហ្គើបានបញ្ចុះបញ្ចូលនាងឱ្យរៀបចំបង្វិចសម្រាប់ “វិស្សមកាលខ្លី” ដោយគ្មានកីឡាករវាយកូនហ្គោលរូបនេះកាលពីរដូវស្លឹកឈើជ្រុះឆ្នាំមុន ប៉ុន្តែបន្ទាប់ពីដឹកនាងដល់អាកាសយានដ្ឋាន នាងត្រូវបានគេប្រាប់ថានាងត្រូវបាន “ចាក់សោឱ្យនៅក្រៅផ្ទះ” ហើយមិនត្រូវបានអនុញ្ញាតឱ្យត្រឡប់ទៅផ្ទះវិញទេ។
ស្ត្រីវ័យ ៣៨ ឆ្នាំរូបនេះបាននិយាយថា មេធាវីម្នាក់របស់ថៃហ្គើបានជួបនាងនៅអាកាសយានដ្ឋានជាមួយនឹងសំណើមួយដើម្បីដោះស្រាយបញ្ហារវាងអតីតគូស្នេហ៍នេះ ហើយថែមទាំងបានអះអាងថាលុយនាងជាង ៤០.០០០ ដុល្លារអាម៉េរិកត្រូវបានរឹបអូសពីផ្ទះនោះ បន្ទាប់ពីចោទប្រកាន់នាងថាបាន “ធ្វើរឿងខ្មៅងងឹត” ដើម្បីទទួលបានប្រាក់នោះ។
នាងអេរីកាបានដាក់ពាក្យបណ្តឹងប្រឆាំងនឹងក្រុមហ៊ុនមួយរបស់ថៃហ្គើ វូដ ដែលជាម្ចាស់កម្មសិទ្ធិលើផ្ទះនោះ ហើយកំពុងទាមទារសំណង ៣០ លានដុល្លារ ដែលនាងអះអាងថាជា “តម្លៃជួលសមរម្យ” នៃផ្ទះរបស់ថៃហ្គើសម្រាប់រយៈពេលប្រាំឆ្នាំ ដែលនាងអះអាងថានៅសេសសល់ក្នុងកិច្ចព្រមព្រៀងផ្ទាល់មាត់របស់ពួកគេ។
ជាការឆ្លើយតបទៅនឹងពាក្យបណ្ដឹងនេះ ក្រុមហ៊ុនរបស់ថៃហ្គើវូដបានបដិសេធថាមិនមានកិច្ចសន្យាផ្ទាល់មាត់ទេ ហើយនាងអេរីកាគ្រាន់តែស្នាក់នៅផ្ទះនោះក្នុងនាមជាមិត្តស្រីរបស់គាត់ប៉ុណ្ណោះ ដូច្នេះត្រូវបានស្នើសុំឱ្យចាកចេញបន្ទាប់ពីកីឡាករ ក៏រស់នៅក្នុងផ្ទះនោះដែរនោះ បានបញ្ចប់ទំនាក់ទំនងរបស់ពួកគេ៕
នាងអេរីកានិងថៃហ្គើវូដមើលការប្រកួត US Open នៅទីក្រុងញូវយ៉ក កាលពីថ្ងៃទី ៣១ សីហា ឆ្នាំ២០២២