ប្រែសម្រួលៈបំណង(ដេល្លីម៉េល)៖ លោក ស៊ី ជីនភីង ធានាបានតំណែងប្រធានាធិបតីអាណត្តិទីបីរយៈពេលប្រាំឆ្នាំកាលពីថ្ងៃសុក្រទី១០មីនា ក្នុងសម័យប្រជុំសភាមួយដែលអនុញ្ញាតអោយលោករឹតបន្តឹងការគ្រប់គ្រងរបស់លោកលើចិនដែលជួបការប្រឈមកាន់តែច្រើនទាំងក្នុងនិងក្រៅស្រុក។
សមាជិកជិត៣.០០០នាក់នៃសភាប្រជាជនចិន បានបោះឆ្នោតគាំទ្រលោកស៊ី វ័យ៦៩ឆ្នាំ ជាឯកច្ឆន្ទនៅមហាសាលប្រជាជន ក្នុងការបោះឆ្នោតដែលមិនមានបេក្ខជនប្រជែងសូម្បីតែម្នាក់។
លោកស៊ី បន្តមុខតំណែងរបស់លោកចំពេលទំនាក់ទំនងជាមួយរដ្ឋាភិបាលទីក្រុងវ៉ាស៊ីនតោននិងលោកខាងលិចកាន់តែអាក្រក់ទៅដោយសារតែបញ្ហាកោះតៃវ៉ាន់ ការគាំទ្រផ្នែកការទូតរបស់ចិនចំពោះរុស្ស៊ី ពាណិជ្ជកម្មនិងសិទ្ធិមនុស្ស។ប្រទេសមហាអំណាចសេដ្ឋកិច្ចទីពីរនេះក៏កំពុងខិតខំងើបចេញពីផលអវិជ្ជមាននៃការអនុវត្តវិធានការគ្រប់គ្រងជំងឺឆ្លងតឹងរឹងអស់បីឆ្នាំ ជំនឿចិត្តមិនទាន់មាំទាំងក្នុងចំណោមអ្នកប្រើប្រាស់និងធុរកិច្ច គួបផ្សំនឹងតំរូវការសកលខ្សោយសំរាប់ការនាំចេញរបស់ចិន។
សេដ្ឋកិច្ចចិនកើនបានតែ៣ភាគរយកាលពីឆ្នាំកន្លងទៅ ដែលជាការប្រតិបត្តិសេដ្ឋកិច្ចអន់បំផុតក្នុងរយៈពេលប៉ុន្មានទសវត្សរ៍មកនេះ ហើយនៅក្នុងអង្គប្រជុំសភានេះចិនបានកំណត់គោលដៅកំណើនមធ្យមគឺ៥ភាគរយសំរាប់ឆ្នាំ២០២៣។
ស៊ី ជីនភីង ដែលទើបជាប់ជាប្រធានាធិបតីនៃសាធារណរដ្ឋប្រជាមានិតចិននិងជាប្រធានគណៈកម្មាធិការយោធាមជ្ឈិមរបស់សាធារណរដ្ឋប្រជាមានិតចិន ធ្វើការសន្យាជាសាធារណៈថានឹងអនុវត្តតាមរដ្ឋធម្មនុញ្ញចិន
វីលលី ឡាំ(Willy Lam)នៅអង្គការទីប្រឹក្សាអាម៉េរិកJamestown Foundationបាននិយាយថា« នៅក្នុងអាណត្តិទីបីរបស់លោក លោកស៊ីនឹងត្រូវផ្តោតលើការធ្វើអោយសកម្មក្លៀវក្លាឡើងវិញនៃសេដ្ឋកិច្ច។តែបើលោកនៅបន្តអនុវត្តអ្វីដែលលោកបានធ្វើ គឺគ្រប់គ្រងរបស់បក្សនិងរដ្ឋកាន់តែតឹងរឹងឡើងលើវិស័យឯកជន ហើយប្រឈមមុខជាមួយលោកខាងលិច ទស្សនវិស័យរបស់លោកសំរាប់ជោគជ័យ នឹងមិនបានការលើកទឹកចិត្តទេ»។
ក្នុងអំឡុងកិច្ចប្រជុំកាលពីថ្ងៃសុក្រ លោកស៊ីបានជជែកធម្មតាជាមួយនាយករដ្ឋមន្ត្រីរង់ចាំចូលតំណែង លោក លី ឈៀង(Li Qiang) ដែលបានអង្គុយនៅខាងឆ្វេងជាប់លោក។លោកលី ទំនងជានឹងត្រូវសភាអនុម័តមុខតំណែងចាត់ចែងដឹកនាំសេដ្ឋកិច្ចចិនរបស់លោកនៅថ្ងៃសៅរ៍ ។
មន្ត្រីដែលលោកស៊ីគាំទ្រដទៃទៀត ក៏នឹងត្រូវសភាបោះឆ្នោតគាំទ្រ ឬតែងតាំងសំរាប់មុខតំណែងសំខាន់ៗក្នុងរដ្ឋាភិបាលនៅចុងសប្តាហ៍នេះ រួមមានឧបនាយករដ្ឋមន្ត្រី ទេសាភិបាលធនាគារកណ្តាលនិងរដ្ឋមន្ត្រី ព្រមទាំងប្រធាននាយកដ្ឋាន។
សម័យប្រជុំសភានេះ នឹងបញ្ចប់នៅថ្ងៃចន្ទ នៅពេលលោកស៊ីនឹងថ្លែងសុន្ទរកថាមួយ និងបន្ទាប់មកនឹងមានកម្មវិធីសួរឆ្លើយពីបណ្តាញផ្សព្វផ្សាយទៅកាន់លោកលី។
កាលពីថ្ងៃសុក្រ សភាក៏បានជ្រើសតាំងលោកចាវ ឡេជិ(Zhao Leji) អាយុ៦៦ឆ្នាំជាប្រធានសភាថ្មីរបស់ចិន និងលោកហាន់ ចេង(Han Zheng)អាយុ៦៨ឆ្នាំជាអនុប្រធានាធិបតីថ្មី។អ្នកទាំងពីរមកពីក្រុមមេដឹកនាំបក្សរបស់លោកស៊ី នៅក្នុងគណៈកម្មាធិការអចិន្ត្រៃយ៍នៃការិយាល័យនយោបាយមជ្ឈិមបក្ស៕