ប្រែសម្រួល : កញ្ញាដាលីស (ស្ត្រេតថែមស៍) ៖ ក្មេងស្រីអាយុ៧ឆ្នាំបានបង្កើតប្រវត្តិសាស្ត្រដោយក្លាយជាគ្រូបង្ហាត់យ៉ូហ្គាដែលមានវិញ្ញាបនបត្របញ្ជាក់វ័យក្មេងជាងគេបំផុតនៅលើពិភពលោក នេះបើយោងតាមសៀវភៅកំណត់ត្រាពិភពលោកហ្គីនណេស។
មកពីប្រទេសឥណ្ឌា នាង ប្រាអានវី ហ្គូបតា (Praanvi Gupta) ដែលរស់នៅក្នុងទីក្រុងឌូបៃ ត្រូវបានយល់ព្រមនិងបញ្ជាក់ជាគ្រូបង្ហាត់យ៉ូហ្គាដែលបានចុះបញ្ជីដោយអង្គការ Yoga Alliance ដែលជាអង្គការមិនរកប្រាក់ចំណេញដ៏ធំ តំណាងឱ្យសហគមន៍យ៉ូហ្គា បន្ទាប់ពីនាងបានបញ្ចប់វគ្គបណ្តុះបណ្តាលរយៈពេល ២០០ ម៉ោង។
នៅអាយុ ៧ ឆ្នាំ ១៦៥ ថ្ងៃ នាងបានផ្តួលអតីតគ្រូបង្ហាត់យ៉ូហ្គាវ័យក្មេងបំផុត គឺកុមារា រីយ៉ានស៍ ស៊ូរ៉ានី (Reyansh Surani) ដែលមានអាយុ ៩ និង ២២០ ថ្ងៃ នៅពេលរូបគេទទួលបានវិញ្ញាបនបត្របញ្ជាក់ក្នុងខែកក្កដា ឆ្នាំ ២០២១។
ដំណើររបស់នាងប្រាអានវីនបានចាប់ផ្តើមនៅពេលនាងមានអាយុ៣ឆ្នាំកន្លះ បន្ទាប់ពីមើលម្តាយរបស់នាងហាត់យ៉ូហ្គានៅផ្ទះ។
កុមារីរូបនេះបានធ្វើត្រាប់តាមក្បាច់ហាត់របស់ម្តាយរយៈពេលពីរបីខែមុននឹងអនុវត្តទម្លាប់បុរាណនេះដោយខ្លួនឯង។
ក្រោយមកនាងបានចុះឈ្មោះចូលរៀនក្នុងថ្នាក់យ៉ូហ្គានៅអាយុ៧ឆ្នាំ ហើយបានចូលរៀនក្នុងអំឡុងពេលសម្រាកនៅសាលា។
ដោយរកឃើញចំណង់ចំណូលចិត្តរបស់នាងតាមរយៈថ្នាក់រៀនទាំងនោះ នាងប្រាអានវីបាននិយាយថា “ខ្ញុំចង់ផ្សព្វផ្សាយសេចក្តីស្រឡាញ់នៃយ៉ូហ្គាទៅកាន់មនុស្សឱ្យបានច្រើនតាមដែលអាចធ្វើទៅបាន”៕
នាងប្រាអានវីក្លាយជាគ្រូបង្ហាត់យ៉ូហ្គានៅអាយុ៧ឆ្នាំ