ប្រែសម្រួល : កញ្ញាដាលីស (ដេល្លីម៉េល) ៖ អភិបាលខេត្តបាល់ខ៍ (Balkh)របស់ពួកតាលីបង់នៅអាហ្វហ្គានីស្ថាន ត្រូវបានសម្លាប់នៅការិយាល័យរបស់គាត់កាលពីថ្ងៃព្រហស្បតិ៍ទី៩មីនា នៅក្នុងការវាយប្រហារអត្តឃាត ដែលក្រោយមកត្រូវបានអះអាងដោយក្រុមរដ្ឋអ៊ីស្លាម (IS)។
ការសម្លាប់លោកអភិបាលខេត្ត ម៉ូហាម៉ាត់ ដាវូដ មូហ្សាមមីល (Mohammad Dawood Muzammil) កត់សម្គាល់នូវការវាយប្រហារកម្រិតខ្ពស់បំផុតមួយចាប់តាំងពីក្រុមតាលីបង់បានវាយលុកចូលកាន់អំណាចក្នុងឆ្នាំ ២០២១។ ប៉ូលិសនិយាយថា មនុស្សទីពីរក៏បានស្លាប់នៅក្នុងការវាយប្រហារនេះផងដែរ។
លោកអភិបាលខេត្ត ម៉ូហាម៉ាត់ ដាវូដ មូហ្សាមមីល
ក្រុមជីហាដនិយមនេះបាននិយាយនៅក្នុងសេចក្តីថ្លែងការណ៍មួយនៅលើទីភ្នាក់ងារសារព័ត៌មាន Amaq របស់ខ្លួនយ៉ាងដូច្នេះថា អ្នកប្រយុទ្ធ ISម្នាក់រង់ចាំលោកអភិបាលនៅការិយាល័យរបស់គាត់ “ហើយរត់ទៅរកគាត់ដោយបំផ្ទុះខ្សែក្រវាត់គ្រាប់បែករបស់ខ្លួនតែម្តង”។
លោកមូហ្សាមមីល ទើបតែបានជួបមួយថ្ងៃមុននេះជាមួយមន្ត្រីរដ្ឋាភិបាលកំពូលដែលមកពីក្រុងកាប៊ុល។
អំពើហិង្សានៅទូទាំងអាហ្វហ្គានីស្ថានបានធ្លាក់ចុះយ៉ាងខ្លាំងចាប់តាំងពីក្រុមតាលីបង់ដណ្តើមបានការគ្រប់គ្រង ប៉ុន្តែស្ថានភាពសន្តិសុខកាន់តែយ៉ាប់យ៉ឺនម្តងទៀតនៅពេលក្រុម IS អះអាងការវាយប្រហារដ៏ប្រល័យជាច្រើនលើក។
អ្នកនាំពាក្យប៉ូលិសក្នុងតំបន់ លោក អាស៊ីហ្វ វ៉ាហ្ស៊ីរី (Asif Waziri) បានប្រាប់ទីភ្នាក់ងារសារព័ត៌មាន AFP ថា “មនុស្សពីរនាក់ រួមទាំងលោកម៉ូហាម៉ាត់ ដាវូដ មូហ្សាមមីល អភិបាលក្រុងបាល់ខ៍ ត្រូវបានសម្លាប់នៅក្នុងការផ្ទុះមួយនៅព្រឹកនេះ” ដោយបន្ថែមថា ការបំផ្ទុះបានកើតឡើងនៅជាន់ទីពីរនៃការិយាល័យរបស់គាត់ ក្នុងទីរួមខេត្តម៉ាហ្សា អ៊ី សារីហ្វ (Mazar-i-Sharif)។
ក្រុម IS បានក្លាយជាបញ្ហាប្រឈមផ្នែកសន្តិសុខដ៏ធំបំផុតចំពោះរដ្ឋាភិបាលតាលីបង់ចាប់តាំងពីឆ្នាំមុន ដោយធ្វើការវាយប្រហារលើជនស៊ីវិលអាហ្វហ្គានីស្ថាន ក៏ដូចជាជនបរទេសនិងផលប្រយោជន៍បរទេស៕
បុរសម្នាក់កំពុងរុញបុរសរងរបួសម្នាក់ទៅក្នុងមន្ទីរពេទ្យក្នុងក្រុងម៉ាហ្សាអ៊ីសារីហ្វ បន្ទាប់ពីមានការវាយប្រហារអត្តឃាតនៅការិយាល័យអភិបាលខេត្តបាល់ខ៍