ប្រែសម្រួលៈបំណង(ដេល្លីម៉េល)៖ ចិនត្រូវការសន្តិសុខដើម្បីធ្វើការអភិវឌ្ឍនិងត្រូវតែធ្វើទំនើបកម្មយោធារបស់ខ្លួនដើម្បីសាង«មហាកំផែងដែកថែម»មួយ នេះបើតាមប្រធានាធិបតីចិន ស៊ី ជីនភីងបានមានប្រសាសន៍កាលពីថ្ងៃចន្ទក្នុងពិធីបិទបញ្ចប់សម័យប្រជុំសភា ចំពេលចិនមានភាពតានតឹងចេះតែកើនឡើងជាមួយសហរដ្ឋអាម៉េរិក។
ថ្លែងជាលើកដំបូងក្នុងនាមជាប្រធានាធិបតីចិនអាណត្តិទីបី លោកស៊ីបានអំពាវនាវអោយចិនបង្កើនលទ្ធភាពរបស់ខ្លួនក្នុងការការពារសន្តិសុខជាតិនិងគ្រប់គ្រងចាត់ចែងសន្តិសុខសាធារណៈ។
លោកថា« សន្តិសុខជាគ្រឹះសំរាប់ការអភិវឌ្ឍ ហើយស្ថិរភាពជារបស់ត្រូវការជាមុនសំរាប់វិបុលភាព»។
គណបក្សកុំម្មុយនីស្តចិន ត្រូវរំពឹងថានឹងរឹតបន្តឹងការត្រួតមើលសន្តិសុខ ជាចំណាត់ការមួយដែលនឹងកើតឡើងបន្ទាប់ពីលោកស៊ីដាក់មនុស្សជំនិតរបស់លោកក្នុងមុខតំណែងសន្តិសុខកំពូលៗ។
ស៊ី កាលពីថ្ងៃចន្ទក៏បានបញ្ជាក់ថា ចិនត្រូវតែសំរេចអោយបានការពឹងលើខ្លួនឯងច្រើនឡើងនិងកម្លាំងខាងវិទ្យាសាស្ត្រនិងបច្ចេកវិទ្យាចំពេលអាម៉េរិកព្យាយាមបិទខ្ទប់មិនអោយចិនទទួលបានគ្រឿងបរិក្ខារផលិតបន្ទះឈីបនិងបច្ចេកវិទ្យាទំនើបផ្សេងៗ។
អំពីបញ្ហាកោះតៃវ៉ាន់ លោកបានមានប្រសាសន៍ថា ចិនត្រូវតែប្រឆាំងសកម្មភាពគាំទ្រឯករាជ្យភាពនិងការផ្តាច់ខ្លួន ព្រមទាំងការជ្រៀតជ្រែកនៃកម្លាំងខាងក្រៅ៕
ស៊ី ជីនភីង ថ្លែងក្នុងសម័យប្រជុំសភាប្រជាជនចិនកាលពីថ្ងៃ១៣មីនា។លោកថា ៖សន្តិសុខជាគ្រឹះសំរាប់ការអភិវឌ្ឍរបស់ចិន