ប្រែសម្រួល : កញ្ញាដាលីស (ដេល្លីម៉េល) ៖ សម្តេចប៉ាប ហ្វ្រង់ស៊ីស បានមានសង្ឃដីកាថា សង្គ្រាមនៅអ៊ុយក្រែនត្រូវបានជំរុញដោយផលប្រយោជន៍នៃ “ចក្រភព” ជាច្រើន មិនមែនតែរុស្ស៊ីប៉ុណ្ណោះទេ។
បើតាមសម្តេចសង្ឃកាតូលិចព្រះជន្ម ៨៦ វស្សាអង្គនេះ ជម្លោះដ៏ឃោរឃៅត្រូវបានបញ្ឆេះដោយ “ផលប្រយោជន៍ចក្រពត្តិ មិនមែនតែចក្រភពរុស្ស៊ីមួយប៉ុណ្ណោះទេ ប៉ុន្តែជាចក្រភពពីកន្លែងផ្សេងៗ”។
សម្តេចបានបន្ថែមថា “វាជារឿងធម្មតារបស់បណ្តាចក្រភពក្នុងការដាក់ប្រទេសនានានៅកន្លែងបន្ទាប់បន្សំ”។
នៅក្នុងបទសម្ភាសន៍ដែលបានចេញផ្សាយកាលពីថ្ងៃសុក្រទី១០មីនា សម្តេចប៉ាបបានសម្តែងការត្រៀមខ្លួនដើម្បីពិភាក្សាជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន ដើម្បីអំពាវនាវឱ្យមានសន្តិភាព។
សម្តេចប៉ាបបានមានសង្ឃដីកាថា ទ្រង់បានព្យាយាមទៅកាន់ប្រទេសរុស្ស៊ីដើម្បីជួបជាមួយលោកពូទីនក្នុងបំណងបញ្ចប់សង្គ្រាមបន្ទាប់ពីការលុកលុយកាលពីខែកុម្ភៈឆ្នាំមុន។សម្តេចប៉ាបហ្វ្រង់ស៊ីសនិងពូទីនបានជួបគ្នាជាច្រើនដងហើយបានប្រាប់បទសម្ភាសន៍ថា “ពូទីនដឹងថាខ្ញុំអាចរកបានគ្រប់ពេល”។
សម្តេចប៉ាបបានបន្ថែមថា “នៅថ្ងៃទីពីរនៃសង្គ្រាម ខ្ញុំបានទៅស្ថានទូតរុស្ស៊ីនៅឯហូលីស៊ី (អង្គការរដ្ឋបាលកណ្តាលរបស់សាសនាគ្រិស្ត) ដើម្បីនិយាយថា ខ្ញុំសុខចិត្តទៅទីក្រុងមូស្គូ ប្រសិនបើពូទីនផ្តល់ឱកាសឱ្យខ្ញុំចរចា”។
“លោកឡាវរ៉ូវបានសរសេរមកខ្ញុំដោយនិយាយថា សូមអរគុណ ប៉ុន្តែឥឡូវនេះមិនទាន់ដល់ពេលទេ។ ពូទីនដឹងថាខ្ញុំអាចរកបានគ្រប់ពេល។ ប៉ុន្តែមានផលប្រយោជន៍ចក្រពត្តិនៅទីនោះមិនត្រឹមតែចក្រភពរុស្ស៊ីប៉ុណ្ណោះទេ ប៉ុន្តែក៏មានចក្រភពផ្សេងទៀតដែរ។ វាជារឿងធម្មតារបស់ចក្រភពដែលដាក់ប្រទេសនានានៅកន្លែងបន្ទាប់បន្សំ”៕
សម្តេចប៉ាប ហ្វ្រង់ស៊ីស